ថ្លែងក្នុងពិធីបើកវគ្គបណ្ដុះបណ្ដាលស្ដីពីការងាររដ្ឋបាល និងចែករំលែកបទពិសោធន៍ជោគជ័យក្នុងការងារ ឯកឧត្តមទេសរដ្ឋមន្ត្រីបានចែករំលែកចំណេះដឹង និងបទពិសោធន៍ផ្ទាល់ខ្លួនដល់អង្គសិក្ខាកាមអំពីរបៀប របបដឹកនាំ និងគ្រប់គ្រងធនធានមនុស្សដើម្បីសម្រេចទិសដៅការងារដែលបានដាក់ចេញ ភ្នំពេញ៖ ថ្ងៃអង្គារ ៧រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១១ ខែសីហា ឆ្នាំ២០២០ នៅទីស្ដីការក្រសួង ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្ដីពីការងាររដ្ឋបាល និងចែក រំលែកបទពិសោធន៍ជោគជ័យក្នុងការងារដល់ថ្នាក់ដឹកនាំអង្គភាព និងមន្ត្រីក្រោមឱវាទក្រសួងប្រមាណ ១០០នាក់។ វគ្គបណ្ដុះបណ្ដាលនេះធ្វើឡើងដើម្បីផ្តល់ចំណេះដឹងនិងជំនាញបន្ថែមទៀតដល់មន្ត្រីរាជការក្រោមឱវាទ ក្រសួង ចែករំលែកបទពិសោធន៍ជោគជ័យពីវាគ្មិនដល់សិក្ខាកាម ដែលអាចឆ្លើយតបនឹងសំណូមពរ និងតម្រូវការចាំបាច់របស់អង្គភាពទាំងថ្នាក់ជាតិ និងថ្នាក់ក្រោមជាតិសំដៅលើកកម្ពស់សមត្ថភាពបំពេញ ការងាររបស់មន្ត្រីរាជការឱ្យមានប្រសិទ្ធភាពខ្ពស់ស្របតាមតួនាទី និងភារកិច្ចរបស់ខ្លួន។ ឯកឧត្ដមទេសរដ្ឋមន្ត្រីបានមានប្រសាសន៍ថា៖ តាមរយៈការបណ្ដុះបណ្ដាលនេះ សិក្ខាកាមនឹងទទួលបាន បទពិសោធន៍ពិតៗពីវាគ្មិនដែលធ្វើបទបង្ហាញចែករំលែកបទពិសោធន៍ជោគជ័យផ្ទាល់ខ្លួន និងផ្តល់ ទស្សនទាននៃភាពជាអ្នកដឹកនាំលើប្រធានបទសំខាន់ៗដូចជា៖ ការអភិវឌ្ឍខ្លួន ការរៀបចំផ្នត់គំនិតការ ត្រៀមខ្លួនសម្រាប់ការផ្លាស់ប្តូរ និងការអភិវឌ្ឍវិជ្ជាជីវៈ និងស្ថាប័នផងដែរ។ ឯកឧត្ដមទេសរដ្ឋមន្ត្រីបានបន្ថែមថា៖ ក្រសួងមានផែនការបណ្ដុះបណ្ដាលប្រចាំឆ្នាំច្បាស់លាស់ទាំងការ បណ្ដុះបណ្ដាលក្នុងប្រទេស និងបញ្ជូនមន្ត្រីទៅសិក្សានៅក្រៅប្រទេសតាមរយៈកម្មវិធីបណ្ដុះបណ្ដាល រយៈពេលខ្លី ឬអញ្ជើញវាគ្មិនពីក្រៅប្រទេសដូចជា៖ សាលាHarward មកបណ្ដុះបណ្ដាលផ្ទាល់ដល់មន្ត្រី ក្រសួងដើម្បីពង្រឹងសមត្ថភាព និងចំណេះដឹងឱ្យកាន់តែទូលំទូលាយ សំដៅបង្កើនផលិតភាពការងារ ឱ្យប្រសើរជាងមុន។ ជាមួយគ្នានោះផងដែរ ឯកឧត្ដមទេសរដ្ឋមន្ត្រីបានក្រើនរំលឹកអង្គសិក្ខាកាមថា៖ ការសិក្សាគួរធ្វើឡើងពេញ មួយជីវិតដើម្បីអាចដើរតាមទាន់របត់នៃបដិវត្តឧស្សាហកម្ម៤.០ ដោយហេតុថា ព័ត៌មានវិទ្យាដើរតួយ៉ាង សំខាន់ក្នុងការផ្លាស់ប្ដូររបៀបធ្វើការ និងការរស់នៅ ជាពិសេសលើកកម្ពស់វប្បធម៌អរិយធម៌របស់ជាតិ សាសន៍មួយផងដែរ។ បន្ថែមពីលើនេះ ឯកឧត្ដមទេសរដ្ឋមន្ត្រី បានជំរុញលើកទឹកចិត្តឱ្យមានការរៀបចំកម្មវិធីធ្វើបទបង្ហាញ ឬការបណ្តុះបណ្តាលទាក់ទងនឹងវិស័យព័ត៌មានវិទ្យាដល់មន្ត្រីក្រោមឱវាទក្រសួង ដើម្បីពង្រឹងសមត្ថ ភាពពួកគាត់ឱ្យកាន់តែទូលំទូលាយ និងរិះរកនីតិវិធីផ្លាស់ប្ដូររបៀបរបបធ្វើការងារ សំដៅលើកកម្ពស់ ផលិតភាព ការងារប្រចាំថ្ងៃឱ្យកាន់តែប្រសើរឡើង។ ឆ្លៀតក្នុងឱកាសថ្លែងសន្ទរកថាបើកកម្មវិធីនាពេលនោះ ឯកឧត្ដមទេសរដ្ឋមន្ត្រីបានចែករំលែកចំណេះដឹង និងបទពិសោធន៍ផ្ទាល់ខ្លួនដល់សិក្ខាកាមទាំងអស់ ជាពិសេសថ្នាក់ដឹកនាំអង្គភាពអំពីរបៀបដឹកនាំ និង គ្រប់គ្រងធនធានមនុស្ស និងតាមដានការងារដែលបានចាត់តាំងឱ្យមន្ត្រីថ្នាក់ក្រោមបំពេញ ដោយប្រើ យន្តការជាក់លាក់មួយចំនួនដែលអាចធានាថារាល់កិច្ចការដាក់ចេញ មានដំណើរការរលូន និងឆ្លើយ តបតាមផែនការជាក់ស្តែងរបស់អង្គភាព។ ជាទីបញ្ចប់ ឯកឧត្ដមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់វាគ្មិន និងសិក្ខាកាមទាំងអស់ ដែលបានចំណាយពេលវេលាដ៏មានតម្លៃចូលរួមក្នុងការបណ្ដុះបណ្ដាលនេះ និងបានផ្ដាំផ្ញើឱ្យសិក្ខាកាម ទាំងអស់ចូលរួមសួរដេញដោលឱ្យបានផុលផុសបំផុត ដើម្បីក្រេបយកចំណេះដឹងឱ្យច្រើន ហើយយក ចំណេះដឹងទាំងនោះទៅបម្រើជាតិមាតុភូមិដើម្បីអភិវឌ្ឍសេដ្ឋកិច្ចឱ្យឈានឡើងមួយកម្រិតថែមទៀត៕