បណ្តាញផ្លូវជាតិជាច្រើនខ្សែ រួមទាំងផ្លូវសាធារណៈក្នុងក្រុងនិងទីប្រជុំជនក្នុងរាជធានីខេត្តចំនួន ១៣ នឹងត្រូវអនុវត្តការដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យ ក្រោមការប្រើប្រាស់ថវិកាមូលនិធិសង្គមរបស់អគ្គិសនីកម្ពុជា។ កាលពីព្រឹកនៅថ្ងៃទី ១៤ ខែកក្កដា ឆ្នាំ ២០២៦ ការចុះអនុស្សរណៈនៃការយោគយល់គ្នាមួយបានធ្វើឡើងក្រោមវត្តមានលោក កែវ រតនៈ រដ្ឋមន្ត្រីក្រសួងរ៉ែ និងថាមពល លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងក៏មានការចូលរួមពីលោក ប្រាំង ជលសា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជា អភិបាលខេត្តទាំង ១៣ រួមទាំងមន្ត្រីជាន់ខ្ពស់ក្រសួងរ៉ែ និងថាមពល ក្រសួងសាធារណការ និងដឹកជញ្ជូន និងអគ្គិសនីកម្ពុជាច្រើនរូបទៀត។ លើកឡើងនៅក្នុងពិធីចុះអនុស្សចុះអនុស្សរណៈនៃការយោគយល់គ្នានេះ លោក ប្រាំង ជលសា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជាបានបញ្ជាក់ថា តាមការប៉ាន់ស្មានការអនុវត្កការងារនេះ គ្រោងចំណាយប្រមាណ ៥ លានដុល្លារអាមេរិក ដោយប្រើប្រាស់ថវិកាមូលនិធិសង្គមរបស់អគ្គិសនីកម្ពុជា។ លោកថា ការដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យ នៅតាមកំណាត់ផ្លូវជាតិ ផ្លូវសាធារណៈ ផ្លូវស្ថិតក្នុងក្រុងដែលជាទីប្រជុំជន និងតំបន់ទេសចរណ៍សរុបប្រមាណ ១.០០០គីឡូម៉ែត្រនេះ គ្រោងឱ្យបានរួចរាល់ក្នុងរយៈពេលយ៉ាងយូរ ២ឆ្នាំ។ បន្ទាប់ពីបញ្ចប់ការសាងសង់រួច ក្រសួងរ៉ែ និងថាមពល និងអគ្គិសនីកម្ពុជា នឹងប្រគល់ជូនក្រសួងសាធារណការ និងដឹកជញ្ជូន រដ្ឋបាលរាជធានី-ខេត្ត បន្តគ្រប់គ្រង និងដំណើរការថែទាំ ដើម្បីឱ្យហេដ្ឋារចនាសម្ព័ន្ធនេះ នៅបន្តបំភ្លឺជូនបងប្អូនប្រជាពលរដ្ឋជានិរន្តរ៍។ ផ្លូវជាតិដែលស្ថិតនៅក្នុងគម្រោង ការអនុវត្តរៀបចំដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យ ក្រោមប្រើប្រាស់ថវិកាមូលនិធិសង្គមរបស់អគ្គិសនីកម្ពុជារួមមាន៖ -កំណាត់ផ្លូវជាតិលេខ ៥ ចន្លោះពីព្រំប្រទល់រាជធានីភ្នំពេញ-ខេត្តកណ្តាល ដល់ព្រំប្រទល់ខេត្តកំពង់ឆ្នាំង-ពោធិ៍សាត់ និងពីព្រំប្រទល់ខេត្តពោធិ៍សាត់-បាត់ដំបង ដល់ខេត្តបន្ទាយមានជ័យ ដោយត្រូវដំឡើងប្រព័ន្ធអំពូល ភ្លើងបំភ្លឺនៅលើមេនីដ្យានទ្រូងផ្លូវ។ -កំណាត់ផ្លូវជាតិលេខ ៦ ស្ថិតក្នុងភូមិសាស្ត្រខេត្តកំពង់ចាម សៀមរាប និងបន្ទាយមានជ័យ ចាប់ពីស្រុកជើងព្រៃ (ស្គន់) ដល់ព្រំប្រទល់ខេត្តកំពង់ធំ និងចាប់ពីស្រុកជីក្រែង ដល់ក្រុងសេរីសោភ័ណ ដោយត្រូវដំឡើងប្រព័ន្ធអំពូលភ្លើងបំភ្លឺនៅអមសងខាងផ្លូវ។ -កំណាត់ផ្លូវជាតិលេខ៧ ពីស្រុកជើងព្រៃ (ស្គន់) ដល់ទីក្រុងកំពង់ចាម ក្នុងខេត្តកំពង់ចាម ដោយត្រូវដំឡើងប្រព័ន្ធអំពូលភ្លើងបំភ្លឺនៅលើមេនីដ្យានទ្រូងផ្លូវ -ផ្លូវជាតិលេខ ២១ ពីក្រុងតាខ្មៅក្នុងខេត្តកណ្តាល ដល់ព្រំដែនប្រទេសវៀតណាម ដោយត្រូវដំឡើងប្រព័ន្ធអំពូល ភ្លើងបំភ្លឺនៅអមសងខាងផ្លូវ -ផ្លូវក្រវាត់ក្រុងទី ២ និងផ្លូវក្រវាត់ក្រុងទី ៣ នៅក្នុងភូមិសាស្រ្តរាជធានីភ្នំពេញ ដោយត្រូវដំឡើងប្រព័ន្ធអំពូលភ្លើង បំភ្លឺនៅអមសងខាង និងលើមេនីដ្យានទ្រូងផ្លូវ -ផ្លូវស្ថិតក្នុងក្រុងដែលជាទីប្រជុំជន និងជាតំបន់ទេសចរណនៅក្នុងភូមិសាស្ត្រ ខេត្តកំពង់ស្ពឺ ខេត្តតាកែវ ខេត្តព្រះសីហនុ ខេត្តកោះកុង ខេត្តកំពត និងខេត្តកែប៕