ថ្ងៃពុធ ៩រោច ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៥ ខែមករា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន បានជួបពិភាក្សាការងារជាមួយលោក Li Jing នាយកក្រុមហ៊ុន Cambodia BEIDOU Application។ ជំនួបពិភាក្សានេះមានគោលបំណងសិក្សាពីលទ្ធភាព និងកិច្ចសហប្រតិបត្តិការ ដែលអាចចូលរួមស្វែងរកដំណោះស្រាយក្នុងការកាត់បន្ថយគ្រោះថ្នាក់ចរាចរណ៍ ការដឹកជញ្ជូនទំនិញលើសទម្ងន់កម្រិតកំណត់ ការបើកបរហួសល្បឿនកំណត់ដោយច្បាប់ និងការតាមដានយានយន្តមិនចូលទៅក្នុងស្ថានីយថ្លឹងទម្ងន់ជាដើម។ ឯកឧត្តមទេសរដ្ឋមន្ត្រីបានជំរុញឱ្យក្រុមហ៊ុនធ្វើការសិក្សាជាមួយនឹងអគ្គនាយកដ្ឋានជញ្ជូនផ្លូវគោក និងនាយកដ្ឋានព័ត៌មានវិទ្យា និងទំនាក់ទំនងសាធារណៈ ដើម្បីពិនិត្យលទ្ធភាពប្រើប្រាស់នូវបច្ចេកវិទ្យាទំនើប។ ជាមួយគ្នានោះផងដែរ ក្រុមហ៊ុនបានឯកភាពថានឹងធ្វើការសាកល្បងប្រព័ន្ធរបស់ខ្លួន (Proof of Concept) ហើយបញ្ជូនមកក្រសួងសាធារណការ និងដឹកជញ្ជូន ដើម្បីពិនិត្យពិចារណាសម្រេចលើកិច្ចសហប្រតិបត្តិការនាពេលអនាគត៕