កិច្ចប្រជុំក្រុមការងារបច្ចេកទេស ស្តីពីការតាមដាន និងត្រួតពិនិត្យបច្ចេកទេស និងគុណភាពនៃការជួសជុល និងថែទាំផ្លូវរបស់ក្រុមហ៊ុនគ្លូប៊ល ហ្រ្គីន (ខេមបូឌា) អេនើជី ឌីវេឡុបមេន ឯ.ក ទីស្ដីការក្រសួង៖ នាថ្ងៃអង្គារ ទី១៤ ខែតុលា ឆ្នាំ២០២៥ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស និងជាប្រធានក្រុមការងារបច្ចេកទេសនៃគណៈកម្មការអន្តរក្រសួង ដើម្បីតាមដាន និងត្រួតពិនិត្យបច្ចេកទេស និងគុណភាពនៃការជួសជុល និងថែទាំផ្លូវរបស់ក្រុមហ៊ុនគ្លូប៊ល ហ្រ្គីន (ខេមបូឌា) អេនើជី ឌីវេឡុបមេន ឯ.ក បានអញ្ជើញដឹកនាំកិច្ចប្រជុំពិភាក្សាពិនិត្យលទ្ធផលការងារ និងបញ្ហាប្រឈមលើកំណាត់ផ្លូវដែលក្រុមហ៊ុនដឹកជញ្ជូនឆ្លងកាត់ ដែលមានការចូលរួមពីលោកប្រធាន អនុប្រធាន និងសមាជិកក្រុមការងារបច្ចេកទេសនៃគណៈកម្មការអន្តរក្រសួង រួមមានក្រសួងសាធារណការ និងដឹកជញ្ជូន និងក្រសួងរ៉ែ និងថាមពល ព្រមទាំងតំណាងរដ្ឋបាលខេត្ត និងមន្ទីរសាធារណការ និងដឹកជញ្ជូន ខេត្តកំពង់ធំ ខេត្តកំពង់ឆ្នាំង ខេត្តព្រះវិហារ និងខេត្តស្ទឹងត្រែង។ កិច្ចប្រជុំនេះ រៀបចំឡើងក្នុងគោលបំណងពិនិត្យ និងតាមដានវឌ្ឍនភាពការងារជួសជុល និងថែទាំផ្លូវដែលក្រុមហ៊ុនដឹកជញ្ជូនឆ្លងកាត់ និងពិនិត្យលើបញ្ហាប្រឈមនានា ដើម្បីស្វែងរកនូវដំណោះស្រាយ ដោយធានាបានថាកំណាត់ផ្លូវទាំងនោះត្រូវបានជួសជុល និងថែទាំមានគុណភាពស្របទៅតាមបទដ្ឋានបច្ចេកទេស ព្រមទាំងមានសុវត្ថិភាពដល់អ្នកប្រើប្រាស់ផ្លូវ។ ក្នុងឱកាសនោះ ឯកឧត្តមប្រធានកិច្ចប្រជុំ បានផ្ដល់អនុសាសន៍ឱ្យក្រុមហ៊ុនបន្តយកចិត្តទុកដាក់ជួសជុលថែទាំកំណាត់ផ្លូវដែលក្រុមហ៊ុនដឹកជញ្ជូនឆ្លងកាត់បន្ថែមទៀត ពិសេសជួសជុលរាល់ការខូចខាតកំណាត់ផ្លូវបច្ចុប្បន្ន ហើយក្រុមការងារត្រួតពិនិត្យត្រូវបន្តពិនិត្យតាមដានលើបច្ចេកទេសនៃការអនុវត្តការងាររបស់ក្រុមហ៊ុន សំដៅទទួលបាននូវគុណភាពផ្លូវស្របទៅតាមបទដ្ឋានបច្ចេកទេស៕