បច្ចុប្បន្ន គម្រោងកំពង់ផែទេសចរណ៍ថ្មីរបស់ខេត្តកំពត សម្រេចបានប្រមាណ ៥៥ ភាគរយហើយ តែ ការបញ្ចប់ការសាងសង់អាចនឹងយឺតជាងផែនការដែលធ្លាប់បានគ្រោងទុកដោយសារតែវិបត្តិ កូវីដ ១៩។ នេះបើតាមការបញ្ជាក់ពីក្រសួងសាធារណការ និងដឹកជញ្ជូន។ មែនទែនទៅ តាមការបញ្ជាក់ដដែលពីក្រសួងបានឲ្យដឹងថា ដើមឡើយកំពង់ផែមួយនេះគ្រោងនឹងបញ្ចប់ការសាងសង់នៅចុងឆ្នាំ ២០២១ តែដោយសារការរីករាលដាលនៃ កូវីដ១៩ បានធ្វើឲ្យមានការរាំងស្ទះក្នុងដំណើរការសាងសង់។ រីឯកាលបរិច្ឆេទបញ្ចប់ការងារសាងសង់ទាំងមូលនៃកំពង់ផែទេសចរណ៍នេះ នឹងប្ដូរទៅដើមឆ្នាំ ២០២២ វិញ។ លោក សយ ស៊ីណុល ប្រធានមន្ទីរទេសចរណ៍ខេត្តកំពតបានប្រាប់ឲ្យថា៖ «នៅពេលដែលទីតាំងកំពង់ផែបានបញ្ចប់និងដាក់ឱ្យដំណើរការសេវាកម្ម វានឹងចូលរួមចំណែកលើកកម្ពស់វិស័យទេសចរណ៍របស់ខេត្តជាពិសេសតាមរយៈកញ្ចប់ទេសចរណ៍ដែលភ្ជាប់ខេត្តកំពតជាមួយគោលដៅនៅប្រទេសវៀតណាមនិងថៃ»។ បន្ទាប់ពីសាងសង់រួចរាល់ជាផ្លូវការ និងដាក់ឲ្យដំណើរការកំពង់ផែសមុទ្រនេះត្រូវបានរំពឹងថានឹងផ្តល់សេវាទេសចរណ៍អន្តរជាតិនិងក្នុងស្រុកចំនួន ៣៦០ ០០០ នាក់ក្នុងមួយឆ្នាំ។ នេះបើយោងតាមរបាយការណ៍របស់ធនាគារអភិវឌ្ឍន៍អាស៊ីស្តីពីទេសចរណ៍នៃមហាអនុតំបន់ទន្លេមេគង្គ (GMS)។ កំពង់ផែនេះមានបណ្តោយ ៣០០ ម៉ែត្រនិងមានសមត្ថភាពអាចផ្ទុកនាវាដឹកអ្នកដំណើរបានពី ៣០០ ទៅ ៤០០ នាក់។ កំពង់ផែទេសចរណ៍អន្តរជាតិនេះ ក៏ផ្នែកមួយក្នុងការចូលរួមអភិវឌ្ឍន៍វិស័យទេសចរណ៍នៅខេត្ត កំពត ហើយបង្កើតឱកាសការងារ និងបង្កើនប្រាក់ចំណូលលើកកម្ពស់ជីវភាពរស់នៅរបស់ប្រជាពលរដ្ឋផងដែរ។ សូមបញ្ជាក់ ខេត្តកំពតមានកំពងផែចំនួន ៤ ដែលរួមមានដូច កំពង់ផែ វិញ ហួរ ដែលមានជម្រៅទឹករហូតដល់១៤ម៉ែត្រ អាចសម្រាប់ដឹកជញ្ជូនទំនិញតាមកប៉ាល់ធំៗ។ ទី២ កំពង់ផែរបស់ឧកញ៉ា ទ្រី ភាព សម្រាប់ដឹកជញ្ជូនប្រេងចូល។ ទី៣ កំពង់ផែរបស់ជំទាវ កែវ ម៉ាលី សម្រាប់ដឹកជញ្ជូននាំចេញស្រូវ និងផលិតផលផ្សេងៗចេញចូលប្រទេសថៃ និងទី៤ គម្រោងកំពង់ផែទេសចរណ៍អន្តរជាតិខេត្តកំពត ដែលបើកសម្រាប់ភ្ញៀវទេសចរបរទេសដែលធ្វើដំណើរតាមកប៉ាល់៕