[VOD] - ផ្លូវជាតិលេខ៤ នឹងចាប់ផ្តើមពង្រីកទទឹងផ្លូវពី៧ម៉ែត្រទៅ១០ម៉ែត្រនៅឆ្នាំ២០២២
2021-05-18
ទៅកាន់ទំព័រចុះផ្សាយក្នុង VOD
មន្រ្តីនាំពាក្យក្រសួងសាធារណការ និងដឹកជញ្ជូន ឱ្យដឹងថា គម្រោងស្តារនិងស្ថាបនាផ្លូវជាតិលេខ៤ឡើងវិញ នឹងត្រូវប្រើពេលប្រមាណ២ឆ្នាំ ក្នុងការពង្រីកផ្លូវកៅស៊ូមួយនេះឱ្យក្លាយជាផ្លូវដែលមានភាពងាយស្រួលទាំងការដឹកជញ្ជូននិងការធ្វើដំណើររបស់សាធារណជន។
អ្នកនាំពាក្យក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ ថ្លែងប្រាប់ វីអូឌី តាមតេឡេក្រាម (Telegram) កាលពីថ្ងៃទី១៧ ខែឧសភា ថាផ្លូវជាតិលេខ៤ ដែលជាជំនួយរបស់សហរដ្ឋអាមេរិកពីមុនមកនេះ នឹងត្រូវពង្រីកឱ្យធំជាងបច្ចុប្បន្ន ដោយគ្រោងចំណាយថវិកាប្រមាណ១០០លានដុល្លារអាមេរិកដែលជាកម្ចីហិរញ្ញប្បទានរបស់ធនាគារពិភពលោក (WB)។
លោកបន្តថា ផ្លូវជាតិលេខ៤នេះ គ្រោងចាប់ផ្តើមពីឆ្នាំ២០២២ ដល់ឆ្នាំ២០២៣ ហើយក្រោយពីស្ថាបនារួចរាល់ នឹងត្រូវការពេលដើម្បីថែទាំផ្លូវនេះប្រមាណ៤ឆ្នាំ (៥៤ខែ) ទៀត។
បើតាមលោក ហ៊ាង សុទ្ធាយុត្តិ ក្រសួងនឹងដាក់ឱ្យក្រុមហ៊ុនឯកជនទាំងអស់ចូលរួមធ្វើលទ្ធកម្មក្នុងការដេញថ្លៃធ្វើផ្លូវនេះ មុននឹងគម្រោងត្រូវចាប់អនុវត្តទៅតាមផែនការមេដែលបានគ្រោងទុក។
ផ្លូវជាតិលេខ៤ ពីរាជធានីភ្នំពេញ ទៅខេត្តព្រះសីហនុ មានចម្ងាយប្រមាណជាង២០០គីឡូម៉ែត្រ។ ស្ថានភាពជាក់ស្តែងនៃផ្លូវជាតិនេះ បច្ចុប្បន្ន មានទំហំតូចនិងមានចំណុចខ្លះត្រូវរងការខូចខាតដោយការដឹកលើសចំណុះរបស់រថយន្តធុនធំនិងទឹកហូរកាត់ផ្លូវនៅរដូវវស្សា។
លោក ហ៊ាង សុទ្ធាយុត្តិ ឱ្យដឹងទៀតថា ផ្លូវជាតិលេខ៤ ដែលគ្រោងនឹងពង្រីកទំហំពី៧ទៅ១០ម៉ែត្របន្ថែមទៀតនេះ នឹងត្រូវពង្រីកទាំងស្រុង លើកលែងតែកន្លែងខ្លះបានពង្រីករួចហើយ ដូចជា នៅម្តុំខេត្តកំពង់ស្ពឺ និងខណ្ឌចោមចៅ រាជធានីភ្នំពេញ ជាដើម។
លោក លឹម ឡៃ រស់នៅជាប់ផ្លូវជាតិលេខ៤ ក្នុងខេត្តព្រះសីហនុ យល់ឃើញថា ប្រសិនបើគម្រោងផ្លូវជាតិនេះពិតជាត្រូវបានពង្រីកដូចការគ្រោងទុកមែន នោះជាការប្រសើរ ព្រោះអាចកាត់បន្ថយការកកស្ទះនិងគ្រោះថ្នាក់ដែលកើតឡើងដោយរថយន្តធុនធំនិងកុងទីន័រ ជាដើម។ ទន្ទឹមនឹងនេះ លោកក៏បង្ហាញក្តីកង្វល់ដែរអំពីសំណងសម្រាប់ផលប៉ះពាល់អំឡុងពេលអនុវត្តគម្រោងអភិវឌ្ឍន៍នេះ ថាតើពលរដ្ឋដែលរស់នៅជាប់ផ្លូវជាតិនេះនឹងទទួលបានការទូរទាត់សំណងបែបណា។
ឆ្លើយតបរឿងនេះ អ្នកនាំពាក្យក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ មានប្រសាសន៍ថា សំណងនឹងត្រូវផ្តល់ជូនគ្រួសារដែលរងផលប៉ះពាល់ នៅអំឡុងពេលគម្រោងពង្រីកផ្លូវត្រូវចាប់អនុវត្ត។ លោកអះអាងថា នេះជាការអនុវត្តតាមបែបបទនិងស្តង់ដារហើយ ទាំងគម្រោងដែលប្រើថវិការបស់រដ្ឋ និងកម្ចីដែលបានមកពីហិរញ្ញប្បទាន។
យ៉ាងណាក៏ដោយ លោក ប៊ុន ធឿន ជាពលរដ្ឋម្នាក់ទៀតរស់នៅក្នុងខេត្តកំពង់ស្ពឺ និយាយថា ពីមុនមក លោកពុំធ្លាប់ទទួលបានព័ត៌មានស្តីពីការពង្រីកផ្លូវជាតិលេខ៤នេះទេ។
លោកបន្តថា៖ «ដូចអត់មានឃើញគេចេញគម្រោងអីផង អត់ដែលបានឃើញព័ត៌មានអីទេ ហើយក៏អត់មានគេផ្សព្វផ្សាយអីដែរ»។
ផ្លូវជាតិលេខ៤នេះ ត្រូវបានក្រុមហ៊ុន AZ របស់លោកឧកញ៉ា អ៊ឹង ប៊ុនហ៊ូវ កាន់កាប់មួយរយៈ តាមរយៈការដាក់បញ្ជរបង់លុយពីអ្នកធ្វើដំណើរ តែមានការមើលថែទាំផ្លូវជាប្រចាំ។ ក្រោយមក លោក អ៊ឹង ប៊ុនហ៊ូវ សម្រេចប្រគល់ជូនរដ្ឋាភិបាលវិញកាលពីដើមឆ្នាំ២០១៦ បន្ទាប់ពីលោកនាយករដ្ឋមន្រ្តី ហ៊ុន សែន ប្រកាសលុបកិច្ចសន្យាជួលរវាងរដ្ឋាភិបាល និងក្រុមហ៊ុនម៉ៅការផ្លូវមួយនេះ។
ដោយឡែក លោក គង់ សុវណ្ណ អ្នកជំនាញសុខភាពសាធារណៈ និងសុវត្ថិភាពចរាចរណ៍ និងជានាយកកម្មវិធីរបស់មូលនិធិសុវត្ថិភាពអន្តរជាតិ (ISF) ប្រចាំកម្ពុជា និងតំបន់គោលដៅអាស៊ី មានប្រសាសន៍ថា កន្លងមក ស្ថាប័នរបស់លោក ធ្លាប់បានចូលរួមផ្តល់ការប្រឹក្សាយោបល់ជាហូរហែមកដែរនៅក្នុងកម្រិតបច្ចេកទេស សម្រាប់ការវិនិយោគផ្លូវជាតិលេខ៤ និងផ្លូវជាតិផ្សេងៗទៀតជាមួយក្រសួង។
លោកមានសុទិដ្ឋិនិយមថា ប្រសិនបើផ្លូវជាតិនេះប្រសូតចេញមក ដោយអនុវត្តតាមស្តង់ដារដូចបានគ្រោងទុក នោះនឹងនាំផលចំណេញផ្នែកសេដ្ឋកិច្ចខ្ពស់សម្រាប់កម្ពុជា។
លោកបន្ថែមថា ក្នុងមួយឆ្នាំៗ រដ្ឋាភិបាលត្រូវខាតបង់លុយប្រមាណជាង៤០០លានដុល្លារ ព្រោះតែកែលម្អគុណភាពផ្លូវដែលមិនល្អ និងឈានទៅដល់ការបាត់បង់ជីវិតនិងពិការភាពរបស់អ្នកដំណើរដែលបណ្តាលមកគ្រោះថ្នាក់ចរាចរណ៍ផងដែរ។
លោកបន្តថា៖ «បើយើងសន្សំលុយបានពីផ្លូវជាតិលេខ៤ហ្នឹងមួយ ត្រឹមតែ១០០លានដុល្លារចុះក្នុងមួយឆ្នាំ ដូច្នេះមួយឆ្នាំយើងចំណេញលុយបាន១០០លានដុល្លារបាត់ហើយ។ អ៊ីចឹងអ្វីដែលរដ្ឋាភិបាលចំណាយថវិកា១០០លានដុល្លារអាមេរិកនេះ ត្រឹមតែរយៈពេល១ឆ្នាំទេ អ៊ីចឹងចំណេញមកវិញបាត់ហើយ។ អ៊ីចឹងទេ បើ២០ឆ្នាំទៀត យើងនឹងចំណេញ១៩០លានដុល្លារទៀតរត់មុខបាត់ហើយដែលចំណេញ។ ការដែលពង្រីកថវិកាសម្រាប់កិច្ចការងារសុវត្ថិភាពចរាចរណ៍ មិនមែនជាការចំណាយឥតប្រយោជន៍ទេ ប៉ុន្តែជាការវិនិយោគដែលទទួលបានផលចំណេញដ៏ច្រើនលើសលប់»។
បើតាមមន្រ្តីអ្នកនាំពាក្យក្រសួងសាធារណការ ក្រៅពីការពង្រីកផ្លូវជាតិលេខ៤នេះ រដ្ឋាភិបាលនៅមានផ្លូវល្បឿនលឿនមួយខ្សែទៀតតភ្ជាប់ពីរាជធានីភ្នំពេញទៅខេត្តព្រះសីហនុ ដែលកំពុងដាក់ឱ្យសាងសង់។
របាយការណ៍សង្ខេបពីមន្ត្រីដដែលនេះឱ្យដឹងទៀតថា គិតត្រឹមសប្តាហ៍ទី២ ខែឧសភានេះ ផ្លូវល្បឿនលឿនសាងសង់បានប្រមាណ៥០ភាគរយ (៤៩,៩១%) ហើយ ហើយគ្រោងនឹងបញ្ចប់ជាស្ថាពរនៅខែមីនា ឆ្នាំ២០២៣៕
