ថ្ងៃចន្ទ ១២កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៦ ខែមករា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំក្រុមប្រឹក្សាជាតិភស្តុភារកម្មលើកទីមួយដើម្បីពិនិត្យ និងអនុម័តសេចក្តីព្រាងផែនការមេអន្តរកាល ស្ដីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម។ កិច្ចប្រជុំនេះបានប្រព្រឹត្តទៅក្រោមអធិបតីភាពឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយក រដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិភស្តុភារកម្ម ដោយមានការចូលរួមពីឯកឧត្តម សុក ស៊ីផាន់ណា ទីប្រឹក្សាជាន់ខ្ពស់របស់រាជរដ្ឋាភិបាល ឯកឧត្តម ឈាង ពេជ្រ អគ្គ នាយកនៃអគ្គនាយកដ្ឋានភស្តុភារកម្ម និងជាប្រធានលេខាធិការដ្ឋានក្រុមប្រឹក្សាជាតិភស្តុភារកម្ម និងភាគី ពាក់ព័ន្ធផងដែរ។ ឯកឧត្តមទេសរដ្ឋមន្ត្រី បានលើកឡើងអំពីសារសំខាន់នៃការបង្កើតផែនការមេថ្នាក់ជាតិភស្តុភារកម្ម យោងតាមតម្រូវការចាំបាច់នៃផែនការយុទ្ធសាស្រ្តអភិវឌ្ឍន៍ជាតិឆ្នាំ២០១៩-២០២៣ និងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ក្នុងគោលបំណងបញ្ចុះតម្លៃដឹកជញ្ជូន និងភស្តុភារកម្ម ប្រកបដោយភាពប្រកួតប្រជែង ដែលអាចឱ្យកម្ពុជាមានឱកាសទាក់ទាញវិនិយោគបង្កើតការងារធ្វើជូន ប្រជាពលរដ្ឋ។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រីបានជម្រាបជូនអង្គប្រជុំអំពីគម្រោងមួយចំនួនដែលបាន និងកំពុងអនុវត្តបន្តនៅក្នុងក្របខ័ណ្ឌកម្ពុជា និងក្របខ័ណ្ឌអាស៊ាន រួមមាន៖ គម្រោងអាស៊ានហាយវ៉េលេខ១ គម្រោងបណ្តាញផ្លូវដែលជាច្រកសេដ្ឋកិច្ចសំខាន់ៗ និងការតភ្ជាប់ទៅកាន់តំបន់ប៉ូលសេដ្ឋកិច្ច ដូចជា៖ ប៉ោយប៉ែត និងបាវិតជាដើម៕