ផ្លូវជាតិលេខ២១បេ ប្រែមុខមាត់ថ្មី ស្រឡះស្អាត! មហាជនសាទរការដឹកនាំដ៏ម៉ឺងម៉ាត់របស់ឯកឧត្តម គួច ចំរើន និងកោតសរសើរយន្តការអនុវត្តប្រកបដោយតម្លាភាព! (កណ្ដាល)៖ ទិដ្ឋភាពតាមបណ្ដោយផ្លូវជាតិលេខ២១បេ នាពេលបច្ចុប្បន្ន បានប្រែក្លាយយ៉ាងគួរឱ្យកត់សម្គាល់ ពីតំបន់ដែលធ្លាប់មានសំណង់ និងការប្រើប្រាស់ចំណីផ្លូវមួយចំនួន មកជាផ្លូវដ៏ធំទូលាយ ស្រឡះស្អាត មានសណ្ដាប់ធ្នាប់ និងសោភ័ណភាពលេចធ្លោ ធ្វើឱ្យប្រជាពលរដ្ឋ និងអ្នកធ្វើដំណើរជាច្រើនសម្ដែងការពេញចិត្ត និងកោតសរសើរចំពោះការដឹកនាំដ៏ម៉ឺងម៉ាត់ ប្រាកដប្រជា និងមានប្រសិទ្ធភាពរបស់ឯកឧត្តម គួច ចំរើន អភិបាលខេត្តកណ្ដាល។ ប្រជាពលរដ្ឋលើកឡើងថា លទ្ធផលដែលកំពុងមើលឃើញនាពេលនេះ មិនមែនកើតឡើងដោយចៃដន្យនោះទេ ប៉ុន្តែជាផ្លែផ្កានៃការដឹកនាំប្រកបដោយចក្ខុវិស័យ ការហ៊ានសម្រេចចិត្ត និងការតាមដានជាប់ជាប្រចាំរបស់ថ្នាក់ដឹកនាំខេត្ត ក្នុងគោលបំណងលើកកម្ពស់សណ្ដាប់ធ្នាប់សាធារណៈ បរិស្ថាន សោភ័ណភាពទីក្រុង និងសុវត្ថិភាពចរាចរណ៍ឱ្យកាន់តែល្អប្រសើរ។ ជាក់ស្ដែង ក្រោយពីរដ្ឋបាលខេត្តបានចេញសេចក្ដីជូនដំណឹងចំនួន ៣លើក ដោយផ្ដល់ពេលវេលា និងការពន្យល់គ្រប់គ្រាន់ដល់ប្រជាពលរដ្ឋ និងអាជីវករ ភាគច្រើនបានចូលរួមសហការយ៉ាងសកម្ម និងស្ម័គ្រចិត្តក្នុងការរុះរើសំណង់ ស្លាកយីហោ របង និងសម្ភារៈផ្សេងៗដែលរំលោភលើចំណីផ្លូវ និងចិញ្ចើមផ្លូវ ស្របតាមគោលការណ៍ដែលអាជ្ញាធរបានកំណត់។ អ្វីដែលទទួលបានការកោតសរសើរពីមហាជននោះ គឺការអនុវត្តដែលមានលក្ខណៈបើកចំហ តម្លាភាព និងស្មើភាព ដោយមិនរើសអើង និងមិនមានការលើកលែងជាពិសេសចំពោះបុគ្គលណាម្នាក់ឡើយ។ ប្រជាពលរដ្ឋជាច្រើនបានលើកឡើងថា ការរំដោះចំណីផ្លូវត្រូវតែអនុវត្តឱ្យស្មើគ្នា ទាំងផ្ទះមន្ត្រីរាជការ អ្នកមានអំណាច អាជីវករ និងប្រជាពលរដ្ឋទូទៅ ពោលគឺអនុវត្តតាមគោលការណ៍ ១២ម៉ែត្រសងខាងដូចគ្នា ដើម្បីធានាបាននូវយុត្តិធម៌ សមភាព និងការគោរពច្បាប់សម្រាប់មនុស្សគ្រប់រូប។ ប្រភពពីមហាជនបានបញ្ជាក់ថា ការចេញសេចក្ដីជូនដំណឹងជាបន្តបន្ទាប់មុនពេលអនុវត្ត គឺជាវិធីសាស្ត្រដ៏ល្អមួយដែលបង្ហាញពីការគោរពសិទ្ធិប្រជាពលរដ្ឋ និងផ្ដល់ឱកាសឱ្យម្ចាស់ទីតាំងនីមួយៗមានពេលវេលាត្រៀមខ្លួន និងចូលរួមសហការជាមួយអាជ្ញាធរ។ ទន្ទឹមនឹងនេះ មហាជនក៏បានកោតសរសើរចំពោះតួនាទីដ៏សំខាន់របស់ឯកឧត្តម ណុប តារា អភិបាលរងខេត្តកណ្ដាល ដែលត្រូវបានគេចាត់ទុកថាជាសេនាធិការដ៏ឆ្នើមមួយរូបរបស់រដ្ឋបាលខេត្ត។ ក្នុងដំណើរការអនុវត្តជាក់ស្ដែង ឯកឧត្តមបានដឹកនាំក្រុមការងារចុះសម្របសម្រួលដោយផ្ទាល់ ប្រកបដោយភាពទន់ភ្លន់ អត់ធ្មត់ មានវិជ្ជាជីវៈ និងគោរពប្រជាពលរដ្ឋ ប៉ុន្តែនៅតែរក្សាបាននូវភាពម៉ឺងម៉ាត់ និងការអនុវត្តគោលការណ៍ឱ្យបានដាច់ខាត។ ប្រជាពលរដ្ឋជាច្រើនបានលើកឡើងថា ភាពជាអ្នកដឹកនាំដែលចេះស្ដាប់ ចេះពន្យល់ និងចេះសម្របសម្រួលរបស់ឯកឧត្តម ណុប តារា បានធ្វើឱ្យដំណើរការរំដោះចំណីផ្លូវប្រព្រឹត្តទៅដោយរលូន កាត់បន្ថយការយល់ច្រឡំ និងបង្កើនការយល់ស្របពីសំណាក់ប្រជាពលរដ្ឋយ៉ាងច្រើន។ នៅព្រឹកថ្ងៃទី១ ខែមិថុនា ឆ្នាំ២០២៦នេះ អាជ្ញាធរខេត្តកណ្ដាល អាជ្ញាធរក្រុងតាខ្មៅ និងអាជ្ញាធរសង្កាត់តាខ្មៅ នៅតែបន្តចុះរៀបចំ និងត្រួតពិនិត្យការអនុវត្តនៅតាមទីតាំងជាក់ស្ដែងយ៉ាងសកម្ម ដើម្បីធានាថាការរំដោះចំណីផ្លូវ និងការរៀបចំសណ្ដាប់ធ្នាប់សាធារណៈសម្រេចបានតាមផែនការដែលបានកំណត់។ តាមការយល់ឃើញរបស់មហាជន សកម្មភាពនេះគឺជាគំរូដ៏ល្អនៃការគ្រប់គ្រងរដ្ឋបាលសាធារណៈ ដែលផ្ដោតលើផលប្រយោជន៍រួមជាចម្បង។ ការធ្វើឱ្យផ្លូវជាតិលេខ២១បេមានភាពស្រឡះ ស្អាត និងមានរបៀបរៀបរយ មិនត្រឹមតែជួយសម្រួលចរាចរណ៍ប៉ុណ្ណោះទេ ប៉ុន្តែថែមទាំងលើកកម្ពស់មុខមាត់ក្រុងតាខ្មៅ និងខេត្តកណ្ដាលទាំងមូល ឱ្យកាន់តែស្រស់ស្អាត ស៊ីវិល័យ និងសមស្របទៅនឹងការអភិវឌ្ឍន៍នាពេលបច្ចុប្បន្ន និងអនាគត។ មហាជនក៏បានបង្ហាញក្ដីសង្ឃឹមថា ការរៀបចំសណ្ដាប់ធ្នាប់ ការរំដោះចំណីផ្លូវ និងការអនុវត្តច្បាប់ប្រកបដោយតម្លាភាព ស្មើភាព និងគ្មានការលើកលែងនេះ នឹងបន្តពង្រីកទៅកាន់តំបន់ផ្សេងៗទៀត ដើម្បីរួមចំណែកកសាងខេត្តកណ្ដាលឱ្យក្លាយជាខេត្តគំរូមួយដែលមានសណ្ដាប់ធ្នាប់ល្អ បរិស្ថានស្អាត និងការអភិវឌ្ឍប្រកបដោយចីរភាព៕