កិច្ចប្រជុំដេីម្បីណែនាំអំពីសមាសភាពក្រុមការងារគណៈពង្រឹងថ្មី ការជជែកពិភាក្សា និងណែនាំទិសដៅការងារអនុវត្ត ព្រមទាំងការផ្សព្វផ្សាយខ្លឹមសារនៃកិច្ចសហប្រតិបត្តិតំបន់ត្រីកោណការអភិវឌ្ឍន៍ CLV-DTA ស្រុកកោះធំ ៖ នាព្រឹកថ្ងៃទី១៧ ខែសីហា ឆ្នាំ២០២៤ នៅសាលប្រជុំគណបក្ស ឃុំកោះធំ-ក ក្នុងស្រុកកោះធំ ខេត្តកណ្តាល ឯកឧត្តម ឡេង ធនយុទ្ធា អនុប្រធានក្រុមការងារគណបក្សចុះមូលដ្ឋានស្រុកកោះធំ ទទួលជួយឃុំកោះធំ-ក បានដឹកនាំកិច្ចប្រជុំ ដេីម្បីណែនាំអំពីសមាសភាពក្រុមការងារគណៈពង្រឹងថ្មី ការជជែកពិភាក្សា និងតម្រង់ទិសដៅការងារអនុវត្ត ព្រមទាំងធ្វើការផ្សព្វផ្សាយខ្លឹមសារនៃកិច្ចសហប្រតិបត្តិការតំបន់ត្រីកោណការអភិវឌ្ឍន៍ CLV-DTA ។ កិច្ចប្រជុំនេះមានសមាសភាពចូលរួមពី ឯកឧត្តម អនុប្រធានក្រុមការងារគណបក្សចុះមូលដ្ឋានស្រុកកោះធំ ទទួលជួយឃុំកោះធំ-ក ទាំង ៤រូប និង លោក លោកស្រី ថ្នាក់ដឹកនាំ សមាជិកសមាជិកា ក្រុមការងារគណបក្សចុះមូលដ្ឋានជួយឃុំកោះធំ-ក និង ភូមិចំណុះឃុំជាច្រើនរូបផងដែរ។ កិច្ចប្រជុំធ្វើឡើង ដើម្បីឱ្យក្រុមការងារ នៃគណៈអចិន្ត្រៃយ៍ក្រុមការងារគណបក្សចុះមូលដ្ឋានឃុំកោះធំ-ក បានណែនាំអំពីសមាសភាពក្រុមការងារគណៈពង្រឹងថ្មី ចុះមូលដ្ឋានឃុំកោះធំ-ក និង ក្រុមការងារចុះមូលដ្ឋាននៅតាមបណ្តាភូមិទាំង៧ ពិនិត្យលើគោលការណ៍ផ្តល់ឧបត្ថម្ភសម្រាប់អ្នកសម្រាលកូន និងសមាជិកគ្រួសារ ទទួលមរណភាព និងពិភាក្សាលើបញ្ហាប្រឈម សំណូមពរចាំបាច់ផ្សេងៗ និងការណែនាំអំពីទិសដៅ អនុវត្តបន្ត សម្រាប់ការងារចុះមូលដ្ឋាននៅឃុំកោះធំ-ក ព្រមទាំងការងារពាក់ព័ន្ធផ្សេងៗ ពិសេសពិភាក្សាស្ថានការណ៍សង្គមបច្ចុប្បន្ន ដែលពាក់ព័ន្ធកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ផងដែរ។ នាឱកាសនោះដែ ឯកឧត្ដមអនុប្រធានក្រុមការងារ ក៏បានធ្វើការផ្សព្វផ្សាយអំពីកិច្ចសហប្រតិបត្តិការតំបន់ត្រីកោណរអភិវឌ្ឍន៍ CLV-DTA ដែលជាគំនិតផ្តួចផ្តើមរបស់ សម្តេចតេជោ ហ៊ុន សែន ដោយបានរំលេចនូវសាវតារពាក់ព័ន្ធ គោលបំណង ទិសដៅ និងអត្ថប្រយោជន៍ដែលទទួលបានពីកិច្ចសហប្រតិបត្តិការនេះ។ កិច្ចសហប្រតិបត្តិការនេះ ត្រូវបានអនុវត្តដេីម្បីធ្វេីយ៉ាងណា ធានា ផ្តល់អត្ថប្រយោជន៍ដល់សេដ្ឋកិច្ច និងសង្គម ជំរុញការអភិវឌ្ឍតំបន់ព្រំដែននៃខេត្តជាប់ព្រំដែនឱ្យបានល្អប្រសើរ។ ឯកឧត្ដម បានគូសបញ្ជាក់បន្ថែមថា កម្ពុជាមិនមែនមានតែកិច្ចការ CLV-DTA នេះទេ ពោលគឺមានកិច្ចសហប្រតិបត្តិការផ្សេងៗជាច្រើនទៀត ដូចជា CLMV, ASEAN, មេគង្គ ជាដើម សុទ្ធតែនាំយកប្រយោជន៍ដល់កម្ពុជា។ ទន្ទឹមនោះផងដែរ អង្គប្រជុំបានចូលរួមចែករំលែកនូវគំនិតមតិយោបល់យ៉ាងផុលផុស ដូចជាបទពិសោធន៍នៃការអនុវត្តកិច្ចសហប្រតិបត្តិការរបស់កម្ពុជា ជាមួយបណ្តាប្រទេសជិតខាង ដែលកម្ពុជាបានចូលរួមជាភាគីហត្ថលេខី ប្រកបដោយការទទួលខុសត្រូវ និងទាញយកប្រយោជន៍សម្រាប់ការអភិវឌ្ឍសេដ្ឋកិច្ច និងសង្គមកម្ពុជា។ ជាមួយនោះដែរក៏មានការស្នេីឱ្យក្រុមការងារគណៈពង្រឹងសហការជាមួយក្រុមការងារនៅមូលដ្ឋាន រៀបចំក្រុមជនបង្គោលក្នុងមូលដ្ឋាន ដេីម្បីទទួលផ្សព្វផ្សាយខ្លឹមសារពិតនៃកិច្ចសហប្រតិបត្តិការនេះ ដល់ពលរដ្ឋនៅក្នុងមូលដ្ឋាន ឱ្យបានយល់ដឹង និងចូលរួមទប់ស្កាត់ព្រឹត្តិការណ៍នានា ដែលនាំឱ្យប៉ះពាល់ដល់សុខសន្តិភាព៕