ឯកឧត្តមទេសរដ្ឋមន្ត្រី ស៊ុន ចាន់ថុល កើតនៅឆ្នាំ ១៩៥៦ មាន​កំណើត​​ជាអ្នក​នៅ​ស្រុក​កោះធំ ខេត្ត​កណ្ដាល ខណៈពេលនេះលោកបានកាន់តំណែងជារដ្ឋមន្ត្រីក្រសួងសាធារណការជាថ្មីជិត ៥ ឆ្នាំហើយ ដោយគិតចាប់តាំងពីថ្ងៃទី ៦ មេសាឆ្នាំ ២០១៦​។ បន្ទាប់ពីឡើងកាន់តំណែងភ្លាម រដ្ឋមន្ត្រីល្បីខាងទំនើបកម្មបច្ចេកវិទ្យារូបនេះ បានធ្វើកំណែទម្រង់លើការផ្ដល់សេវាកម្មសាធារណៈតាមប្រព័ន្ធស្វ័យប្រវត្តិកម្មជាច្រើន ដែលពិតជាសម្រួលដល់អ្នកប្រើប្រាស់។ តាមពិតទៅមុនឈានជើងចូលប្រទេសកម្ពុជាវិញឯកឧត្តមទេសរដ្ឋមន្រ្តីស៊ុនចាន់ថុល ឆ្លងកាត់ការសិក្សាយ៉ាងជោគជ័យលើទឹកដីសហរដ្ឋអាមេរិកព្រមទាំងឈ្មោះបំពេញការងារធំៗជាច្រើននៅទីនោះផងដែរ។ មុនក្លាយជារដ្ឋមន្រ្ដីល្បីឈ្មោះដូចសព្វថ្ងៃ ឯកឧត្ដម ស៊ុន ចាន់​ថុល មានប្រវត្តិចូរចត់ មិនខុសពីពលរដ្ឋខ្មែរទូទៅឡើយ​ ពោលគឺលោកបានចាក​ចេញ​ពី​ប្រទេស​កម្ពុជាតាំ​ង​ពី​ក្មេង គឺ​ក្នុង​ឆ្នាំ ១៩៧៣ ខណៈ​ពេល​ដែល​ប្រទេស​ធ្លាក់​ចូល​ក្នុងមហ​ន្តរាយ​នៃ​យុគ​សម័យ​សង្គ្រាម​ស៊ី​វិល​ និង​ការ​បំផ្លិច​បំផ្លាញ​ ។ ជា​មួយ​ប្រាក់​ក្នុង​ហោ​ប៉ៅ៥០ ដុល្លារ និង​គ្មាន​ជំនាញ​ភា​សា​អង់​គ្លេស​ លោក ស៊ុន ចាន់​ថុល បាន​ចំណាយ​ពេល​ជាច្រើន​ឆ្នាំ នៅ Maryland សហ​រដ្ឋ​អាមេរិក សិក្សា​ភា​សា​អង់​គ្លេស​ផង និង​រក​ប្រាក់​ផ្គត់​ផ្គង់​ការ​សិក្សា​ផង​ តាម​រយៈ​ការ​លាង​ចាន​នៅ​ភោជ​នីយ​ដ្ឋាន​នៅ​ពេលលរាត្រី យ៉ាងតស៊ូជាទីបំផុត។​ នេះមិនមែនជាសុបិន ដោយសារតែសេចក្ដីព្យាយាម និងការតស៊ូយ៉ាងមុតមាំ ធ្វើឱ្យលោកស៊ុន ចាន់ថុល បាន​ទទួល​អាហារូប​ករណ៍ ហើយបានបញ្ចប់បរិញ្ញាប័ត្រវិទ្យាសាស្ត្រផ្នែកគ្រប់គ្រងពាណិជ្ជកម្មពីសាកលវិទ្យាល័យអាមេរិក ឆ្នាំ១៩៧៨។ ជាឱកាស លោក​វិល​ត្រឡប់​មក​ប្រទេស​កម្ពុជា​វិញ ដោយចាប់ពីឆ្នាំ ១៩៩៤ ដល់ ឆ្នាំ ១៩៩៧ បានបម្រើការជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជាដែលជា​ស្ថាប័ន​ ទទួល​បន្ទុក​កិច្ចការ​វិនិយោគ​ពី​បរទេស​ដោយ​ផ្ទាល់។ បន្ទាប់មក លោក​បាន​ត្រឡប់​មក​វិស័យ​ឯកជន​វិញ ដោយ​ចូលរួម​កម្មវិធី​គ្រប់គ្រង​ជាន់​ខ្ពស់ នៅ​សាកលវិទ្យាល័យ Wharton ក្នុង​រដ្ឋ​ Pennsylvania នៅ​ឆ្នាំ ១៩៩៧ និង​ទទួល​សញ្ញាបត្រ​រដ្ឋបាល​សាធារណៈ​ថ្នាក់​អនុបណ្ឌិត ពី​សាកលវិទ្យាល័យ​ Havard ក្នុង​ឆ្នាំ ១៩៩៩​ ហើយនៅក្នុងឆ្នាំនេះផ្ទាល់ ​លោក​ក៏បាន​ត្រឡប់​មក​កាន់​ប្រទេស​កម្ពុជា សារ​ជា​ថ្មី​ម្ដង​ទៀត ហើយ​បាន​បង្កើត​ក្រុមហ៊ុន​ពាណិជ្ជកម្ម និង​វិនិយោគ​ផ្ទាល់​ខ្លួន​។ នេះជាប្រវត្តិការងាររបស់ការងាររបស់លោក ដែលបានកសាងស្នាដៃជាច្រើនលើទឹកដីកម្ពុជា៖ -ចាប់ពីឆ្នាំ ១៩៩៤ ដល់ ឆ្នាំ ១៩៩៧ បានបម្រើការជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា -ចាប់ពីឆ្នាំ ១៩៩៩ ដល់ ឆ្នាំ ២០០៣ បានបម្រើការជាទីប្រឹក្សាសេដ្ឋកិច្ច និងហិរញ្ញវត្ថុប្រធានសភាជាតិ -ចាប់ពីឆ្នាំ២០០៤ ដល់ ឆ្នាំ២០០៨ បានបម្រើការជារដ្ឋមន្ត្រីក្រសួងសាធារណៈការ និងដឹកជញ្ជូន -ចាប់ពីឆ្នាំ២០០៨ ដល់ ឆ្នាំ ២០១៣ បានបម្រើការជាទេសរដ្ឋមន្ត្រី និងអនុប្រធានក្រុមប្រឹក្សាអភិវឌ្ឍន៍កម្ពុជា -ចាប់ពីឆ្នាំ២០១៣ ដល់ ខែមេសា ឆ្នាំ ២០១៦ បានបម្រើការជាទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាអនុប្រធានក្រុមប្រឹក្សាអភិវឌ្ឍន៍កម្ពុជា (CDC) -ចាប់ពីខែកញ្ញាឆ្នាំ២០១៨ រហូតដល់បច្ចុប្បន្ន បានបម្រើការជាទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន សកម្មភាពវិជ្ជាជីវៈផ្សេងទៀត -បានជាប់ឆ្នោតជាអ្នកដឹកនាំពិភពលោកថ្ងៃស្អែក Global Leader of tomorrow នៃវេទិកាសេដ្ឋកិច្ចពិភពលោកក្នុងឆ្នាំ១៩៩៥ -សមាជិកក្រុមប្រឹក្សាប្រតិបត្តិនៃ Wharton Asianតាំងពីឆ្នាំ ២០០២ -ប្រធានក្រុមប្រឹក្សាប្រតិបត្តិនៃ Wharton Asian ចាប់ពីឆ្នាំ២០០៩ ដល់ ឆ្នាំ២០១៣ -ប្រធានសហព័ន្ធកីឡាហែលទឹកកម្ពុជា រីឯបញ្ហាប្រឈម ក្នុងនាមជារដ្ឋមន្ត្រី -ធ្វើឲ្យប្រសើរដល់ការដឹកជញ្ជូន និងហេដ្ឋរចនាសម្ព័ន្ធ និង ទាក់ទាញការវិនិយោគផ្ទាល់ពីបរទេសលើវិស័យនេះ -ធ្វើកំណែទម្រង់ឲ្យមានប្រសិទ្ធភាពក្នុងការចេញប័ណ្ណបើកបរថ្មីព្រមទាំងការផ្លាស់ប្តូរយកប័ណ្ណបើកបរថ្មី -ធ្វើឲ្យប្រសើរឡើងដល់ដំណើរការចុះបញ្ជីយានយន្ត -បង្កើនសុវត្ថិភាពចរាចរណ៍តាមរយៈការធ្វើឲ្យប្រសើរឡើងដល់ចំនួននៃការត្រួតពិនិត្យយានយន្ត៕