ការចរចានានាកំពុងតែស្ថិតនៅក្នុងដំណើរការនៅឡើយរវាងក្រុមហ៊ុន ​ រ៉ូយ៉ាល់ រេលវេ ខេមបូឌានិងរដ្ឋាភិបាលកម្ពុជាលើការអនុវត្តកិច្ចព្រមព្រៀងសម្បទានថ្មីដែលត្រូវបានរៀបចំឡើងដើម្បីកែលម្អប្រព័ន្ធផ្លូវដែករបស់ប្រទេសកម្ពុជាក៏ដូចជារក្សាហេដ្ឋារចនាសម្ព័ន្ធឱ្យមានរបៀបរៀបរយ។ គិតមកដល់ពេលនេះ ភាគីទាំងពីរ​មិនទាន់ឈានដល់កិច្ចព្រមព្រៀងណាមួយនៅឡើយទេ។ ក្រុមហ៊ុន Royal Railway ចាប់ផ្តើមដំបូងក្នុងឆ្នាំ ២០០៩ នៅពេលដែលរដ្ឋាភិបាលបានចុះហត្ថលេខាលើកិច្ចព្រមព្រៀងសម្បទានរយៈពេល ៣០ ឆ្នាំដែលអនុញ្ញាតឱ្យក្រុមហ៊ុនToll Cambodia Co Ltd ដែលជាការបណ្តាក់ទុនរួមគ្នារវាងក្រុមហ៊ុន Toll Holding Ltd ដែលមានមូលដ្ឋាន​នៅប្រទេសអូស្ត្រាលីនិងក្រុមហ៊ុន Royal Group of Companies Ltd គ្រប់គ្រងប្រតិបត្តិការប្រព័ន្ធផ្លូវដែកនៅកម្ពុជា។ នៅឆ្នាំ ២០១៤ ក្រុមហ៊ុន Toll Holding បានផ្ទេរភាគហ៊ុនទាំងអស់ទៅដៃគូក្នុងស្រុករបស់ខ្លួនដែលធ្វើឱ្យក្រុមហ៊ុនរ៉ូយ៉ាល់គ្រុបក្លាយជាម្ចាស់ភាគហ៊ុនតែមួយ។ ក្រុមហ៊ុននេះត្រូវបានប្តូរឈ្មោះទៅជារ៉ូយ៉ាល់ រេលវេ ខេមបូឌា (Royal Railway Cambodia)។ លោកនាយករដ្ឋមន្រ្តី ហ៊ុន សែន បានមានប្រសាសន៍កាលពីដើមឆ្នាំ ២០១៩ ថារដ្ឋាភិបាលមិនមានសមត្ថភាពក្នុងការកាន់កាប់និងដំណើរការសេវាកម្មផ្លូវដែក។ ទោះយ៉ាងណាក៏ដោយ នៅដើមឆ្នាំនេះ កិច្ចព្រមព្រៀងនានាត្រូវបានធ្វើឡើងលើការចាប់ផ្តើមកិច្ចព្រមព្រៀងសម្បទានថ្មីរវាងភាគីទាំងពីរ ខណៈដែលកិច្ចព្រមព្រៀងចាស់មិនអាចបន្តអនុវត្តបានទៀតទេ។ កិច្ចព្រមព្រៀងថ្មីដែលកំពុងត្រូវបានពិភាក្សានេះគឺថាក្រុមហ៊ុន រ៉ូយ៉ាល់ រេលវេ មិនមែនត្រឹមតែធ្វើប្រតិបត្តិការផ្លូវដែកប៉ុណ្ណោះទេ ប៉ុន្តែថែមទាំងមានការស្តារវាឡើងវិញផងដែរ ខណៈដែលរដ្ឋាភិបាល​មិ​ន​មា​នថវិកាគ្រប់គ្រាន់។ លោក វ៉ាស៊ឹ​ម សុរិយា អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន បានថ្លែងឲ្យដឹងថា៖ « ប្រសិនបើ​យើងពិនិត្យទៅលើកិច្ចព្រមព្រៀងសម្បទានកាលពីពេលកន្លងទៅ រដ្ឋាភិបាលត្រូវបានរំពឹងថានឹងចំណាយប្រាក់លើការជួសជុលផ្លូវដែក ហើយវិស័យឯកជនគឺទទួលខុសត្រូវលើប្រតិបត្តិការ។ ប៉ុន្តែ រដ្ឋាភិបាលមិនមានថវិកាគ្រប់គ្រាន់សម្រាប់ជួសជុលផ្លូវដែកនោះទេ ដូច្នេះកិច្ចព្រមព្រៀងចាស់មិនអាចអនុវត្តបាននោះទេ»។ អ្វីដែលយើងចង់បាននៅពេលនេះគឺចង់ឲ្យក្រុមហ៊ុនស្តារនិងដំណើរការហេដ្ឋារចនាសម្ព័ន្ធផ្លូវដែកនៅកម្ពុជាឡើងវិញ។ ប៉ុន្តែក្រុមហ៊ុនរ៉ូយ៉ាល់ រេលវេ គ្រាន់តែចង់ទទួលយកប្រតិបត្ដិការ ហើយទុកឱ្យរដ្ឋាភិបាលអភិវឌ្ឍន៍។ ក្រសួងសេដ្ឋកិច្ច និងហិរញ្ញវត្ថុមិនមានថវិកាគ្រប់គ្រាន់សម្រាប់សកម្មភាពនេះទេ។ ដោយសារតែបញ្ហានេះ យើងកំពុងតែបន្តកិច្ចចរចានានា»។ ក្រុមហ៊ុនរ៉ូយ៉ាល់ រេលវេ កំពុងតែធ្វើការពិភាក្សាជាមួយក្រុមហ៊ុនចិន CRRC Corp Ltd ដែលអាចជួយវាអភិវឌ្ឍផ្លូវដែកនៅកម្ពុជា ខណៈដែលក្រុមហ៊ុននេះជាក្រុមហ៊ុនធំជាងគេបំផុតនៅលើពិភពលោកលើវិស័យនេះ ដែលជាដៃគូប្រកួតប្រជែងដ៏ធំរបស់ខ្លួនគឺ Alstom និង Siemens។ តំណាងក្រុមហ៊ុនចិន CRRC បានឲ្យដឹងថាក្រុមហ៊ុនបានអភិវឌ្ឍផ្លូវដែកប្រវែង ២១០០០ គីឡូម៉ែត្រនៅក្នុងប្រទេសចិននិងនៅបរទេស។ ក្រុមហ៊ុនចិន CRRC បានបង្ហាញនូវឆន្ទៈក្នុងការចូលចរចារសម្រាប់ភាពជាដៃគូដែលបានស្នើជាមួយក្រុមហ៊ុនរ៉ូយ៉ាល់ រេលវេ៕