ភ្នំពេញ៖ អន្តរគណៈកម្មការជំនាញទាំង១០ រដ្ឋសភាកម្ពុជា នៅថ្ងៃទី១១មិថុនានេះ បានបើកកិច្ចប្រជុំរួមគ្នាជាមួយតំណាងរាជរដ្ឋាភិបាល ដើម្បីពិនិត្យ និងពិភាក្សាសម្រេចលើសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់។ យន្តការគតិយុត្តិថ្មីនេះ ត្រូវបានរៀបចំឡើងក្នុងទម្រង់ជាច្បាប់ដែលត្រូវប្រកាសប្រើប្រាស់ជាការប្រញាប់ ដើម្បីឆ្លើយតបទៅនឹងការវិវត្តនៃសេដ្ឋកិច្ចជាតិ និន្នាការបច្ចេកវិទ្យាយានយន្តទំនើប ព្រមទាំងឆ្លើយតបនឹងយន្តការកំណែទម្រង់រចនាសម្ព័ន្ធវិស័យដឹកជញ្ជូននិងឡូជីស្ទិកនៅកម្ពុជាឱ្យកាន់តែមានសមត្ថភាពប្រកួតប្រជែងខ្ពស់។កិច្ចប្រជុំនៅថ្ងៃនេះ ដឹកនាំដោយលោកស្រី និន សាផុន គណៈកម្មការទី៩ នៃរដ្ឋសភា ដោយមានការចូលរួមការពារសេចក្តីព្រាងច្បាប់ពីភាគីរាជរដ្ឋាភិបាល ដែលដឹកនាំដោយលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងសមាជិក សមាជិកានៃគណៈកម្មការជំនាញទាំង១០ នៃស្ថាប័ននីតិប្បញ្ញត្តិ និងមន្ត្រីជាន់ខ្ពស់មកពីអន្តរក្រសួងពាក់ព័ន្ធជាច្រើនរូបទៀត។ នៅក្នុងអង្គប្រជុំ លោក ប៉េង ពោធិ៍នា បានផ្តល់ការបំភ្លឺ និងពន្យល់លម្អិតអំពីបច្ចេកទេសគតិយុត្តិថា វិសោធនកម្មច្បាប់ស្តីពីផ្លូវថ្នល់នេះ នឹងបង្កើតឱ្យមានរបត់ថ្មីមួយក្នុងការគ្រប់គ្រងហេដ្ឋារចនាសម្ព័ន្ធជាតិ តាមរយៈការកំណត់បទដ្ឋានបច្ចេកទេសទំហំយានយន្តឱ្យបានច្បាស់លាស់ និងការដាក់ចេញនូវវិធានការក្តៅក្នុងការរឹតបន្តឹង ត្រួតពិនិត្យ ព្រមទាំងបង្ក្រាបយានយន្តដឹកជញ្ជូនលើសទម្ងន់កម្រិតកំណត់ ដែលជាឃាតកបំផ្លាញផ្លូវជាតិ។លោក ប៉េង ពោធិ៍នា បានបញ្ជាក់ថា ចំណុចពិសេសដែលត្រូវបានបង្កើតឡើងនៅក្នុងច្បាប់ថ្មីនេះ គឺការរៀបចំ និងការប្រព្រឹត្តទៅរបស់គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដើម្បីធានាបាននូវការអនុវត្តច្បាប់ប្រកបដោយតម្លាភាព សមធម៌ គ្មានការលើកលែង តាមរយៈការធ្វើបច្ចុប្បន្នភាពកម្រិតការពិន័យអន្តរការណ៍ និងទោសប្បញ្ញត្តិឱ្យកាន់តែធ្ងន់ធ្ងរ និងសមស្របទៅនឹងស្ថានភាពជាក់ស្តែងនៃបទល្មើស។ លើសពីនេះ រដ្ឋមន្ត្រីក្រសួងសាធារណការក៏បានគូសបញ្ជាក់បន្ថែមថា ច្បាប់នេះនឹងជួយសម្រួលដល់អ្នកប្រើប្រាស់ផ្លូវឱ្យកាន់តែមានសុវត្ថិភាពខ្ពស់ កាត់បន្ថយគ្រោះថ្នាក់ចរាចរណ៍ និងធានាបាននូវចីរភាព និងគុណភាពនៃហេដ្ឋារចនាសម្ព័ន្ធផ្លូវថ្នល់ ដែលជួយសន្សំសំចៃថវិការដ្ឋរាប់លានដុល្លារក្នុងការជួសជុលប្រចាំឆ្នាំ។ ផលចំណេញផ្នែកសេដ្ឋកិច្ចដ៏ធំធេងមួយទៀត គឺការជួយលើកទឹកចិត្ត និងសម្រួលដល់ការកាត់បន្ថយចំណាយប្រតិបត្តិការដឹកជញ្ជូន និងថ្លៃដើមឡូជីស្ទិករបស់វិស័យឯកជនដែលជាយុទ្ធសាស្ត្រគន្លឹះក្នុងការលើកកម្ពស់សមត្ថភាពប្រកួតប្រជែងពាណិជ្ជកម្មរបស់កម្ពុជា នៅលើឆាកអន្តរជាតិ ព្រមទាំងជួយបង្កើនទំនុកចិត្តដល់វិនិយោគិនទាំងក្នុង និងក្រៅប្រទេស ក្នុងការមកបណ្តាក់ទុនរយៈពេលវែងនៅកម្ពុជា។ ឆ្លងតាមរយៈការដេញដោល និងការពិភាក្សាផ្លាស់ប្តូរមតិយោបល់យ៉ាងផុសផុល លោកស្រី និន សាផុន ក្នុងនាមគណៈកម្មការទី៩ និងតំណាងអន្តរគណៈកម្មការជំនាញទាំងអស់របស់រដ្ឋសភា បានប្រកាសគាំទ្រយ៉ាងពេញទំហឹងចំពោះសេចក្តីព្រាងច្បាប់ដ៏មានសារៈសំខាន់នេះ ដោយវាយតម្លៃខ្ពស់ចំពោះស្មារតីសហការ និងការផ្តល់ធាតុចូលគ្រប់ជ្រុងជ្រោយពីភាគីរាជរដ្ឋាភិបាល។ គួបញ្ជាក់ថា បច្ចុប្បន្ន រដ្ឋសភាកំពុងជំរុញនីតិវិធីផ្ទៃក្នុង ដើម្បីរៀបចំប្រមូលមតិយោបល់ចុងក្រោយ ក្នុងទិសដៅដាក់បញ្ចូលសេចក្តីព្រាងច្បាប់ប្រញាប់នេះទៅក្នុងរបៀបវារៈនៃសម័យប្រជុំវិសាមញ្ញ ឬសម័យប្រជុំពេញអង្គរដ្ឋសភានាពេលដ៏ខ្លីខាងមុខនេះ ដើម្បីធ្វើការអនុម័តជាផ្លូវការផងដែរ៕