ស្ពានថ្មមួយកន្លែង និង​ទំនប់អាងទឹកបាសាក់ ក្នុងស្រុករុក្ខគិរី ត្រូវបានកម្លាំងទឹកជំនន់វាយបំផ្លាញ ដែលបង្កអោយមានការប៉ះពាល់យ៉ាងខ្លាំង ដល់អ្នកធ្វើដំណើរពីឃុំរបស់មង្គល ( ស្រុកមោងឫស្សី )ទៅកាន់ឃុំព្រែកជីក ( ស្រុករុក្ខគិរី ) ដោយមិនអាចអោយធ្វើចរាចរណ៍បានឡើយ ។ នៅព្រឹកថ្ងៃទី ៩ ខែ តុលា ឆ្នាំ ២០២០ នេះ ទឹកជំនន់ទឹកភ្លៀង ដែលបានធ្លាក់មកឥតឈប់ឈរ ដោយបានជោរជន់យ៉ាងលឿនជាទីបំផុត ព្រមទាំងបានវាយផ្តាច់ស្ពានមួយកន្លែង និងកាត់ផ្តាច់ទំនប់អាងទឹកបាសាក់បណ្តាលអោយទឹកជន់លិចភូមិជាច្រើនក្នុងឃុំព្រែកជីក និងឃុំបាសាក់ក្នុងស្រុករុក្ខគិរី ខេត្តបាត់ដំបង។ តាមការលើកឡើងពីលោកអធិការស្រុក រុក្ខគិរី គឺលោក ឆាយ ម៉ាប់ បានបញ្ជាក់ថា កាលពីយប់ ថ្ងៃទី ៨ នេះ លោកបានដឹកនាំកម្លាំងចុះពិនិត្យស្ថានភាពទឹកជំនន់ នៅក្នុងឃុំព្រែកជីក និងឃុំ បាសាក់ ដោយសង្គេតឃើញថា ទឹកកំពុងតែមានសន្ទុះស្ទុះឡើងយ៉ាងខ្លាំង ជិតស្មើនឹងខ្នងទំនប់អាងបាសាក់ទៅហើយ ដោយកម្លាំងទឹកនៅតែបន្តហក់ឡើងឥតឈប់ឈរ ។ លោកអធិការបានបន្តថា លុះនៅវេលាម៉ោង ៤ និង ៣០ នាទី ទៀបភ្លឺ គឺស្ថានភាពទឹកបានថយចុះជាបណ្តើរៗ ប៉ុន្តែនៅក្នុងដំណាក់កាល​ នៃការស្រកនេះ ទឹកបានវាយបំបាក់ទំនប់អាងបាសាក់អស់ជាច្រើនម៉ែត្រ នៅក្នុងភូមិសាស្ត្រឃុំបាសាក់ រីឯស្ពានថ្មមួយកន្លែង នៅក្នុងឃុំព្រែកជីក ក៏ត្រូវបានទឹកជំនន់នេះច្រោះបាក់ដាច់ផងដែរដែលនៅព្រឹកនេះ ការធ្វើចរាចរណ៍ពីស្រុកមោងឫស្សី ទៅកាន់ស្រុករុក្ខគិរី ត្រូវបានបិទជាបណ្តោះអាសន្ន ។ ដោយឡែកលោក ឡុង ផលគុណ ប្រធានមន្ទីរធនធានទឹក និងឧត្តុនិយម បានមានប្រសាសន៍ថា នៅព្រឹកនេះ ដែលក្រុមការងារនៃមន្ទីររបស់លោក ក៏ដូចជាលោកអភិបាលខេត្ត ងួន រតនៈ បានដឹកនាំកម្លាំងចុះទៅដល់ទីតាំងខាងលើ ដើម្បីពិនិត្យស្ថានភាពទឹកជំនន់ទឹកភ្លៀងនេះ ជាក់ស្តែងគឺនៅព្រឹកនេះដែរ គឺទឹកមានសភាពស្រុកចុះជបណ្តើរៗហើយ រីឯទំនប់ដែលបាក់មានប្រវែង ប្រមាណ ៤០ ម៉ែត្រ ប៉ុណ្ណោះ ៕