ក្រោយពីរដ្ឋបាលរាជធានីភ្នំពេញបានធ្វើការប្រកាសផ្អាកចរាចរជាបណ្ដោះអាសន្នលើកំណាត់ផ្លូវលេខ ៣៧១ កាលពីយប់មិញ (ថ្ងៃទី១១ ខែតុលា) នៅមុននេះបន្ដិច (ព្រឹកថ្ងៃទី១២ ខែតុលា) រដ្ឋបាលរាជធានីភ្នំពេញបានចេញសេចក្ដីជូនដំណឹងថ្មីស្ដីពីការអនុញ្ញាឲ្យប្រជាពលរដ្ឋទាំងអស់អាចធ្វើដំណើរលើផ្លូវមួយនេះឡើងវិញជាធម្មតា។ យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញនៅលើផេកហ្វេសប៊ុកផ្លូវការរបស់ខ្លួន​មានខ្លឹមសារយ៉ាងដូច្នេះថា “សេចក្ដីជូនដំណឹងរបស់រដ្ឋបាលរាជធានីភំ្នពេញ បងប្អូនប្រជាពលរដ្ឋអាចធ្វើដំណើរតាមដងផ្លូវ៣៧១​ជាធម្មតាឡើងវិញ បន្ទាប់ពីបានបិទចរាចរជាបណ្តោះអាសន្ន នៅចំណុចមុខស្ថានីយមូបទឹកបឹងទំពន់​ខណ្ឌមានជ័យ​។” គួរជម្រាបផងដែរថា ដោយសារជំនន់ទឹកភ្លៀងបានបង្អុលធ្លាក់ខ្លាំងកាលពីថ្ងៃទី១១ ខែតុលា កន្លងទៅបានធ្វើឲ្យរាជធានីភ្នំពេញមានការលិចលង់ខ្លាំង ខណៈនោះ ឯកឧត្ដម ឃួង ស្រេង អភិបាលរាជធានីភ្នំពេញក៏បានបញ្ជាឲ្យបិទផ្លូវ ៣៧១ ដើម្បីងាយស្រួលក្នុងការបូមទឹកចេញនៅស្ថានីទឹកបឹងទំពុន បានឆាប់រហ័យ៕