ថ្ងៃអង្គារ ៦រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១២ ខែឧសភា ឆ្នាំ២០២០ នៅទីស្ដីការក្រសួង ឯកឧត្ដម ឡេង ធនយុទ្ធា រដ្ឋលេខាធិការ រួមទាំងថ្នាក់ដឹកនាំអគ្គនាយកដ្ឋាន និងនាយកដ្ឋានជំនាញពាក់ព័ន្ធ នៃក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំឧត្ដមមន្ត្រីដឹកជញ្ជូនអាស៊ី-អឺរ៉ុប តាមរយៈសន្និសីទវីដេអូពីចម្ងាយ (Video Conference) ដែលដឹកនាំដោយឯកឧត្តមបណ្ឌិត László MOSÓCZI រដ្ឋលេខាធិការ នៃក្រសួងនវានុវត្តន៍ និងបច្ចេកវិទ្យាហុងគ្រី និងសមាជិកចូលរួមជាឧត្តមមន្រ្តីមកពីក្រសួងដឹកជញ្ជូននៃបណ្តាប្រទេសក្នុងតំបន់អាស៊ី-អឺរ៉ុប និងដៃគូសន្ទនាពាក់ព័ន្ធ។ កិច្ចប្រជុំនេះបានពិភាក្សា និងផ្លាស់ប្ដូរយោបល់លើរបៀបវារៈ និងប្រធានបទសំខាន់ៗ រួមមាន៖ ១)ការធ្វើបទអន្តរាគមន៍ អំពីការអនុវត្តល្អៗរបស់បណ្តាប្រទេសជាដៃគូក្នុងវិស័យដឹកជញ្ជូនតាមប្រព័ន្ធឌីជីថល មិនប៉ះពាល់ដល់បរិស្ថាន និងប្រកបដោយចីរភាព ២)ការផ្លាស់ប្ដូរទស្សនៈស្ដីពីផលប៉ះពាល់នៃមេរោគ កូវីដ១៩ក្នុងវិស័យដឹកជញ្ជូន និង៣)សំណើសម្រាប់កិច្ចសហប្រតិបត្ដិការនាពេលអនាគត។ គួរកត់សម្គាល់ផងដែរថា កម្ពុជាបានចែករំលែកបទពិសោធន៍ជាមួយបណ្តាប្រទេសដទៃទៀតអំពីការប្រើប្រាស់ប្រព័ន្ធស្វ័យប្រវត្តិកម្ម ដែលរួមមាន៖ កម្មវិធីថែទាំផ្លូវ (Road Care Mobile App) ការចុះបញ្ជីយានយន្តតាមប្រព័ន្ធអនឡាញ ការប្រឡងយកបណ្ណបើកបរតាមប្រព័ន្ធអនឡាញ និងអំពីផលប៉ះពាល់ វិធានការ និងសកម្មភាពតាមរបៀបថ្មីសមស្រប ដើម្បីធានាបាននូវការរក្សាគម្លាតសង្គម និងវិធានការបង្ការ ការពារការឆ្លងរីករាលដាលនៃមេរោគកូវីដ១៩ នាពេបច្ចុប្បន្ន តាមការណែនាំរបស់ក្រសួងសុខាភិបាលឱ្យមានប្រសិទ្ធភាព ក៏ដូចជាវិធានការសម្រាប់មេរោគឆ្លងថ្មីផ្សេងទៀតនាពេលអនាគត សម្រាប់សម្រួលដល់ការដឹកជញ្ជូនគ្រប់ប្រភេទ ការតភ្ជាប់ទេសចរណ៍ ពាណិជ្ជកម្មជាដើម ក្នុងតំបន់ ក៏ដូចជារវាងតំបន់ទាំងពីរអាស៊ី-អឺរ៉ុប។ ឯកឧត្ដមរដ្ឋលេខាធិការបានឱ្យដឹងថា៖ ទាក់ទងនឹងរបៀបវារៈចុងក្រោយ ស្តីពីការរៀបចំកិច្ចប្រជុំថ្នាក់រដ្ឋមន្រ្តីដឹកជញ្ជូនអាស៊ី-អឺរ៉ុបលើកក្រោយ ដោយមិនមានមតិយោបល់ពីសមាជិកនៃអង្គប្រជុំ ឯកឧត្តម បណ្ឌិត László MOSÓCZI ប្រធានអង្គប្រជុំបានស្នើឱ្យប្រទេសអាស៊ីទាំងអស់ពិចារណាទទួលយក និងផ្លាស់ប្តូរវេនដឹកនាំ និងរៀបចំកិច្ចប្រជុំថ្នាក់រដ្ឋមន្រ្តីដឹកជញ្ជូនអាស៊ី-អឺរ៉ុប តាមការស្ម័គ្រចិត្តលើកក្រោយ ៕