ក្រសួងសាធារណការនិងដឹកជញ្ជួន នឹងធ្វើការផ្ញើរទៅកាន់ពលរដ្ឋដើម្បីរំលឹកដល់ពលរដ្ឋឲ្យទៅប្តូរប័ណ្ណបើកបរ ប្រសិនប័ណ្ណបើកបរ ហួសសុពលភាព។ ពលរដ្ឋអាចនឹងឃើញសាររំលឹកនោះ ប៉ុន្តែទំនងមិនបានគ្រប់គ្នាទេ។ មានករណីបើពលរដ្ឋបានប្តូរលេខទូរស័ព្ទដៃ ឬមិនបានផ្តល់លេខទូរស័ព្ទ ឲ្យទៅក្រសួង គឺមិនអាចទទួលបានសាររំលឹកពីក្រសួងឡើយ។ ទោះយ៉ាងណាក្រសួងសាធារណការនិងដឹកជញ្ជួន បានប្រាប់ពលរដ្ឋដែលមិនទទួលសារ ឲ្យពិនិត្យមើលប័ណ្ណបើកបររបស់ខ្លួន។ បើហួសសុពលភាព ឬត្រូវប្តូរ និងត្រូវពន្យារ ក្រសួងដាស់តឿនពលរដ្ឋឲ្យទៅប្តូរ ឲ្យបានទាន់ពេលវេលា ចៀសវាងការផាកពិន័យពីសមត្ថកិច្ច។ ក្រសួងបានប្រាប់ពលរដ្ឋថា ពលរដ្ឋអាចទៅប្តូរ និងពន្យារបណ្ណបើកបរ នៅមណ្ឌលផ្តល់ប័ណ្ណបើកបរនៅផ្សារទំនើបអ៊ីអន១ ពីថ្ងៃចន្ទដល់ថ្ងៃអាទិត្យ ពីម៉ោង០៩:០០ព្រឹក ដល់ ០៨:០០យប់ មណ្ឌលផ្តល់បណ្ណបើកបរនៅផ្សារទំនើបអ៊ីអន២ ពីថ្ងៃចន្ទដល់ថ្ងៃអាទិត្យ ពីម៉ោង០៩:០០ព្រឹក ដល់ ១០:០០យប់ និងនៅ អគ្គនាយកដ្ឋានដឹកជញ្ជូនផ្លូវគោក និងមន្ទីរសាធារណការ និងដឹកជញ្ជូន ទូទាំង២៥ រាជធានី-ខេត្ត។ ចំណែកឯកសារ ដែលភ្ជាប់ទៅជាមួយនោះមាន អត្តសញ្ញាណប័ណ្ណសញ្ជាតិខ្មែរ លិខិតបញ្ជាក់កាយសម្បទា(អាចធ្វើនៅទីតាំងផ្ទាល់) រូបថត ៤x៦ ផ្ទៃពណ៌ស ៣សន្លឹក(ថតនៅទីតាំងផ្ទាល់ និង ពាក្យបណ្តឹងបាត់បណ្ណបើកបរបញ្ជាក់ពីប៉ុស្តិ៍រដ្ឋបាល (ក្នុងករណីបាត់បណ្ណបើកបរ)។ គួរជម្រាបថា នៅក្នុងការរឹតបន្តឹង ច្បាប់ចរាចរណ៍ផ្លូវគោកនេះ សមត្ថកិច្ចនឹងធ្វើការផាកពិន័យ១២០ ០០០រៀល ចំពោះអ្នកបើកបរណា ដែលគ្មានប័ណ្ណបើកបរ៕