ផ្លូវពីព្រលានសៀមរាបថ្មីមកក្រុងសៀមរាបដែលមានចម្ងាយជាង ២០ គីឡូម៉ែត្រ ស្ថិតនៅក្នុងដំណាក់កាលសិក្សាបឋមនៅឡើយ ខណៈដែលគម្រោងស្ថាបនាផ្លូវនេះត្រូវសិក្សាជាច្រើនដំណាក់កាលមុនឈានទៅអនុវត្តបើកការដ្ឋានសាងសង់។កាលពីពេលថ្មីៗនេះ មន្រ្តីក្រសួងសាធារណការ និងដឹកជញ្ជូន បានបើកកិច្ចប្រជុំដើម្បីពិនិត្យពិភាក្សាពីការអនុវត្តគម្រោងស្ថាបនាផ្លូវពីក្រុងសៀមរាបឆ្ពោះត្រង់ទៅព្រលានយន្តហោះថ្មី ដោយប្រើប្រាស់ថវិកាពីធនាគារវិនិយោគហេដ្ឋារចនាសម្ព័ន្ធអាស៊ី (AIIB)។ កិច្ចប្រជុំរៀបចំឡើងក្រោមវត្តមាន លោក ខាន់ ម៉ាណេ រដ្ឋលេខាធិការក្រសួងសាធារណការ និងដឹកជញ្ជូន សម្រាប់រៀបចំក្រុមការងារគ្រប់គ្រង ការអនុវត្តគម្រោងស្ថាបនាផ្លូវពីក្រុងសៀមរាបឆ្ពោះត្រង់ទៅព្រលានយន្តហោះថ្មីខេត្តសៀមរាប។ការជំរុញស្ថាបនាផ្លូវពីក្រុងសៀមរាបឆ្ពោះទៅព្រលានថ្មីនៅក្នុងស្រុកសូត្រនិគម ក៏ជាគោលដៅចង់បានរបស់វិស័យឯកជន ដែលធ្វើការពាក់ព័ន្ធវិស័យទេសចរណ៍នៅក្នុងខេត្តសៀមរាប ខណៈការកែលម្អផ្លូវថ្មីនេះនឹងជួយកាត់បន្ថយចម្ងាយធ្វើដំណើរ និងសម្រួលការកកស្ទះចរាចរណ៍ និងចូលរួមថែរក្សាបរិស្ថាន។លោក ហ្វីលីប កៅ ប្រធានក្លិបទេសចរណ៍ក្នុងខេត្តសៀមរាបបានគូសបញ្ជាក់ថា លោកចង់ឲ្យគម្រោងស្ថាបនាផ្លូវពីព្រលានយន្តហោះខេត្តសៀមរាបថ្មីមកក្រុងសៀមរាប ឈានទៅបើកការដ្ឋានសាងសង់ឲ្យបានឆាប់ ដោយសារមើលឃើញពីផលចំណេញពីផ្លូវដ៏មានសក្តានុពលនេះ ដែលអាចជួយសម្រួលដល់ការធ្វើដំណើររបស់ភ្ញៀវទេសចរ រួមទាំងនឹងអាចកាត់បន្ថយថ្លៃដឹកជញ្ជូនបានមួយចំណែកផងដែរ។ ពាក់ព័ន្ធការស្ថាបនាផ្លូវទៅព្រលានថ្មីសៀមរាប លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានប្រាប់កម្ពុជាថ្មីថា គម្រោងផ្លូវនេះស្ថិតនៅក្នុងដំណាក់កាលសិក្សាបឋម មិនទាន់ឈានដល់កម្រិតអនុវត្តនៅឡើយទេ។ លោកថា ដោយសារគម្រោងស្ថិតនៅក្នុងដំណាក់កាលដំបូង ត្រូវឆ្លងកាត់ការសិក្សាលម្អិតបន្ថែមមុនឈានដល់ការបើកការដ្ឋានសាងសង់៕