ក្រុងសំរោងនៅក្នុងខេត្តឧត្តរមានជ័យមានការប្រែប្រួលមុខមាត់រីកចម្រើន ខណៈការអភិវឌ្ឍហេដ្ឋារចនាសម្ព័ន្ធ និងការរៀបចំប្រជុំជនក្រុងកាន់តែមានសោភណភាព និងការអភិវឌ្ឍពីមួយថ្ងៃទៅមួយថ្ងៃ។ លោក ប៊ុត វ៉ាន់ដេត អភិបាលរងនៃគណៈអភិបាលក្រុងសំរោងបានឲ្យកម្ពុជាថ្មីដឹងថា រដ្ឋបាលក្រុងបានបញ្ចប់ការរៀបចំដំឡើងបង្គោលភ្លើងបំភ្លឺសូឡាចាប់ពីព្រំប្រទល់ស្រុកចុងកាល់តាមផ្លូវជាតិលេខ ៦៨ ដល់ទីប្រជុំជនក្រុងមានប្រវែងជិត ១០ គីឡូម៉ែត្រ ដោយបានដំឡើងបញ្ចប់ចំនួន ៤៥៥ ដើម។លោកថា ផែនការបន្តអាជ្ញាធរនឹងបន្តដំឡើងបង្គោលបំភ្លឺភ្លើងសូឡាចាប់ពីទីប្រជុំជនក្រុងឆ្ពោះទៅច្រកទ្វារព្រំដែនអូរស្មាច់ដែលមានប្រវែង ៣៣ គីឡូម៉ែត្រ ដែលត្រូវការបង្គោលប្រហែល ១,៣៣៤ ដើម និងចាប់ពីប្រជុំជនក្រុងទៅស្រុកបន្ទាយអំពិលតាមផ្លូវជាតិលេខ ៥៦ ដែលមានប្រវែងជាង ៩ គីឡូម៉ែត្រ ដែលត្រូវការបង្គោលប្រហែល ៣៨០ ដើម។បើតាមលោក ប៊ុត វ៉ាន់ដេត ការរៀបចំបង្គោលភ្លើងសូឡាទៅច្រកទ្វារព្រំដែនអន្តរជាតិអូរស្មាច់ និងទៅស្រុកបន្ទាយអំពិល ត្រូវអនុវត្តជាជំហានៗ ហើយក៏ត្រូវការការគាំទ្រពីសប្បុរសជនផងដែរ។ការរៀបចំអភិវឌ្ឍក្រុងសំរោងគឺអនុវត្តស្របតាមការណែនាំពីលោក មាន ចាន់យ៉ាដា អភិបាលខេត្ត ដែលជំរុញឲ្យបណ្តារដ្ឋបាលក្រុងស្រុកខិតខំកែប្រែមុខខេត្តឧត្តរមានជ័យ តាមទស្សនវិស័យលែងឲ្យខេត្តឧត្តរមានជ័យជាខេត្តកម្សត់ជាងគេ ហើយត្រូវតែមានការអភិវឌ្ឍប្រកួតប្រជែងស្មើមុខស្មើមាត់ជាមួយបណ្តាខេត្តក្រុងផ្សេងទៀត។ កាខិតខំជំរុញអភិវឌ្ឍកែប្រែមុខមាត់ក្រុងសំរោងដែលមានភូមិសាស្រ្តជាប់ជាមួយប្រទេសថៃ ក៏ទទួលបានការយកចិត្តទុកដាក់ពីលោក ផុន ចាន់និល អភិបាលនៃគណៈអភិបាលក្រុងសំរោង ខណៈដែលលោកតែងតែចុះត្រួតពិនិត្យការអនុវត្តការងារជាប្រចាំ៕