សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប នៅរសៀលថ្ងៃទី០៩ ខែកញ្ញា ឆ្នាំ២០២០នេះ បានដឹកនាំកិច្ចប្រជុំពិភាក្សាលើគម្រោងកែលម្អហេដ្ឋារចនាសម្ព័ន្ធផ្លូវថ្នល់ ចំនួន៣៨ខ្សែ នៅទីរួមខេត្តសៀមរាប ក្នុងគោលបំណងលើកស្ទួយជីវភាពរស់នៅរបស់ប្រជាពលរដ្ឋ ជំរុញកំណើនភ្ញៀវទេសចរ និងសេដ្ឋកិច្ចជាតិ ក្រោយវិបត្តិជំងឺកូវីដ-១៩។ កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និង ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន នៅទីស្តីការក្រសួងសាធារណ ការ និងដឹកជញ្ជូន។ សូមបញ្ជាក់ថា ក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃទី០៤ ខែកញ្ញា ឆ្នាំ២០២០ថ្មីៗនេះ សម្តេចតេជោ ហ៊ុន សែន បានប្រកាសទម្លាក់កញ្ចប់ថវិកាជាតិចន្លោះពី១០០ទៅ ១៥០លាន ដុល្លារអាមេរិក ដើម្បីសាងសង់ និងកែលម្អផ្លូវចំនួន ៣៨ខ្សែ នៅទីរួមខេត្តសៀមរាប។សម្តេចតេជោ ហ៊ុន សែន បានគូសបញ្ជាក់ថា ការសម្រេចសាងសង់ផ្លូវទាំង ៣៨ខ្សែនៅទីរួមខេត្តសៀមរាបនេះមិនត្រឹម តែជាការធ្វើឱ្យប្រសើរឡើងនូវប្រព័ន្ធហេដ្ឋារចនាសម្ព័ន្ធក្នុងក្រុងសៀមរាប ដែលជាទីក្រុងទេសចរណ៍ដ៏ល្បាញល្បីរបស់កម្ពុជាប៉ុណ្ណោះទេ តែក៏ជាការរួមចំណែកផ្តល់ការងារជូនប្រជាពលរដ្ឋក្នុងកំលុងពេលជួបវិបត្តិកូវីដ១៩នេះផងដែរ។ ក្នុងកិច្ចប្រជុំនេះ សម្តេចតេជោ ហ៊ុន សែន បានណែនាំឱ្យបង្កើតគណៈកម្មការមួយសម្រាប់សាងសង់ផ្លូវទាំង៣៨ ខ្សែនេះ ដោយមាន សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប ជាប្រធាន, ឯកឧត្តម ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាអនុប្រធាន ហើយ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន ជាអ្នកប្រតិបត្តិការផ្ទាល់លើការងារនេះ។ សម្តេចតេជោ ហ៊ុន សែន ក៏បានណែនាំទៅ ឯកឧត្តម ទៀ សីហា អភិបាលខេត្តសៀមរាប ចាប់ផ្តើមសិក្សារៀបចំ និងដោះ ស្រាយបញ្ហាផលប៉ះពាល់ផ្សេងៗ។ សម្តេចតេជោ នាយករដ្ឋមន្ត្រី ក៏បានបង្ហាញក្តីសង្ឃឹមថា ប្រជាពលរដ្ឋក្នុងខេត្តសៀមរាប នឹងបើកលំហរបេះដូងជួយសម្រួលដល់ការសាងសង់ផ្លូវទាំងនេះ ដូចជាប្រជាពលរដ្ឋនៅខេត្តព្រះសីហនុ។ សម្តេចតេជោ ហ៊ុន សែន បានថ្លែងថា ប្រជាពលរដ្ឋនៅខេត្តព្រះសីហ នុ បានស្រេកឃ្លានផ្លូវ ហើយបានចូលរួមសហការជាមួយអាជ្ញាធរ ដោយមិនបានទាមទារសំណងលើផលប៉ះពាល់នោះឡើយ។ បើតាមសម្តេចតេជោ ហ៊ុន សែន ការសាងសង់ផ្លូវនៅខេត្តព្រះសីហនុ មិនមានចំណាយថវិកាលើការសងផលប៉ះពាល់របស់ប្រជាពលរដ្ឋនោះឡើយ។ ទន្ទឹមនឹងការ ប្រកាសទម្លាក់ថវិកាសាងសង់ផ្លូវនៅខេត្តសៀមរាបនេះ សម្តេចតេជោ ហ៊ុន សែន ក៏បានថ្លែងបញ្ជាក់ដែរថា ដ្បិតថាកម្ពុជារងគ្រោះពីវិបត្តិនៃជំងឺកូវីដ១៩ តែមិនបានរំខានដល់គម្រោងកសាងហេដ្ឋារច នាសម្ព័ន្ធនោះឡើយ។ សម្តេចតេជោ ហ៊ុន សែន ក៏បានថ្លែងអំណរគុណដល់ក្រសួងស្ថាប័នទាំងអស់ ដែលបានចូលរួមសន្សំសំចៃ ធ្វើឱ្យកម្ពុជាសន្សំបានថវិកាជាង ៦០០ លានដុល្លារ សម្រាប់យកមកអភិវឌ្ឍន៍ប្រទេសជាតិ៕