នៅថ្ងៃអង្គារ ៥កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៦ ខែឧសភា ឆ្នាំ២០២០ ក្រោមអធិបតីភាពឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ បានដឹកនាំការប្រជុំបូកសរុបលទ្ធផលការងារដែលបានអនុវត្តរយៈពេល៣ខែកន្លងមក។ កិច្ចប្រជុំនេះមានការចូលរួមពី ឯកឧត្តមនាយកខុទ្ទកាល័យ ឯកឧត្តមអនុរដ្ឋលេខាធិការទទួលបន្ទុក សមាជិក សមាជិកាលេខាធិការដ្ឋាន និងប្រធាន អនុប្រធានស្ថានីយជញ្ជីងទាំង ២៨។ ជាកិច្ចចាប់ផ្តើម ឯកឧត្តមរដ្ឋលេខាធិការបានកោតសរសើរដល់មន្រ្តីទាំងអស់ ដែលបានខិតខំអនុវត្តការងាររឹតបន្តឹងបទល្មើសដឹកលើសទម្ងន់កម្រិតកំណត់រយៈពេលកន្លងមក។ តាមរបាយការណ៍នៃការអនុវត្ត ៣ខែកន្លងទៅ មានបទល្មើសសរុបចំនួន ៩៤៩គ្រឿង ក្នុងនោះខែកុម្ភៈមានបទល្មើសចំនួន ២៧០ គ្រឿង ខែមីនា ចំនួន ៣៨១ គ្រឿង និងខែមេសា ២៩៨ គ្រឿង។ ក្នុងកិច្ចប្រជុំក៏បានលើកឡើងពីទិសដៅការងារដែលត្រូវអនុវត្តក្នុងត្រីមាសបន្ទាប់ដូចជា ការងារបង្កើតទីតាំងស្ថានីយថ្មី រុះរើ និងធ្វើឱ្យប្រសើរឡើងនៅតាមស្ថានីយមួយចំនួន។ ឯកឧត្តមរដ្ឋលេខាធិការ បានណែនាំដល់មន្ត្រីតាមស្ថានីយឱ្យពង្រឹងការអនុវត្តការងារឱ្យបានកាន់តែប្រសើរ និងមានប្រសិទ្ធភាព ប្រកាន់ភ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធ។ គួរបញ្ជាក់ថា នេះជាត្រីមាសដំបូងនៃការអនុវត្តការងាររបស់គណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដែលឯកឧត្តមទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន បានធ្វើកំណែទម្រង់សមាសភាពមន្ត្រីដោយផ្អែកតាមអនុក្រឹត្យលេខ ១៤១អនក្រ.បក ស្តីពីការបង្កើតគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ៕