ថ្ងៃសុក្រ ៦កើត ខែផល្គុន ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៩ ខែមីនា ឆ្នាំ២០២១ នៅទីស្តីការក្រសួង ឯកឧត្តម សួន រចនា រដ្ឋលេខាធិកាក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ ដោយមានការចូលរួមពីថ្នាក់ដឹកនាំក្រសួង សមាជិកសមាជិកាគណៈកម្មការ អង្គភាពជំនាញពាក់ព័ន្ធក្រោមឱវាទក្រសួង និងភាគីពាក់ព័ន្ធផងដែរ។ កិច្ចប្រជុំនេះធ្វើឡើងក្នុងគោលបំណងពិភាក្សាលើការធ្វើប្រតិភូកម្ម និងការផ្ទេរមុខងារទៅឱ្យទៅរដ្ឋបាលថ្នាក់ក្រោមជាតិ ដែលធានាអាចគ្រប់គ្រង បែបប្រព័ន្ធអេកូឡូស៊ី សម្រាប់ការផ្តល់សេវា លឿនរហ័ស ជម្រើសសំបូរបែប កាត់បន្ថយចំណាយ និងមានតម្លាភាពជូនប្រជាពលរដ្ឋជាមួយនឹងការទទួលខុសត្រូវខ្ពស់ ឆ្លើយតបនឹងគោលនយោបាយរបស់រាជរដ្ឋាភិបាល។ គួរកត់សម្គាល់ថា៖ ក្រសួងសាធារណការ និងដឹកជញ្ជូន បាននិងកំពុងអនុវត្ត ការផ្ទេរមុខងារ និងប្រតិភូកម្មការងារទៅរដ្ឋបាលថ្នាក់ក្រោមជាតិសម្រេចបានជោគជ័យ ក្រោមកិច្ចសហការ និងការគាំទ្រពីគ្រប់ភាគីពាក់ព័ន្ធទាំងអស់ ដោយក្នុងនោះក្រសួងបានរៀបចំប្រព័ន្ធស្វ័យប្រវត្តិកម្មផ្តល់សេវា ដែលដើរតួនាទីយ៉ាងសំខាន់ក្នុងការសម្រួលដល់ការគ្រប់គ្រង និងប្រមូលចំណូល ដែលអនុញ្ញាតឱ្យរដ្ឋបាលថ្នាក់ក្រោមជាតិ មានលទ្ធភាពក្នុងការតាមដាន និងកត់ត្រាចំណូល ការផ្ដល់សេវាសាធារណៈ ប្រកបដោយប្រសិទ្ធភាព តម្លាភាព និងគណនេយ្យភាព។ ក្នុងដំណាក់ការនៃការធ្វើប្រតិភូកម្ម និងផ្ទេរមុខងារនេះ ក្រៅពីលក្ខខណ្ឌអំណោយផលនៃគំនិតផ្តួចផ្តើមគ្រប់គ្រងតាមបច្ចេកវិទ្យាទំនើប ក៏មានបញ្ហាប្រឈមមួយចំនួនដែលត្រូវលើកយកមកពិភាក្សា ដើម្បីរៀបចំដាក់ចេញនូវគោលការណ៍ ជាមូលដ្ឋានដោះស្រាយ ក្នុងនាមជាក្រសួងជំនាញអាណាបក្យដើមខ្សែ ដែលទទួលខុសត្រូវលើគោលនយោបាយ និងការគ្រប់គ្រង ក្នុងវិស័យសាធារណការ និងដឹកជញ្ជូន ដោយទំនួលខុសត្រូវខ្ពស់បំផុត។ ភាពជោគជ័យ និងប្រសិទ្ធភាពនៃការអនុវត្តមុខងារ ដែលបានផ្ទេរទៅឱ្យរដ្ឋបាលថ្នាក់ក្រោមជាតិ គឺអាស្រ័យលើកិច្ចខិតខំប្រឹងប្រែងរួមគ្នារបស់គ្រប់ភាគីពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិ ជាមួយគំនិតច្នៃប្រឌិត ភាពម្ចាស់ទៅតាមតួនាទីភារកិច្ចរៀងៗខ្លួន៕