កាលពីថ្ងៃទី៤ ខែកញ្ញា ឆ្នាំ២០២០ នៅក្នុងកិច្ចប្រជុំគណៈរដ្ឋមន្ត្រី សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសផ្តល់កញ្ចប់ថវិកា ១៥០លានដុល្លារអាមេរិក សម្រាប់អភិវឌ្ឍន៍កសាងផ្លូវ ៣៨ខ្សែ មានប្រវែង ១០៨ ,៧៤គីឡូម៉ែត្រ នៅក្នុងក្រុងសៀមរាប ខេត្តសៀមរាប ជាមួយនឹងកញ្ចប់ថវិកានេះ ក៏មានគម្រោងកែលម្អស្ទឹងសៀមរាបផងដែរ ក្នុងការលើកកម្ពស់ សោភ័ណ្ឌភាពក្រុងសៀមរាបឱ្យក្លាយជាទីក្រុងឆ្លាតវៃក្នុងពេលអនាគត ក៏ដូចជាការទាក់ទាញ ភ្ញៀវទេសចរជាតិ អន្តរជាតិ ក្នុងការលើកស្ទួយដល់ជីវភាពរស់នៅរបស់ប្រជាពលរដ្ឋ ព្រមទាំង ជួយជំរុញដល់កំណើនសេដ្ឋកិច្ចជាតិនៅក្រោយជំងឺកូវីដ-១៩។ បន្ទាប់ពីប្រកាសបើកការដ្ឋានសាងសង់ផ្លូវ ៣៨ខ្សែ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រុមការងារបច្ចេកទេសបាននឹងកំពុងមមាញឹកក្នុងការសាងសង់ គិតត្រឹមថ្ងៃនេះ ការសាងសង់ទាំង ៣៨ខ្សែ បានប្រមាណ ១៧,៥% ដែលមានអង្គភាពអនុវត្តគម្រោងចំនួន ៦ រួមមាន៖ -នាយកដ្ឋានគ្រឿងចក្រនិងស្ថាបនាផ្លូវសាងសង់ផ្លូវចំនួន ៥ខ្សែ -នាយកដ្ឋានជួសជុល និងថែទាំផ្លូវថ្នល់ចំនួន ៤.៥ខ្សែ -មន្ទីរសាធារណការ និងដឹកជញ្ជូនខេត្តសៀមរាបចំនួន ១.៥ខ្សែ -កងវិស្វកម្មតេជោ ហ៊ុន សែន សៀមរាប ចំនួន ៨ខ្សែ -កងវិស្វកម្ម១៧៨ស្ពាន-ថ្នល់ នៃក្រសួងការពារជាតិចំនួន ១៣ខ្សែ -កងវិស្វកម្មសម្តេចតេជោខេត្តសៀមរាប ចំនួន ៦ខ្សែ ជាមួយនឹងការសាងសង់ផ្លូវ ៣៨ខ្សែនេះ ក្រសួងសាធារណការនិងដឹកជញ្ជូន ដែលមានអគ្គនាយកដ្ឋានសាធារណការត្រូវបំពាក់កាមេរ៉ាសុវត្ថិភាព ការដាំដើមឈើលម្អតាមដងផ្លូវ បំពាក់អំពូលភ្លើងបំភ្លឺសាធារណៈ បំពាក់បរិក្ខាចរាចរណ៍ និងភ្លើងសញ្ញាចរាចរណ៍ទាំង ៣៨ខ្សែ ដែលមានរយៈពេល ១៣ខែ។ ទន្ទឹមនឹងការសាងសង់ផ្លូវទាំង ៣៨ខ្សែខាងលើ រដ្ឋបាលខេត្តសូមធ្វើការយោគយល់ចំពោះសាធារណជន និងបងប្អូនប្រជាពលរដ្ឋចំពោះការកកស្ទះចរាចរណ៍ និងមានផលពិបាកមួយចំនួនដែលបង្កឡើងដោយសារការសាងសង់ផ្លូវនេះ។ រដ្ឋបាលខេត្តសង្ឃឹមយ៉ាងមុតមាំថាសាធារណជននិងបងប្អូនប្រជាពលរដ្ឋមានការយោគយល់ខ្ពស់ និងចូលរួមក្នុងការអភិវឌ្ឍផ្លូវខាងលើនេះ៕