ខេត្តព្រះសីហនុ៖ ថ្ងៃសុក្រ ២កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៧ ខែធ្នូ ឆ្នាំ២០១៩ ឯកឧត្តម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបញ្ចុះបឋមសិលាសាងសង់និវេសនដ្ឋាន ជូនប្រធានមន្ទីរសាធារណការ និងដឹកជញ្ជូនខេត្តព្រះសីហនុ ដោយមានការចូលរួមពីថ្នាក់ដឹកនាំក្រសួង និងមន្ត្រីរាជការនៃមន្ទីរសាធារណការ និងដឹកជញ្ជូន ផងដែរ។ សូមជម្រាបជូនថា៖ អគារនិវេសនដ្ឋានសាងសង់នៅក្នុងបរិវេណមន្ទីរសាធារណការ និងដឹកជញ្ជូនខេត្តព្រះសីហនុផ្ទាល់ ដែលមានទទឹង១៦ម៉ែត្រ ជម្រៅ១៥ម៉ែត្រ កម្ពស់៤,៥០ ម៉ែត្រ ឋិតនៅជាន់ផ្ទាល់ដី មានបន្ទប់ការិយាល័យ និងបន្ទប់ស្នាក់នៅសម្រាប់ប្រធានមន្ទីរ បន្ទប់ស្នាក់នៅសម្រាប់អ្នកបើកបរ និងមានបន្ទប់បាយផងដែរ ដើម្បីសម្រួលដល់ការបំពេញការងាររបស់ប្រធានមន្ទីរ ដែលត្រូវផ្ទេរឱ្យទៅបំពេញការងារនៅទីនោះ។ អគារនិវេសនដ្ឋាន និងផ្ទះសំណាក់នេះ គ្រោងចំណាយរយៈពេលសាងសង់ចំនួន៥ខែ ចាប់គិតពីថ្ងៃបញ្ចុះបឋមសិលាសាងសង់ ដែលចំណាយថវិកាប្រមាណជា ៥៥.០០០ដុល្លារសហរដ្ឋអាមេរិក ៕