ព្រះវិហារ៖ នៅព្រឹកថ្ងៃទី២៦ ខែមិថុនា ឆ្នាំ២០២០នេះ នៅបរិវេណសាលាស្រុករវៀង បានបើកកិច្ចប្រជុំផ្សព្វផ្សាយច្បាប់ចរាចរណ៍ផ្លូវគោកក្រោមប្រធានបទ “សុវត្ថិភាពចរាចរផ្តើមចេញពីខ្ញុំ” ក្រោមអធិបតីភាព លោកជំទាវ មិន ម៉ាណវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអគ្គលេខាធិការជាតិ សុវត្ថិភាពចរាចរណ៍ផ្លូវគោក និងឯកឧត្តម គោស៊ុំ ប៊ុនសឿត អភិបាលរងខេត្តព្រះវិហារ ព្រមទាំងមានការចូលរួមពីមន្ទីរ អង្គភាពពាក់ព័ន្ធ មន្ត្រីរាជការជុំវិញស្រុករវៀង ជាង100នាក់ផងដែរ។ លោ ហោ គឹមឡុង អនុប្រធានមន្ទីរសាធារណៈការ និងដឹកជញ្ជូនខេត្តព្រះវិហារ បានឲ្យដឹងថា ដើម្បីឆ្លើយតបទៅនឹងសកម្មភាព៨ចំនុច របស់គណៈកម្មាធិការសុវត្ថិភាពចរាចរផ្លូវគោក មន្ទីរ ក៏ដូចជាលេខាធិការដ្ឋានសុវត្ថិភាពចរាចរណ៍ផ្លូវគោកខេត្ត បានធ្វើការបើកវគ្គអប់រំផ្សព្វផ្សាយច្បាប់ចរាចរណ៍ផ្លូវគោកថ្មី ដល់មន្ត្រីរាជការ កងកម្លាំងប្រដាប់អាវុធទាំងបីប្រភេទ លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋនៅក្នុងខេត្តព្រះវិហារ ព្រមទាំងបានចែកសៀវភៅច្បាប់ និងខិត្តប័ណ្ណ ផ្ទាំងរូបសុវត្ថិភាពចរាចរណ៍នៅតាម ទីសាធារណៈ រួមទាំងបានចែកមួកសុវត្ថិភាពជិត ២០០មួក ដោយឥតគិតថ្លៃ ក្នុងគោលបំណងកាត់បន្ថយគ្រោះថ្នាក់ចរាចរណ៍ឲ្យនៅកម្រិតទាបបំផុត។ ឯកឧត្តម គោស៊ុំ ប៊ុនសឿត បានឲ្យដឹងថា ក្នុងនាមលេខាធិការដ្ឋានសុវត្ថិភាពចរាចរផ្លូវគោកខេត្ត បានសូមសំនូមពរដល់បងប្អូនអ្នកប្រើប្រាស់ផ្លូវទាំងអស់ សូមចូលរួមគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍ឲ្យនៅកម្រិត ទាបបំផុត និងដើម្បីធានានូវអាយុជីវិតរបស់បងប្អូផងដែរ។ លោក ជុំទាវ មិន ម៉ាណវី បានឲ្យដឹងថា រាជរដ្ឋាភិបាលបង្កើតការរឹតបណ្តឹងច្បាប់ចរាចរណ៍ផ្លូវគោក ក្នុងគោលបំណងការពារ និងកាត់បន្ថយគ្រោះថ្នាក់ចរាចរណ៍ ពីព្រោះគ្រោះថ្នាក់ចរាចរណ៍បណ្តាល៍បាត់បង់អាយុជីវិត និងខាតបង់ថវិកាផងដែរ។ លោកជុំទាវបានបន្តថា រាល់ការប្រើប្រាស់ផ្លូវ ចំនុចសំខាន់គឺ គោរពច្បាប់ចរាចរណ៍ បើកបរត្រូវពាក់មួកសុវត្ថិភាព ពាក់ខ្សែរក្រវ៉ាត់ និងពិនិត្យលក្ខណៈបច្ចេកទេសយានយន្ត ក៏ដូចបើកបរកុំឲ្យលើសល្បឿនកំណាត់។ នៅក្នុងឱកាសនោះដែរ ក្រុមការងារក៏បានធ្វើការចែកមួកសុវត្ថិភាពដល់អ្នកចូលរួម ក្នុងការផ្សព្វផ្សាយជាងខាងជាង ១០០មួកផងដែរ៕