ថ្ងៃចន្ទ ២កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែមិថុនា ឆ្នាំ២០២០ ឯកឧត្ដម ប៉ែន បូរាណ អនុរដ្ឋលេខាធិការ ក្រសួងសាធារណការ និងដឹកជញ្ជូនបានអញ្ជើញដឹកនាំគណៈប្រតិភូអន្តរក្រសួង ចូលរួមកិច្ចប្រជុំឧត្ដមមន្ត្រីលើកទី១ នៃគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ (GMS NTFC-SOM)។ កិច្ចប្រជុំនេះដឹកនាំដោយលោកស្រីសហប្រធាន Kanya Sasradipoera មន្ត្រីជាន់ខ្ពស់ នៃនាយកដ្ឋានគ្រប់គ្រងសាធារណៈវិស័យហិរញ្ញវត្ថុ និងពាណិជ្ជកម្មធនាគារអភិវឌ្ឍន៍អាស៊ី និងមានការចូលរួមពីមន្ត្រីជាន់ខ្ពស់មកពីបណ្ដាប្រទេសក្នុងមហាអនុតំបន់មេគង្គ ដែលរួមមាន៖ កម្ពុជា ឡាវ មីយ៉ាន់ម៉ា ថៃ និងវៀតណាម ដោយឡែកឧត្ដមមន្ត្រីរបស់ចិន ដែលជាសហប្រធាននៃកិច្ចប្រជុំមិនបានចូលរួមទេ ដោយហេតុផលមានការផ្ទុះជំងឺកូវីដ-១៩ជាលើកទី២ នៅទីក្រុងប៉េកាំង។ កិច្ចប្រជុំនេះធ្វើឡើងតាមសន្និសីទវីដេអូពីចម្ងាយក្នុងគោលបំណងកំណត់នូវបញ្ហាប្រឈមថ្មីៗ ការរៀបចំផែនការការងារ និងការកំណត់ទិសដៅបន្ដ នៃកិច្ចប្រជុំក្នុងក្របខ័ណ្ឌមហាអនុតំបន់មេគង្គសម្រាប់ឆ្នាំ២០២០ និងឆ្នាំបន្ដបន្ទាប់។ អង្គប្រជុំបានពិភាក្សាផងដែរអំពីស្ថានភាពបច្ចុប្បន្នភាព និងបទពិសោធន៍ក្នុងការទប់ស្កាត់ការរីករាលដាលនៃជំងឺកូវីដ-១៩ របស់បណ្ដាប្រទេសនីមួយៗនៅតាមច្រកទ្វារព្រំដែនអន្ដរជាតិ ការធ្វើបច្ចុប្បន្នភាពលើការចេញ Permit-TAD សម្រាប់ការដឹកជញ្ជូនឆ្លងកាត់ក្នុងក្របខ័ណ្ឌGMS ការពិភាក្សាលើការកំណត់នូវធាតុចូល ដើម្បីបង្កើតនូវ Country Handbooks នៅក្នុងពិធីសារទី១ នៃកិច្ចព្រមព្រៀងការដឹកជញ្ជូនឆ្លងកាត់ព្រំដែន និងការឯកភាពជាគោលការណ៍លើការបញ្ចូលទិន្នន័យសម្រាប់ការប្រមូលផលដំបូង (Early Harvest) ក្នុងការសម្របសម្រួលការដឹកជញ្ជូន និងពាណិជ្ជកម្ម (TTF) ក្នុងមហាអនុតំបន់មេគង្គទាំងមូលឱ្យស្ថិតនៅក្រោមស្ដង់ដារ ឬទម្រង់តែមួយ៕