ខេត្តស្វាយរៀង ៖ កាលពីវេលាព្រឹក​ថ្ងៃទី២៥ ខែមករា ឆ្នាំ២០១៨ ក្រុមអ្នករកស៊ីរថយន្តដឹកដី ដឹកខ្សាច់ បានប្រមូលផ្ដុំគ្នាតវ៉ាករណីក្រុមជញ្ជីងចល័ត ចាប់ឃាត់រថយន្ដ ៧គ្រឿង ដែលដឹកលើសទម្ងន់កំណត់ នៅចំណុចភូមិព្នៅ ឃុំតាសួស ស្រុកស្វាយជ្រំ ខេត្តស្វាយរៀង រហូតចង់បិទផ្លូវជាតិលេខ១ ថែមទៀតផង ។ ខណៈនោះ ឯកឧត្ដម ម៉ែន វិបុល អភិបាល នៃគណៈអភីបាលខេត្តស្វាយរៀង បានចាត់ក្រុមការងារចុះសម្របសម្រួល និងដោះស្រាយករណីនេះ ​។ ឆ្លើយតបនឹងបញ្ហានេះ ឯកឧត្ដម ម៉ែន វិបុល អភិ​បាល នៃគណៈអភិបាលខេត្តស្វាយរៀង បានចាត់ឲ្យលោកប្រធានមន្ទីរសាធារណការ និងដឹកជញ្ជូនខេត្ត លោកនាយកទីចាត់ការអន្តរវិស័យសាលាខេត្ត និងកងកម្លាំងមានសមត្ថកិច្ច ចុះទៅធ្វើការសម្របសម្រួលដោះស្រាយ និងពន្យល់ដល់ក្រុមអ្នករកស៊ី ធ្វើយ៉ាងណាកុំឲ្យមានការបិទផ្លូវដែលអាចបង្កឲ្យមានការកកស្ទះ និងធ្វើឲ្យប៉ះពាល់ការចរាចរណ៍របស់ប្អូនប្រជាពលរដ្ឋ ដែលរហូតមកដល់ពេលនេះ ក្រុមការងារបាននិងកំពុងធ្វើការសម្របសម្រួល និងដោះស្រាយ ព្រមទាំងធ្វើការសម្រួលចរាចរណ៍ ដើម្បីឲ្យមានដំណើរការជាប្រក្រតីឡើងវិញផងដែរ ៕