កិច្ចប្រជុំលក្ខណៈបច្ចេកទេស ដើម្បីពិនិត្យ និងពិភាក្សាលើរបាយការណ៍សិក្សាសមិទ្ធិលទ្ធភាព នៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ ទីស្តីការក្រសួង៖ នាថ្ងៃទី២៧ ខែឧសភាឆ្នាំ២០២៤ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំលក្ខណៈបច្ចេកទេស ដើម្បីពិនិត្យ និងពិភាក្សាលើរបាយការណ៍សិក្សាសមិទ្ធិលទ្ធភាព នៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ PP-LC (Phnom Penh Logistics Complex) ដោយមានការចូលរួមពីតំណាងអង្គភាពពាក់ព័ន្ធក្នុងក្រសួង តំណាងអន្តរក្រសួង-ស្ថាប័នពាក់ព័ន្ធ និងក្រុមហ៊ុន YCH។ កិច្ចប្រជុំនេះមានគោលបំណងសំខាន់ៗរួមមាន៖ (១) ពិភាក្សាលើចំណុចសំខាន់ៗនៃរបាយការណ៍សិក្សាសមិទ្ធិលទ្ធភាព នៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ និង (២) ពិភាក្សាលើលក្ខខណ្ឌចាំបាច់ផ្សេងៗមុនឈានដល់ពិធីប្រគល់-ទទួលរបាយការណ៍សិក្សាសមិទ្ធិលទ្ធភាពខាងលើនេះ។ ក្នុងនោះដែរ អង្គប្រជុំបានពិភាក្សាយ៉ាងផុសផុលលើលទ្ធផលរបាយការណ៍សិក្សាសមិទ្ធិលទ្ធភាពគម្រោង ការវិភាគអំពីចំណុចខ្វះខាតនៃទិដ្ឋភាពផ្លូវច្បាប់នៃគម្រោង និងការវិភាគផលប៉ះពាល់បរិស្ថាន និងសង្គមរបស់គម្រោង។ សមាជិកអង្គប្រជុំក៏បានចោទជាសំណួរ និងផ្តល់មតិយោបល់សំខាន់ៗស្របតាមជំនាញរបស់អង្គភាព-ស្ថាប័នរៀងៗខ្លួន ក្នុងគោលបំណងជួយពន្លឿនដល់ការបញ្ចប់ការរៀបចំរបាយការណ៍សិក្សានេះឱ្យឆាប់រហ័ស និងគ្រប់ដណ្តប់នូវព័ត៌មានគ្រប់ជ្រុងជ្រោយ ដើម្បីឈានដល់ការអភិវឌ្ឍហេដ្ឋារចនាសម្ព័ន្ធរូបវន្តនៃគម្រោងមជ្ឈមណ្ឌលភស្តុភារកម្មភ្នំពេញ នាពេលឆាប់ៗខាងមុខ ដែលគម្រោងនេះគឺជាគម្រោងអាទិភាពមួយក្នុងចំណោមគម្រោងផ្សេងទៀតនៅក្នុងផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ២០២៣ - ២០៣៣ របស់រាជរដ្ឋាភិបាល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube