[Phnom Penh Post] - កម្ពុជាប្តេជ្ញានឹងពង្រឹកប្រព័ន្ធដឹកជញ្ជូនឱ្យល្អ ដើម្បីកំណើនសេដ្ឋកិច្ចជាតិ
2021-05-19
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ កម្ពុជាប្តេជ្ញានឹងខិតខំធ្វើឱ្យប្រសើរឡើងនូវប្រព័ន្ធដឹកជញ្ជូនរបស់ខ្លួនដើម្បីរួមចំណែកជំរុញកំណើនពាណិជ្ជកម្មក្នុងតំបន់ ខណៈវិស័យមួយនេះកំពុងទទួលរងផលប៉ះពាល់យ៉ាងធ្ងន់ធ្ងរពីការរាតត្បាតជំងឺកូវីដ១៩។ នេះបើយោងតាមក្រសួងសាធារណការ និងដឹកជញ្ជូន។
ក្រសួងសាធារណការ និងដឹកជញ្ជូនឱ្យដឹងថា បច្ចុប្បន្នកម្ពុជា និងសមាជិកអាស៊ានកំពុងពិភាក្សាគ្នារកវិធីសម្របសម្រួលការដឹកជញ្ជូនឱ្យកាន់តែល្អប្រសើរ តាមរយៈការកាត់បន្ថយពេលវេលាដឹកជញ្ជូន និងតម្លៃដែលបណ្តាលពីវិធានការរឹតបន្តឹងព្រំដែនរបស់ប្រទេសនីមួយៗ ដើម្បីទប់ស្កាត់ការឆ្លងរាលដាលជំងឺកូវីដ ១៩។ ការរឹតបន្តឹងតាមព្រំដែនបានធ្វើឱ្យទំនិញដែលកាលពីមុនត្រូវការពេលដឹកជញ្ជូន ១ ថ្ងៃ ប៉ុន្តែពេលនេះត្រូវចំណាយពេលពី ២-៣ ថ្ងៃទើបទៅដល់គោលដៅ។
ក្រៅពីការប្តេជ្ញាខាងលើ កម្ពុជាកំពុងធ្វើការជាមួយភាគីថៃក្នុងការរិះរកនីតិវិធីបើកច្រកព្រំដែនអន្តរជាតិ ស្ទឹងបត់បានណងអៀន ជាបណ្ដោះអាសន្ន ដើម្បីសម្រួលទៅដល់ការដឹកជញ្ជូនទំនិញឆ្លងកាត់ច្រកទ្វារព្រំដែន និងកំពុងធ្វើការជាមួយវៀតណាមដើម្បីបើកច្រកព្រំដែនព្រៃវល្លិ៍ព្រែកចាក។ បើច្រកទ្វារទាំង ២ បើកដំណើរការវានឹងជួយសម្រួលដល់ការដឹកជញ្ជូនទំនិញឆ្លងដែន ទេសចរណ៍ ការវិនិយោគ ឱកាសការងារ និងកិច្ចសហប្រតិបត្តិការដើម្បីលើកកម្ពស់សេដ្ឋកិច្ចគ្រួសារ និងកំណើនសេដ្ឋកិច្ចជាតិផងដែរ។
ក្រសួងឱ្យដឹងថា៖ «បច្ចុប្បន្នប្រទេសកម្ពុជាកំពុងរិះរកវិធានការអនុវត្តប្រកបដោយប្រសិទ្ធភាព និងគ្រប់ជ្រុងជ្រោយ ដើម្បីចូលរួមកាត់បន្ថយការចំណាយលើសេវាដឹកជញ្ជូនទំនិញនៅកម្ពុជា និងជំរុញការអនុវត្តគោលនយោបាយកិច្ចសម្រួលពាណិជ្ជកម្មរបស់រាជរដ្ឋាភិបាល និងលើកកម្ពស់ឧត្តមភាពប្រកួតប្រជែងរបស់កម្ពុជានៅក្នុងស្ថានភាពនៃការផ្ទុះរីករាលដាលជំងឺកូវីដ ១៩»។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បានប្រាប់ភ្នំពេញប៉ុស្តិ៍កាលពីថ្ងៃទី ១៨ ខែឧសភាថា វិស័យដឹកជញ្ជូនបានចូលរួមចំណែកដោយផ្ទាល់នៅក្នុងសកម្មភាពសេដ្ឋកិច្ចជាតិ ព្រោះបើវិស័យនេះគ្មានសកម្មភាពសេដ្ឋកិច្ចក៏គ្មានដំណើរការល្អដែរ ហេតុនេះការជំរុញវិស័យនេះឱ្យមានចលនាល្អ បានន័យថាជាការជួយជំរុញកំណើនសេដ្ឋកិច្ចឱ្យមានកំណើនកាន់តែខ្ពស់។ លោកបន្តថា នៅពេលដែលហេដ្ឋារចនាសម្ព័ន្ធក្នុងប្រទេសល្អប្រសើរ វិស័យដឹកជញ្ជូននឹងមានតម្លៃថោក និងចំណាយពេលតិច ដូច្នេះថ្លៃដើមផលិតនឹងចុះទាប ដែលវានឹងជួយបង្កើនសក្តានុពលសម្រាប់ការប្រកួតប្រជែងតម្លៃទំនិញកម្ពុជាលើទីផ្សារអន្តរជាតិ។
លោកថ្លែងថា៖ «វិស័យដឹកជញ្ជូនមានសារៈសំខាន់ណាស់ក្នុងការជំរុញកំណើនសេដ្ឋកិច្ចជាតិ ជាក់ស្តែងក្នុងពេលដ៏លំបាកដែលរដ្ឋាភិបាលដាក់ចេញនូវវិធានការបិទខ្ទប់ការធ្វើដំណើរ ក៏វិស័យដឹកជញ្ជូនទំនិញមិនត្រូវបិទសកម្មភាពដែរ ព្រោះបើវិស័យនេះគាំង វានឹងធ្វើឱ្យសេដ្ឋកិច្ចជាតិទាំងមូលជាប់គាំង»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញបានប្រាប់ថា ការប្តេជ្ញារបស់រដ្ឋាភិបាលក្នុងការធ្វើប្រព័ន្ធដឹកជញ្ជូនមានភាពងាយស្រួល និងឆាប់រហ័សនឹងក្លាយជាចំណែកសំខាន់ក្នុងការធ្វើឱ្យសេដ្ឋកិច្ចកម្ពុជាឆាប់ងើបឡើងវិញពីឱនភាពដែលបណ្តាលមកពីការឆ្លងរាលដាលជំងឺកូវីដ ១៩ ខណៈពេលនេះកម្ពុជាក៏កំពុងត្រៀមចាប់យកចូលវិនិយោគថ្មីៗ និងការនាំចេញផលិតផលកាន់តែច្រើនទៅទីផ្សារអន្តរជាតិ។
លោកនិយាយថា៖ «ខ្ញុំគិតថាបន្ទាប់ពីជំងឺកូវីដ ១៩ បញ្ចប់ វិស័យដឹកជញ្ជូនកម្ពុជានឹងមានសម្ទុះខ្លាំង ព្រោះក្រៅពីអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន ដែលទើបសម្រេចបាន កម្ពុជាក៏សង្ឃឹមទទួលបានឱកាសវិនិយោគថ្មីៗមួយចំនួនពីក្រុមហ៊ុនដែលចេញពីប្រទេសមីយ៉ាន់ម៉ា»។
កាលពីថ្ងៃទី ៧ ខែ មេសា ឆ្នាំ ២០២១ លេខាធិការដ្ឋានអាស៊ាននៅប្រទេសឥណ្ឌូនេស៊ី ក៏បានរៀបចំសិក្ខាសាលាតាមប្រព័ន្ធវីដេអូ ស្តីពី «ការរក្សាការតភ្ជាប់សម្រាប់ខ្សែចង្វាក់ផ្គត់ផ្គង់ប្រកបដោយប្រសិទ្ធភាព និងភាពធន់» ក្រោមកិច្ចសហការជាមួយអង្គការ UNESCAP និងវេទិកាដឹកជញ្ជូនអន្តរជាតិ (ITF) ដើម្បីប្រមូលធាតុចូល និងស្វែងរកដំណោះស្រាយចំពោះបញ្ហានៃការដឹកជញ្ជូនរបស់អាស៊ានក្នុងអំឡុងពេលនៃការឆ្លងរាតត្បាតជំងឺកូវីដ ១៩ ដោយមានការចូលរួមពីតំណាងរដ្ឋជាសមាជិកអាស៊ានទាំងអស់ផងដែរ។
ទិន្នន័យក្រសួងពាណិជ្ជកម្មឱ្យដឹងថា ក្នុងឆ្នាំ ២០២០ ទំហំពាណិជ្ជកម្មអន្តរជាតិដែលកម្ពុជាសម្រេចបានមានតម្លៃសរុប ៣៥ ៨០៥,៨៥ លានដុល្លារ កើនឡើង ២,៥៤ ភាគរយ ធៀបនឹងឆ្នាំ ២០១៩។ ក្នុងនោះការនាំចេញទំនិញមានតម្លៃ ១៧ ២១៥,៣៧ លានដុល្លារ កើនឡើង ១៦,៧២ ភាគរយ និងការនាំចូល មានតម្លៃ ១៨ ៥៩០,៤៨ លានដុល្លារ ធ្លាក់ចុះ ៧,៨៤ ភាគរយ៕
