ការចុះត្រួតពិនិត្យស្ថានភាពផ្លូវដែលរងការគំរាមកំហែងដោយជំនន់ទឹកភ្លៀង​ តាមបណ្ដោយផ្លូវជាតិលេខ៤១ ដឹកនាំដោយ ឯកឧត្តម​ ទេសរដ្ឋមន្ត្រី​ ស៊ុន​ ចាន់ថុល​ រដ្ឋមន្ត្រីក្រសួងសាធារណការ​ និងដឹកជញ្ជូន​ នាថ្ងៃទី១៦ តុលា​ ២០២០នេះ ដោយលោកបានមានប្រសាសន៍ថា៖ “ផ្លូវនេះជារៀងរាល់ឆ្នាំគឺលិច ព្រោះតែផ្លូវនេះទាប អត់មានលូរទេទាំងសងខាងផ្លូវ អ៊ីចឹងយើងបានប្រាប់ក្រុមហ៊ុនចិនដែលលើកកម្រិតផ្លូវនេះឡើង ដោយមានប្រវែង២គ.ម ឱ្យគិត និងប្តូរចាក់ជាបេតុង AC (បេតុងកៅស៊ូ) ហើយមានលូរទាំងសងខាងផ្លូវ ដើម្បីរំដោះទឹកពីទីនេះទៅប្រឡាយខាងក្រោយ”។ នេះបើតាមការបញ្ជាក់របស់ឯកឧត្តម បានឱ្យដឹងបន្តថា៖ “យើងកំពុងពិនិត្យលើកិច្ចព្រមព្រៀង ហើយយើងបានចរចាចប់គ្រប់សព្វហើយ ទាំងផ្លូវ៤១ ផ្លូវ៣៣ និងផ្លូវ៣១ ហើយក្រុមហ៊ុនចិន គាត់ទៅធ្វើការជាមួយភាគីចិនទៀត ដើម្បីស្នើសុំប្រាក់កម្ចី ក៏ប៉ុន្ដែមិនមានបញ្ហាទេ ខាងភាគីចិនបានឯកភាពជាមួយនីតិវិធីគេក្នុងការមើលប្រាក់កម្ចី យើងសង្ឃឹមថាឆ្នាំក្រោយទៀត អាចបើកការដ្ឋានបានទាំង៣កន្លែងនេះ ទាំង៣៣ ទាំង ៤១ និង ៣១”។ គួរបញ្ជាក់ថា៖ ការចុះមកពិនិត្យនេះ ដើម្បីធ្វើការសិក្សាឱ្យបានច្បាស់អំពីតម្រូវការ និងកន្លែងដែលត្រូវពង្រីកឱ្យបានធំ ដោយស្ថិតនៅក្នុងគម្រោងធ្វើឱ្យប្រសើរឡើងនៅផ្លូវជាតិលេខ៤១ ដែលទើបតែទទួលបានគោលការណ៍ពីរាជរដ្ឋាភិបាលកាលពីពេលថ្មីៗនេះ ដោយធ្វើការលើកម្រិតផ្លូវពី ប្រភេទDBST (ផ្លូវក្រាលកៅស៊ូ២ស្រទាប់)ទៅជាប្រភេទ AC វិញ។