ភ្នំពេញ ៖ ឯកឧត្តម ទេសរដ្ឋមន្ត្រី ស៊ុន ចាន់ថុល បានបញ្ជាក់ថា ផ្លូវក្រវាត់ក្រុងទី៣ សាងសង់តាម លក្ខណៈបច្ចេកទេសត្រឹមត្រូវតាមស្តង់ដារ ដែលធានាបាននូវគុណភាពសម្រាប់ប្រើប្រាស់ តាមអាយុកាលដែលបានកំណត់។ ក្នុងកិច្ចសម្ភាសន៍ជាមួយអ្នកសារព័ត៌មានក្នុងការចុះត្រួតពិនិត្យវឌ្ឍនភាពការងារ សាងសង់ផ្លូវក្រវាត់ ក្រុងទី៣ កាលពីថ្ងៃទី២៨ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា ការស្ថាបនាផ្លូវក្រវាត់ក្រុងទី៣ ប្រវែងសរុប ជិត៥៣គីឡូម់ែត្រ សម្រេចបានជិត៩០ភាគរយហើយ ដោយរំពឹងថា គម្រោងនឹងបញ្ចប់រួចរាល់ជាស្ថាពរ នៅត្រឹមខែឧសភា ឆ្នាំ២០២៣ខាងមុខនេះ។ ឯកឧត្តមបានបញ្ជាក់ថា សម្រាប់ផ្លូវក្រវាត់ក្រុងខ្សែទី៣នេះ មាន២ប្រភេទ ដែលមានការចាត់បេតុង សរសៃដែក ប្រវែង៤៨គីឡូម៉ែត្រ មានកម្រាស ២២សង់ទីម៉ែត្រ មានទំហំទទឹងផ្លូវរហូតដល់ទៅ ២៧ម៉ែត្រសម្រាប់ទីប្រជុំជន សម្រាប់ក្រៅទីប្រជុំជនវិញមានទំហំទទឹងផ្លូវ ២៥ម៉ែត្រ។ សម្រាប់ផ្លូវខ្នែង ៥គីឡូម៉ែត្រ បានចាក់បេតុងកៅស៊ូ ៩សង់ទីម៉ែត្រ, សម្រាប់តម្លៃសាងសង់មានចំនួន ២៧៣លាន ដុល្លារអាមេរិក។ឯកឧត្តម បានបញ្ជាក់បន្ថែមថា គម្រោងសាងសង់ផ្លូវក្រវាត់ក្រុងខ្សែទី៣នេះ ក្រោយក្រសួងចុះធ្វើតេស្តគុណភាព នៅតាមកន្លែងមួយចំនួនហើយឃើញថា ក្រុមហ៊ុនធ្វើបានត្រឹមត្រូវ តាមស្តង់ដារបច្ចេកទេស តែទោះជាយ៉ាងណាក្រសួងក៏នឹងនៅតែបន្តតាមដានជាប់ជានិច្ច ដើម្បីធានាថា ផ្លូវនេះមានគុណភាពអាចប្រើប្រាស់បានយូរអង្វែង។ សំឡេង « យើងបានចុះខួងមើល តើគាត់ចាក់២២សង់ទីម៉ែត្រឬទាបជាងហ្នឹង អ៊ីចឹងយើងបានខួងមើល ជាក់ស្តែង គឺត្រឹមត្រូវតាមលក្ខណៈបច្ចេកទេសទី១។ ទី២ យើងយកម៉ាស៊ីនFWD វ៉ៃទម្លាក់តើការសាងសង់គ្រឹះជាប់ឬមិនជាប់? ស្តង់ដាររបស់ក្រសួងយើងតួលេខត្រឹម៣៤០ ក្រោម៣៤០គឺមិនល្អទេ ប៉ុន្តែយើងវ៉ៃមួយកន្លែងនោះឃើញ៥០០ជាង មួយកន្លែងទៀត៤០០ជាង បានន័យថា លើសអ្វីដែលយើងត្រូវការ អ៊ីចឹងខ្ញុំសន្និដ្ឋានមើលថាផ្លូវនេះ ធ្វើតាមលក្ខណៈបច្ចេកទេស និងបានរឹងមាំ ទៅតាមស្តង់ដារដែលយើងចង់បាន »។ ឯកឧត្តមទេសរដ្ឋមន្ត្រី ក៏បានណែនាំឱ្យក្រុមហ៊ុនសាងសង់ រៀបចំយ៉ាងណាឱ្យមានភ្លើងសញ្ញា និង ស្លាកសញ្ញាឱ្យបានត្រឹមត្រូវ ដើម្បី កុំឱ្យមានគ្រោះថ្នាក់ដល់អ្នកបើកបរក្នុងទិសដៅបញ្ច្រាសគ្នាផងដែរ។ សូមបញ្ជាក់ថា គម្រោងសាងសង់ផ្លូវក្រវាត់ក្រុងខ្សែទី៣ (ផ្លូវជាតិលេខ៤ -ផ្លូវជាតិលេខ១) ដែលមានប្រវែង សរុបជាង៥២គីឡូម៉ែត្រដោយបានចាប់ផ្តើមសាងសង់កាលពីថ្ងៃទី១៤ ខែមករា ឆ្នាំ២០១៩ ហើយគ្រោងនឹងបញ្ចប់ការសាងសង់នៅថ្ងៃទី៥ ខែកញ្ញា ឆ្នាំ២០២៣ ដោយមានរយៈពេលសាងសង់៥៤ខែ ហើយគិតរហូតមកដល់ថ្ងៃទី២៥ ខែកុម្ភៈ ឆ្នាំ២០២៣ ការងារសាងសង់សម្រេចបាន៨៩,៨៥%ហើយ៕