[Kley Kley News] - រដ្ឋមន្រ្តីសាធារណការ៖ ផ្លូវជាតិលេខ៤ នឹងត្រូវពង្រីកទទឹងផ្លូវដល់ ១១ម៉ែត្រ
2020-10-08
ទៅកាន់ទំព័រចុះផ្សាយក្នុង Kley Kley News
លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា ផ្លូវជាតិលេខ៤ នឹងត្រូវពង្រីកទទឹងផ្លូវពី ៧ម៉ែត្រ ទៅ១១ម៉ែត្រ តាមកន្លែងមួយចំនួន និងថែមទាំងមានការអ៊ុតកៅស៊ូឡើងវិញផងដែរ ក្រោមកម្ចីរបស់ធនាគារពិភពលោក។ ការថ្លែងនេះ ធ្វើឡើងក្នុងពិធីសម្ពោធបើកឱ្យប្រើប្រាស់ជាផ្លូវការមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត (ឆៀក) សាខាកំបូល កាលពីថ្ងៃទី០៧ ខែតុលា ឆ្នាំ២០២០។
លោកទេសរដ្ឋមន្រ្តីបញ្ជាក់យ៉ាងដូច្នេះថា៖ «ផ្លូវលេខ៤នេះ នឹងមានការពង្រីកពី ៧ម៉ែត្រ ទៅ ១១ម៉ែត្រ រៀបចំចាក់កៅស៊ូឡើងវិញ ដោយសារផ្លូវនេះ មិនបានចាក់កៅស៊ូយូរហើយ។ អ៊ីចឹងយើងមានថវិកាពីធនាគារពិភពលោក ប្រហែល ១១០លានដុល្លារសហរដ្ឋអាមេរិក ដើម្បីចាក់កៅស៊ូ ពង្រីកផ្លូវពី ៧ម៉ែត្រ ទៅ១១ម៉ែត្រ នៅកន្លែងមួយចំនួន លើកកម្ពស់ផ្លូវមួយចំនួន ដែលបានលិចពេលភ្លៀងម្តងៗ។ យើងបានដាក់ដេញថ្លៃបាន ២កញ្ចប់ហើយ នៅសល់២ ឬ ៣កញ្ចប់ទៀត ដើម្បីអ៊ុតកៅស៊ូឡើងវិញនៅផ្លូវជាតិលេខ៤របស់យើង»។
សូមរំលឹកថា កាលពីខែមិថុនា ឆ្នាំ២០១៨ ធនាគារពិភពលោក បានសម្រេចផ្តល់ជំនួយហិរញ្ញប្បទានគ្មានការប្រាក់ ចំនួន ១១០លានដុល្លារ ឱ្យកម្ពុជា សម្រាប់គម្រោងជួសជុលកែលម្អផ្លូវជាតិលេខ៤ ប្រវែងជាង ២០០គីឡូម៉ែត្រ។ តាមរយៈជំនួយនេះ ផ្លូវជាតិលេខ៤ ដែលជាផ្លូវតភ្ជាប់ពីរាជធានីភ្នំពេញដោយផ្ទាល់ ទៅកំពង់ផែសមុទ្រទឹកជ្រៅនៅក្នុងខេត្តព្រះសីហនុនោះ នឹងទទួលបានការបង្កើនគុណភាពឱ្យល្អជាងមុន តាមរយៈការអ៊ុតកៅស៊ូថ្មីពីលើ និងការរៀបចំឡើងវិញនូវចិញ្ចើមសងខាងផ្លូវ ការដាក់លូបង្ហូរទឹក និងការធ្វើស្ពាន នៅក្នុងតំបន់ងាយលិចទឹក នៅតាមដងផ្លូវនេះ។
ជំនួយហិរញ្ញប្បទាននេះ នឹងត្រូវបានយកទៅប្រើប្រាស់ផងដែរ ដើម្បីបង្កើនសមត្ថភាពរបស់ស្ថានីយថ្លឹងរថយន្តបច្ចុប្បន្ន និងជួយកាត់បន្ថយហានិភ័យ ដែលបណ្តាលមកពីការដឹកទំនិញលើសទម្ងន់។ សុវត្ថិភាពផ្លូវ នឹងត្រូវចាត់ទុកជាអាទិភាពចម្បង តាមរយៈការកំណត់សញ្ញាតំបន់ល្បឿនមានកម្រិត ផ្លូវមានសុវត្ថិភាព និងកែលម្អផ្លូវខ្នាតតូចភ្ជាប់ផ្លូវឡើងមកផ្លូវជាតិ ដែលរួមមានទាំងការដំឡើងស្លាកសញ្ញាបង្ហាញផ្លូវ បង្គោលភ្លើងប្រើដោយថាមពលពន្លឺព្រះអាទិត្យ និងកាមេរ៉ាចាប់ល្បឿនរថយន្តទៀតផង៕
