[Khmer 7 News] - សួនច្បារទ្រូងផ្លូវលម្អក្រុងត្រូវគេគាស់កកាយយកផ្លូវធ្វើអាជីវកម្មផ្ទាល់ខ្លួន
2018-01-26
ទៅកាន់ទំព័រចុះផ្សាយក្នុង Khmer 7 News
ខេត្តរតនគិរី ៖ ប្រជាពលរដ្ឋក្នុងក្រុងបានលុងលាន់មាត់ថា នៅខេត្តរតនគិរី ឲ្យតែអ្នកមានលុយចង់ធ្វើអ្វីបានទាំងអស់ មិនថាត្រូវបំផ្លាញសម្បត្តិសាធារណៈ យ៉ាងណាក៏ដោយ។ ជាក់ស្តែងសួនច្បារទ្រូងផ្លូវលម្អក្រុងបានលុង ខេត្តរតនគិរី តាមដងផ្លូវលេខ៧៨ ស្ថិតក្នុងភូមិ៧មករា ត្រង់ចំណុចមុខសណ្ឋាគារសុវណ្ណគីរី ត្រូវបានម្ចាស់សណ្ឋាគារកាប់គាស់បំផ្លាញ បើកផ្លូវកាត់សួនច្បារទ្រូងផ្លូវប្រមាណជា១០ម៉ែត្រដើម្បីងាយស្រួលភ្ញៀវធ្វើដំណើរចេញចូល សម្រាប់ធ្វើអាជីវកម្មរបស់ខ្លួន ក្រោមការព្រមព្រាងពីអាជ្ញាធរក្រុង។
បើតាមការលួចខ្សឹបខ្សៀវ ពីសំណាក់ប្រជាពលរដ្ឋក្នុងក្រុងបានលុងថា សួនច្បារទ្រូងផ្លូវ ជាសម្បត្តិរដ្ឋ ត្រូវម្ចាស់សណ្ឋាគារសុំបំផ្លាញចោលបានយ៉ាងហ្នឹងអីចឹងមុននិងក្រោយ បឹងកន្សែងត្រូវអ្នកមានលុយ ទិញលុបចោលទៀតហើយមើលទៅ។
ករណីសួនច្បារទ្រូងផ្លូវត្រូវម្ចាស់សណ្ឋាគារបំផ្លាញចោល មួយប្រលោះខាងលើនេះ លោក ងិន ណែល អភិបាលក្រុងបានលុង បានឲ្យដឹងនៅល្ងាចថ្ងៃទី២៥ ខែមករា ឆ្នាំ២០១៨ម្សិលមិញនេះដែរថា ខាងអាជ្ញាធរបានអនុញ្ញាតឲ្យម្ចាស់សណ្ឋាគារ បើកទ្រូងផ្លូវប្រវែង២ម៉ែត្រចំខាងមុខសណ្ឋាគារ ដើម្បីងាយស្រួលដល់ភ្ញៀវចេញចូល និងសម្រួលដល់ប្រជាពលរដ្ឋធ្វើដំណើរទៀតផង។ ហើយម្ចាស់សណ្ឋាគារ បានដាក់សំណើស្នើសុំបើកផ្លូវនេះ តាំងពីមុនលោកឡើងកាន់តំណែងមកម្ល៉េះ។
លោកបានបន្តទៀតថា ដោយសង្កេតឃើញទ្រូងផ្លូវនៅចំណុចនោះ មានលក្ខណៈវែង ធ្វើឲ្យប្រជាពលរដ្ឋមានការលំបាកក្នុងការធ្វើដំណើរផងនោះ ទើបអាជ្ញាធរសម្រេចឯកភាពឲ្យម្ចាស់សណ្ឋាគារបើកទ្រូងផ្លូវនោះតែម្ដងទៅ។ ម្យ៉ាងវិញទៀត ក្រុងក៏ត្រូវមានការអភិវឌ្ឍន៍កែលម្អ មិនគួរទុកឲ្យនៅដដែលនោះទេ។ ចំណែកលោក ស៊ុន ប៉ូលីន ប្រធានមន្ទីរសាធារណការខេត្តរតនគិរី ក៏បានឲ្យដឹងដែរថា ការទម្លាយទ្រូងផ្លូវខាងលើនេះ មានការស្នើសុំពីម្ចាស់សណ្ឋាគារ សុវណ្ណគីរី តាមរយៈសាលាក្រុង។ ហើយលោកថា បើទ្រូងផ្លូវនៅចំណុចនោះមានលក្ខណៈវែង គួរតែទម្លាយផ្លូវកាត់ទៅ ដើម្បីសម្រួលដល់ការធ្វើដំណើរឆ្លងកាត់ខ្លះដល់ប្រជាពលរដ្ឋ។
បើទោះជាយ៉ាងណា សួនច្បារទ្រូងផ្លូវនៅចំណុចនោះ មានលក្ខណៈវែងយ៉ាងណាក៏ដោយ ក៏គួរតែ លកលៃទម្លាយផ្លូវកាត់ឲ្យបាន២ប្រលោះ ហើយមានសួនច្បារទ្រូងផ្លូវប្រវែងស្មើគ្នា។ មិនគួរបើកទ្រូងផ្លូវ នៅក្បែរផ្លូវបែកជាបួនដូច្នេះទេ។ ម្យ៉ាងវិញទៀត ប្រជាពលដែលធ្វើអាជីវកម្មផ្ទះសំណាក់ និងសណ្ឋាគារ តាមដងផ្លូវនៅចំណុចនោះ ពួកគាត់ក៏ចង់បើកទ្រូងផ្លូវដូចគ្នាដែរ៕
