ស្ពានអាកាសស្តុបផ្សារដីហុយ ដែលទទួលការស្ថាបនាដោយក្រុមហ៊ុនចិន នឹង​ស្ថាបនា​បញ្ចប់​នៅ​មុនចូលឆ្នាំ​ខ្មែរ ២០១៨ ខាងមុខនេះ បន្ទាប់​ពីបាន​បើកកា​រដ្ឋាន​សាងសង់ កាល​ពី​ចុង​ខែ​សីហា​ឆ្នាំ ២០១៦​កន្លង​មក។ លោក សាំ ពិសិដ្ឋ ប្រធាន​មន្ទីរសាធារ​ណការ និង​ដឹកជញ្ជូនរាជធានី​ភ្នំពេញ បាន​អោយ​ដឹង​នៅ​រសៀល​ថ្ងៃទី២ខែមករា​ថា ស្ពាន​អាកាស​ស្តុបផ្សារដីហុយ ​ដែល​ជា​ស្ពាន​អាកាស​ទី​៥​នៅ​កម្ពុជា​ មក​ដល់​ពេលនេះ​ការដ្ឋានទាំង​មូលសម្រេច​ បាន ៨៥%​ហើយ​ក្នុង​នោះ​ គ្រឿង​បង្គុំ​សំណង់​ខាង​ក្រោម​សម្រេច​បាន​១០០% ។ គ្រឿង​បង្គុំសំណង់​ខាងលើ សម្រេច​បាន​៨៥% ​នៅ​សល់​១៥%​ ហើយ​គម្រោង​នៃការដ្នាននេះគ្រោងធ្វើហើយមុនចូលឆ្នាំខ្មែរឆ្នាំ២០១៨ខាងមុខនេះ។​​​ ​ គួរបញ្ជាក់ថាការ​ដ្ឋានរស្ថាបនា​ស្ពានអាកាស ស្តុបផ្សារដីហុយ​ មាន​បណ្តោយ​៩០៥ម៉ែត្រ​ទទឹង១៦.៥ម៉ែត្រ ស្ថិត​នៅ​ប្រសព្វរវាង​មហាវិថី​សហព័ន្ធ​រុស្ស៊ី និង​ផ្លូវ​ហាណូយ​(១០១៩) ​។ វា​​ជា​គម្រោង ហិរញ្ញប្ប​ទាន​របស់សាធារណរដ្ឋ​ប្រជា​មានិតចិន​និង​ទទួល​បា​នសិទ្ធិសាងសង់ ​ដោយ​ក្រុមហ៊ុន សៀងហៃ ហើយ​ត្រួតពិនិត្យ​បច្ចេកទេស​ដោយ​ក្រសួង​សាធារណការ និង​ដឹកជញ្ជូន។ បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៤កន្លែង​រួច​មក​ហើយ​គឺ​ស្ពានអា​កាស​ក្បាលថ្នល់ នៅអតីតរង្វង់​មូលក្បាលថ្នល់ ស្ពាន​អាកាស​ស្ទឹងមានជ័យ ស្ពាន​អាកាស​៧​មករា ស្ថិត​នៅ​ស្តុប​ពេទ្យ​លោក​សង្ឃ និង​ស្ពាន​អាកាស​៥មករា ស្ថិត​នៅ​ស្ដុបតិចណូ ៕