ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញដឹកនាំគណៈប្រតិភូក្រសួងចូលរួមគោរពវិញ្ញាណក្ខន្ធសពឯកឧត្ដម អ៊ុក ចាន់ ទីប្រឹក្សាផ្ទាល់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ភ្នំពេញ៖ ថ្ងៃចន្ទ ៧កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៧ ខែកក្កដា ឆ្នាំ២០២០ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចូលរួមគោរពវិញ្ញាណក្ខន្ធសពឯកឧត្ដម អ៊ុក ចាន់ ទីប្រឹក្សាផ្ទាល់របស់សម្ដេចអគ្គមហាសេនាបតីតេជោ ហ៊ុន សែន និងជាអតីតរដ្ឋលេខាធិការក្រសួងសាធារណការ និងដឹកជញ្ជូន នៅគេហដ្ឋានសព ស្ថិតនៅផ្ទះលេខ 10A ផ្លូវលេខ២០៦ សង្កាត់វាលវង់ ខណ្ឌ៧មករា រាជធានីភ្នំពេញ។ ឯកឧត្ដម អ៊ុក ចាន់ បានទទួលមរណភាពកាលពីថ្ងៃអាទិត្យ ៦កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៦ ខែកក្កដា ឆ្នាំ២០២០ វេលាម៉ោង ០៦:២០នាទីព្រឹក ក្នុងជន្មាយុ៨០វស្សា ដោយជរាពាធ។ មរណភាពរបស់ឯកឧត្ដម អ៊ុក ចាន់ គឺជាការបាត់បង់ឥស្សរជនមួយរូបរបស់ជាតិ ដែលបានចូលរួមចំណែកយ៉ាងធំធេងទាំងកម្លាំងកាយ ចិត្ត និងពេលវេលាក្នុងបុព្វហេតុជាតិមាតុភូមិ ព្រមទាំងបានបន្សល់ទុកនូវស្នាដែដ៏ច្រើនអនេក ហើយសមិទ្ធផលទាំងនេះគឺជាអនុស្សាវរីយ៍ដិតជាប់ក្នុងក្រឳអៅបេះដូងរបស់ពលរដ្ឋគ្រប់រូប ជាពិសេសថ្នាក់ដឹកនាំ និងមន្ត្រីរាជការនៃក្រសួងសាធារណការ និងដឹកជញ្ជូន។ លើសពីនេះទៀត មរណភាពរបស់ឯកឧត្ដម អ៊ុក ចាន់ គឺជាការបាត់បង់នូវបិតាបង្កើត បិតាក្មេក ជីតានិងជីតាទួតជាទីគោរពស្រឡាញ់ដ៏ជ្រាលជ្រៅ និងប្រកបដោយព្រហ្មវិហារធម៌របស់ឯកឧត្តម លោកជំទាវ ព្រមទាំងក្រុមគ្រួសារ ព្រោះកន្លងមកឯកឧត្ដម អ៊ុក ចាន់ តែងតែខិតខំប្រឹងប្រែងយកអស់កម្លាំងកាយចិត្ត ប្រាជ្ញា ស្មារតី ដើម្បីចិញ្ចឹមបីបាច់ថែរក្សា និងអប់រំទូន្មានបុត្រធីតា និងចៅៗ ប្រកបដោយគន្លងធម៌ រហូតក្លាយជាបញ្ញវន្តគ្រប់ៗគ្នា។ ឯកឧត្តមទេសរដ្ឋមន្ត្រី ព្រមទាំងគណៈប្រតិភូ តំណាងឱ្យមន្ត្រីរាជការ បុគ្គលិក និងកម្មករនៃក្រសួងសាធារណការ និងដឹកជញ្ជូន បានចូលរួមរំលែកនូវមរណទុក្ខដ៏ក្រៀមក្រំ និងសេចក្ដីសង្វេគជាទីបំផុត ជាមួយ លោកជំទាវ ព្រមទាំងក្រុមគ្រួសារ និងបានលំឱនកាយវាចាចិត្ត ឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្ដម អ៊ុក ចាន់ សូមឱ្យបានសោយសុខក្នុងសុគតិភពកុំបីឃ្លៀងឃ្លាតឡើយ៕