អភិបាលខេត្តកែប លោក សោម ពិសិដ្ឋ បានប្រកាសនៅសប្តាហ៍នេះថាការងារជួសជុលផ្លូវក្រាលគ្រួសក្រហមចំនួន ១ ខ្សែ និងស្ថាបនាផ្លូវកៅស៊ូ DBST ចំនួន ៧ ខ្សែ នៅក្នុងខេត្តបានចាប់ផ្ដើមជាផ្លូវការ។ លោកថ្លែងថាការស្តារផ្លូវថ្នល់ឡើងវិញគឺជាសមិទ្ធផលថ្មីមួយក្នុងការអភិវឌ្ឍន៍ហេដ្ឋារចនាសម្ព័ន្ធខេត្ត។ នៅពេលដែលការងារទាំងនេះបញ្ចប់ វានឹងជួយសម្រួលដល់ការធ្វើដំណើរទាំងប្រជាជនក្នុងតំបន់និងភ្ញៀវទេសចរ។ ជាមួយគ្នានេះផងដែរ លោកក៏បានសំណូមពរដល់ប្រជាពលរដ្ឋឱ្យចូលរួមសហការជាមួយក្រុមការងារសាងសង់ ជាពិសេសបងប្អូនដែលអាចនឹងរងផលប៉ះពាល់ដោយសារគម្រោងនេះ។ គួរបញ្ជាក់ឱ្យដឹងផងដែរថា ខេត្តកែបគឺជាខេត្តមួយដែលមានសក្តានុពលខ្ពស់របស់ប្រទេស ហើយបាននិងកំពុងទាក់ទាញគម្រោងអភិវឌ្ឍន៍ជាច្រើន។ រដ្ឋបាលខេត្តកែបកាលពីពេលថ្មីៗនេះក៏បានបង្ហាញពីផែនការសាងសង់កំពង់ផែសមុទ្រទេសចរណ៍ថ្មីមួយនៅលើកោះទន្សាយ និងការបង្កើតឆ្នេរចំនួនពីរទីតាំងផងដែរ។ អនុរដ្ឋលេខាធិការ ក្រសួងទេសចរណ៍ លោក នី ផល្លី បានថ្លែងនៅក្នុងកិច្ចប្រជុំស្តីពីសេចក្តីព្រាងបឋមនៃផែនការមេសម្រាប់ការអភិវឌ្ឍវិស័យទេសចរណ៍នៅខេត្តកែបថាគម្រោងនេះនឹងផ្តោតលើការកែលំអផលិតផលទេសចរណ៍ ដោយសង្ឃឹមថាការអភិវឌ្ឍនិងបង្កើនការទាក់ទាញទេសចរណ៍នឹងពង្រីកដល់ការទស្សនារបស់ភ្ញៀវទេសចរបន្ថែមទៀត។ លោកបន្ថែមថាផែនការធានានូវនិរន្តរភាពនៃការអភិវឌ្ឍន៍ និងធនធានធម្មជាតិ ហើយការរៀបចំដីធ្លី ផែនការទីក្រុង និងកាកសំណង់នឹងជួយដល់កំណើនសេដ្ឋកិច្ចក្នុងមូលដ្ឋាន។ លោកអភិបាលក៏បានគាំទ្រយ៉ាងខ្លាំងដល់រាជរដ្ឋាភិបាលកម្ពុជា ក្រសួងទេសចរណ៍ និងគណៈកម្មាធិការអន្តរក្រសួងក្នុងការបន្ថែមខេត្តចំនួនពីរ (ខេត្តកែប និងមណ្ឌលគីរី) ទៅក្នុងបញ្ជីទិសដៅទេសចរណ៍ដែលបានកំណត់សម្រាប់ប្រទេសកម្ពុជា។ លោកក៏បានជំរុញឱ្យក្រុមអភិវឌ្ឍន៍បច្ចេកទេសទេសចរណ៍របស់ខេត្តកែបខិតខំប្រឹងប្រែងដើម្បីកំណត់បញ្ហាប្រឈមនិងដំណោះស្រាយនាពេលអនាគតសម្រាប់ការដាក់បញ្ចូលទៅក្នុងផែនការមេទេសចរណ៍។ យោងតាមក្រសួងទេសចរណ៍ បន្ទាប់ពីមានការកែសំរួលនានានិងការយល់ព្រមពីរាជរដ្ឋាភិបាល ផែនការមេអភិវឌ្ឍន៍ទេសចរណ៍ខេត្តកែបនឹងត្រូវអនុវត្តចាប់ពីឆ្នាំ ២០២១ ដល់ឆ្នាំ ២០៣៥ ប៉ុន្តែអាចនឹងត្រូវបានពិនិត្យឡើងវិញនៅឆ្នាំបន្ទាប់។ ផែនការនេះរួមមានកំពង់ផែទេសចរណ៍និងការពង្រីកឆ្នេរចំនួនពីរបន្ថែមទៀត។ ទីតាំងគម្រោងពង្រីកឆ្នេរ រួមមានឆ្នេរសាធារណៈថ្មីចម្ងាយ ៣ គីឡូម៉ែត្រ (ពីស្ថានីយ៍ប្រព្រឹត្តិកម្មទឹកង្វក់ដល់ព្រៃកោងកាង) និងការពង្រីកឆ្នេរខ្សាច់ធម្មជាតិប្រវែង ៣ គីឡូម៉ែត្រកន្លះក្នុងស្រុកដំណាក់ចង្អើរ។ កំពង់ផែទេសចរណ៍តូចថ្មីនឹងមានទីតាំងស្ថិតនៅលើកោះទន្សាយ ហើយនឹងរួមបញ្ចូលទាំងការជិះខ្សែកាបសម្រាប់ភ្ញៀវទេសចរធ្វើដំណើរពីគោលដៅមួយទៅទិសដៅមួយផ្សេងទៀត៕