ក្រសួងសាធារណការ និងដឹកជញ្ជូនកំពុងត្រៀមរៀបចំការបណ្ដុះបណ្ដាលតាមផែនការសម្រាប់មន្ត្រីរាជការក្រសួងឆ្នាំ២០២០ក្នុងកាលៈទេសៈប្រទេសជាតិកំពុងឆ្លងកាត់បញ្ហាប្រឈមពីការរាតត្បាតជាសកលនៃមេរោគកូវីដ-១៩ ថ្ងៃអង្គារ ៣កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៣ ខែមិថុនា ឆ្នាំ២០២០ នៅទីស្ដីការក្រសួង លោក ហឿន សំនៀង អគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំពិភាក្សាស្ដីពីការបណ្ដុះបណ្ដាលមន្ត្រីរាជការឆ្នាំ២០២០ ដោយមានការ អញ្ជើញចូលរួមពីថ្នាក់ដឹកនាំក្រសួង និងមន្ត្រីពាក់ព័ន្ធពីគ្រប់អង្គភាពចំណុះទីស្ដីការក្រសួង។ កិច្ចប្រជុំនេះធ្វើឡើងដើម្បីពិភាក្សាត្រៀមលក្ខណៈសម្បត្តិក្នុងការបណ្ដុះបណ្ដាល ជាពិសេស ការជ្រើស រើសមន្ត្រីចូលរួមវគ្គបណ្ដុះបណ្ដាល ពេលវេលា ប្រធានបទ និងគ្រូឧទ្ទេសជាដើម និងដើម្បីឱ្យថ្នាក់ដឹកនាំ និងមន្ត្រីបានត្រៀមលក្ខណៈជាស្រេចក្នុងការទទួលការបណ្ដុះបណ្ដាលទាំងផ្នែកបច្ចេកទេស និងរដ្ឋបាល សំដៅពង្រឹង និងបង្កើនសមត្ថភាពវិជ្ជាជីវៈមន្ត្រីឱ្យកាន់តែមានភាពទូលំទូលាយ និងច្បាស់លាស់ថែមទៀត ដើម្បីឱ្យពួកគាត់អាចបម្រើសេវាសាធារណៈបានលឿន មានប្រសិទ្ធភាព និងតម្លាភាព។ លោកអគ្គនាយករងបានបន្តថា ក្រសួងមាននាយកដ្ឋានបុគ្គលិក និងវិទ្យាសា្ថនជាតិបណ្ដុះបណ្ដាលបច្ចេកទេស ជាសេនាធិការក្នុងការរៀបចំវគ្គបណ្ដុះបណ្ដាលសមត្ថភាពមន្ត្រី។ ទោះជាយ៉ាងនេះក្ដី ដោយសារបញ្ហាកូវីដ-១៩ ធ្វើឱ្យគម្រោងនៃការបណ្ដុះបណ្ដាលរបស់អង្គភាពទាំងពីរនេះមានការរាំងស្ទះ និងទាមទាឱ្យមានការចូលរួមពីអង្គភាពនានាក្នុងការពិភាក្សាគ្នាឱ្យបានគ្រប់ជ្រុងជ្រោយដើម្បីរៀបចំការ បណ្ដុះបណ្ដាលឱ្យមានប្រសិទ្ធភាពក្នុងពេល និងក្រោយពេលនៃការរាតត្បាតមេរោគកូវីដ-១៩នេះ។ លោកអគ្គនាយករងបានមានប្រសាសន៍ថា តាមចក្ខុវិស័យរបស់ឯកឧត្ដមទេសរដ្ឋមន្ត្រី ស៊ុន ចាន់ថុល ឆ្នាំ២០២០នេះ គឺជាឆ្នាំបណ្ដុះបណ្ដាលមន្ត្រីរបស់ក្រសួងសាធារណការ និងដឹកជញ្ជូនឱ្យមានសមត្ថភាព រឹងមាំថែមទៀត ជាពិសេសបណ្ដុះពហុជំនាញដល់ពួកគាត់ឱ្យកាន់តែទូលំទូលាយ និងពោរពេញដោយ សក្ដានុពល ដោយហេតុថាពួកគាត់នឹងក្លាយជាថ្នាក់ដឹកនាំក្រសួងនៅថ្ងៃអនាគត។ លោកអគ្គនាយករង បានសម្ដែងនូវការកោតសរសើរ និងថ្លែងអំណរគុណចំពោះអង្គប្រជុំទាំងមូល ដែលបាន ចូលរួមជាមតិយោបល់លើការត្រៀមរៀបចំលក្ខណៈសម្បត្តិទាក់ទងនឹងការជ្រើសរើស ប្រធានបទ វិធីសាស្ត្រក្នុងការបណ្ដុះបណ្ដាលតាមអនឡាញ និងការចូលរួមសហការក្នុងការបណ្ដុះ បណ្ដាលពីអង្គភាពទាំងអស់ សំដៅឱ្យការបណ្ដុះបណ្ដាលសមត្ថភាពមន្ត្រីរបស់ក្រសួងសម្រាប់ឆ្នាំ២០២០ នេះប្រកបដោយភាពរលូន និងមានប្រសិទ្ធភាព៕