ភ្នំពេញ ថ្ងៃទី២០ ខែមករា ឆ្នាំ២០២១ -- ដោយអនុវត្តន៍តាមការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ ដែលបានបញ្ជាឱ្យអង្គភាពលូទឹក បូមទឹក នៃមន្ទីរសាធារណការ និងដឹកជញ្ជូនរាជធានីភ្នំពេញធ្វើការស្ដារប្រព័ន្ធលូចំនួន ២០ខ្សែ នៅកណ្ដាល និងនៅជាយរាជធានីភ្នំពេញ គិតមកដល់ពេលនេះបានបញ្ចប់ជាស្ថាពរហើយ ដើម្បីសម្រួលប្រព័ន្ធផ្លូវទឹកហូរ ចៀសវាងការជន់លិចផ្លូវ និងលំនៅឋានប្រជាពលរដ្ឋនៅរដូវវស្សាខាងមុខនេះ។ លោក ដួង ចាន់សារ៉ាត់ ប្រធានអង្គភាពលូទឹក បូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញ បានឱ្យដឹងនៅព្រឹកថ្ងៃ៦កើត ខែមាឃ ឆ្នជូត ទោស័ក ព.ស.២៥៦៤ ត្រូវនឹងថ្ងៃអង្គារ ទី១៩ ខែមករា ឆ្នាំ២០២១ថា ចាប់តាំងពីខែកក្កដា ឆ្នាំ២០២០មក ក្រុមការងារអង្គភាពលូទឹកបូមទឹក នៃមន្ទីរសាធារណការ និងដឹកជញ្ជូនរាជធានីភ្នំពេញ ក្រោយពីមានការណែនាំពីéឯកឧត្តម ឃួង ស្រេង អភិបាលនៃគណៈអភិបាលភ្នំពេញ អង្គភាពលូទឹកបូមទឹកបានធ្វើការស្ដារលូចំនួន២០ខ្សែនៅក្នុង និងជាយ រាជធានីភ្នំពេញ។ ដើម្បីបើកមុខទឹករំដោះទឹកភ្លៀងនៅរដូវវស្សាខាងនេះឱ្យបានល្អប្រសើរចៀសវាងនូវការលិចលង់លំនៅឋានរបស់បងប្អូនប្រជាពលរដ្ឋក្នុងខណ្ឌចំនួន៨ក្នុងរាជធានីភ្នំពេញ។ ដែលក្នុងនោះមានខណ្ឌចំនួន ៥នៅកណ្ដាលក្រុង និងខណ្ឌ៣ទៀតនៅជាយក្រុង គឺខណ្ឌសែនសុខ ខណ្ឌពោធិ៍សែនជ័យ និងខណ្ឌមានជ័យ។ លោកបានបញ្ជាក់ផងដែរថា មកដល់ពេលនេះក្រុមការងារស្ដារ ប្រព័ន្ធលូទាំង២០ខ្សែនេះបានបញ្ចប់ការងាររបស់ខ្លួនជាស្ថាពរហើយ ។ ក្រៅពីនេះក្រុមការងារក៏បានធ្វើសកម្មភាពលើការជួសជុលគម្របលូ អណ្ដូងលូដែលបាក់ខូចខាតផងដែរ។ បើទោះបីគម្របលូខ្លះត្រូវកប់ក្នុងដីនិងធ្លាក់ចូលលូក្តី ក៏ក្រុមការងាររុករកនិងធ្វើការជួសជុលឡើងវិញរួចរាល់ហើយដែរ។ ពាក់ព័ន្ធនឹងការស្ដារប្រព័ន្ធលូ ក្នុងរាជធានីភ្នំពេញនេះ លោកដួង ចាន់សារ៉ាត់ ក៏បានឱ្យដឹងថា សម្រាប់ឆ្នាំ២០២១នេះ យើងមិនទាន់មានគម្រោងក្នុងការស្តារប្រព័ន្ធលូ បន្តទៀតនោះទេ។ ទោះបីជាមានការស្តារប្រព័ន្ធលូរួចរាល់យ៉ាងណាក្តី ប៉ុន្តែលោកនៅតែស្នើសុំឱ្យបងប្អូនប្រជាពលរដ្ឋចូលរួមសហការ ក្នុងការកាយសំរាមចេញពីមុខ ឬមាត់លូពេលមានភ្លៀងធ្លាក់ម្តងៗ និងចៀសវាងឱ្យបាននូវការបិទមាត់លូ ព្រោះតែខ្លាចមានក្លិនស្អុយ ដែលនេះជាទម្លាប់មិនល្អ និងធ្វើឱ្យមានការលិចលង់ផ្លូវ និងលំនៅឋាន ៕