[Hello Phnom Penh News] - ក្រសួងការពារជាតិ ជំរុញឱ្យម្ចាស់រថយន្តដែលជ្រកក្រោមស្លាកលេខ ខ.ម គួរផ្លាស់ប្ដូរទៅប្រើស្លាកលេខធម្មតាវិញ
ភ្នំពេញ៖ ក្រសួងការពារជាតិ ជំរុញឱ្យម្ចាស់រថយន្តដែលជ្រកក្រោមស្លាកលេខ ខ.ម គួរផ្លាស់ប្ដូរទៅប្រើស្លាកលេខធម្មតាវិញ ដើម្បីចៀសវាងការបង្កឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់ក្រសួង ខណៈអគ្គនាយកដ្ឋានពន្ធដារបានតម្រូវឱ្យម្ចាស់រថយន្ត ដែលពាក់ស្លាកលេខរដ្ឋ និងស្លាកលេខ ខ.ម ត្រូវចូលទៅបង់ពន្ធជូនរដ្ឋផងដែរ ។
លោកឈុំ សុជាត អ្នកនាំពាក្យក្រសួងការពារជាតិ បានថ្លែងកាលពីម្សិលមិញថា ជាទូទៅរថយន្តដែលជាកម្មសិទ្ធិឯកជន ទោះជ្រកក្រោមស្លាកលេខ ខ.ម ស្លាកលេខ រដ្ឋ ឬស្លាកលេខអ្វីក៏ដោយ គឺមិនអាចគេចវេះពីការបង់ពន្ធជូនរដ្ឋបានទេ បើពុំនោះទេ នឹងត្រូវប្រឈមការពិន័យទោសទណ្ឌទៅតាមច្បាប់។
អ្នកនាំពាក្យក្រសួងការពារជាតិ បញ្ជាក់ថា៖ «ការបង់ពន្ធជាបន្ទុករបស់រដ្ឋ ចំពោះតែរថយន្តដែលបានចុះក្នុងបញ្ជីសារពើភណ្ឌរបស់រដ្ឋ ដែលត្រូវបានប្រើប្រាស់ក្នុងក្របខ័ណ្ឌក្រសួង និងស្ថាប័នរដ្ឋប៉ុណ្ណោះ។ ចំពោះរថយន្តកម្មសិទ្ធិឯកជន ទោះជ្រកក្រោមស្លាកលេខអ្វីក៏ដោយ គឺត្រូវទទួលកាតព្វកិច្ចបង់ពន្ធជូនរដ្ឋ ដោយសាមីកម្មសិទ្ធិផ្ទាល់»។
ជាមួយគ្នានេះបានជំរុញឱ្យម្ចាស់រថយន្តកម្មសិទ្ធិឯកជនដែលជ្រកក្រោមស្លាកលេខ ខ.ម រដ្ឋ និងស្លាកលេខ ន.ប គួរធ្វើការផ្លាស់ប្ដូរមកប្រើប្រាស់ស្លាកលេខធម្មតា ឬស្លាកលេខ ពិសេសដែលចេញដោយក្រសួងសាធារណការ និងដឹកជញ្ជូនវិញ ដើម្បីចៀសវាងការបង្កឱ្យមានបាតុភាពផ្សេងៗដែលអាចធ្វើឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់ក្រសួង និងស្ថាប័នរដ្ឋ។
យោងតាមលិខិតរបស់អគ្គនាយកនៃអគ្គនាយកដ្ឋានពន្ធដា រចុះថ្ងៃទី ២៥ ខែមករា ឆ្នាំ២០២១ បានបញ្ជាក់ថា រថយន្តពាក់ស្លាកលេខ ខ.ម ដែលបានចុះក្នុងបញ្ជីសារពើភណ្ឌរបស់រដ្ឋ គ្រប់គ្រងដោយក្រសួងការពារជាតិ សរុបចំនួន ៦៣៧៤គ្រឿង ក្នុងនោះ រថយន្តប្រភេទទេសចរណ៍សរុបចំនួន ៥ ៨៣៨
គ្រឿង [ពណ៌ត្រេអ៊ី ចំនួន ៥ ២៩៣ គ្រឿង និងពណ៌ចម្រុះចំនួន ៥៤៥ គ្រឿង] រថយន្តប្រភេទបែន ចំនួន ១២ គ្រឿង រថយន្តប្រភេទដឹកទំនិញ ចំនួន ១ គ្រឿង រថយន្តប្រភេទក្បាលសណ្តោងរ៉ឺម៉ក ចំនួន ៣ គ្រឿង និងរថយន្តជំនួយពីប្រទេសកូរ៉េ ប្រទេសចិន វៀតណាម និងពីលោកនាយករដ្ឋមន្ត្រី ហ៊ុន សែន សរុបចំនួន ៥២០ គ្រឿង៕
