[BTV] - វិទ្យាស្ថានដំបូងគេបង្អស់នៅកម្ពុជា ផ្នែកសាធារណការ និងដឹកជញ្ជូន ជ្រើសរើសនិស្សិត ២០០នាក់
2021-02-22
ទៅកាន់ទំព័រចុះផ្សាយក្នុង BTV
ភ្នំពេញ៖ វិទ្យាស្ថានតេជោសែនសាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន ប្រកាសជ្រើសរើស និស្សិតជំនាន់ទី១ ចំនួន ២០០នាក់ ចូលរៀនថ្នាក់បរិញ្ញាបត្រ និងបរិញ្ញាបត្រ +១ (វិស្វករ) សម្រាប់ឆ្នាំសិក្សា ២០២១–២០២២។
នៅព្រឹកថ្ងៃ ២១ កុម្ភៈ ឆ្នាំ២០២១ វិទ្យាស្ថានដំបូងគេបង្អស់នៅកម្ពុជា ផ្នែកសាធារណការ និងដឹកជញ្ជូន បានរៀបចំកម្មវិធី តម្រង់ទិសជំនាញសិក្សា និងការងារ បើកទូលាយឲ្យសិស្សនិស្សិត អាចជួបផ្ទាល់ជាមួយ ឯកឧត្ដមទេសរដ្ឋមន្ត្រី ឯកឧត្តម លោកជំទាវ ជាថ្នាក់ដឹកនាំ ដើម្បីទស្សនាវិទ្យាស្ថាន សិក្សាស្វែងយល់ពីមុខជំនាញ និងឱកាសការងារក្រោយបញ្ចប់ការសិក្សានៅវិទ្យាស្ថានតេជោសែនសាធារណការ និងដឹកជញ្ជូន។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា និស្សិតនឹងទទួលបានអត្ថប្រយោជន៍ច្រើន ទាំងអំឡុងពេលសិក្សា និងនៅពេលបញ្ចប់ការសិក្សានៅទីនេះ។
វិទ្យាស្ថាននេះ មានកម្រិតបរិញ្ញាបត្រ+១ (វិស្វករ) សិក្សា ៥ឆ្នាំ លើជំនាញ ១-វិស្វករសំណង់ សាធារណការ ឯកទេស (ក-សំណង់ផ្លូវថ្នល់ ផ្លូវល្បឿនលឿនស្ពាន ផ្លូវដែក និងកំពង់ផែ ខ-ប្រព័ន្ធចម្រោះទឹកកខ្វក់) ២-បរិញ្ញាបត្រដឹកជញ្ជូនផ្លូវគោក សិក្សា ៤ឆ្នាំ ឯកទេស សេដ្ឋកិច្ច និងគ្រប់គ្រងដឹកជញ្ជូនផ្លូវគោក ៣-បរិញ្ញាបត្រភស្តុភារកម្ម សិក្សា ៤ឆ្នាំ ឯកទេស គ្រប់គ្រង់ភស្តុភារកម្ម និងខ្សែច្រវ៉ាក់ផ្គត់ផ្គង់ ៤– បរិញ្ញាបត្រនាវាចរ សិក្សា ៤ឆ្នាំ ឯកទេស បរិបាលនាវា និងម៉ាស៊ីននាវា។ ថ្ងៃបើកទទួលពាក្យប្រឡងចូលរៀនចាប់ពីថ្ងៃទី ២១ រហូតត្រឹមថ្ងៃ ២៨ កុម្ភះ ២០២១ វេលាម៉ោង ៥ ល្ងាច។
សូមបញ្ជាក់ថា វិទ្យាស្ថាននេះ ត្រូវបានសម្ពោធដាក់ឲ្យប្រើប្រាស់ជាផ្លូវការ ក្រោមអធិបតីភាពដ៏ ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២២ ខែមករា ឆ្នាំ ២០២១ កន្លងទៅ៕
