[Phnom Penh Post] - រដ្ឋាភិបាលនឹងចំណាយ $២៣០ លាន ដើម្បីសង់ស្ពានក្នុងគម្រោងផ្លូវល្បឿនលឿន
2023-02-28
Go to the website published Phnom Penh Post
ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា រាជរដ្ឋាភិបាលបានសម្រចបញ្ចេញថវិកាចំនួន ២៣០ លានដុល្លារ ដើម្បីសាងសង់ស្ពាន ២ ទៅ ២ មក តភ្ជាប់ខេត្តចំនួន ៣ ដែលស្ថិតក្នុងគម្រោងផ្លូវល្បឿនលឿនភ្នំពេញ-បាវិត។
លោកនាយករដ្ឋមន្ត្រីបានថ្លែងបែបនេះ ក្នុងពិធីប្រគល់សញ្ញាបត្រជូនដល់គរុនិស្សិតបច្ចេកទេស និងនិស្សិតនៃវិទ្យាស្ថាន ជាតិបណ្តុះបណ្តាលបច្ចេកទេស នៅមជ្ឈមណ្ឌលសន្និបាត និងពិព័រណ៍ជ្រោយចង្វារ កាលពីថ្ងៃទី ២៧ ខែកុម្ភៈ ឆ្នាំ ២០២៣។
លោកថ្លែងបន្តថា បច្ចុប្បន្ននិន្នាការនៃការប្រើប្រាស់ផ្លូវល្បឿនលឿននៅកម្ពុជាកាន់តែកើនឡើង ខណៈមិនយូរប៉ុន្មានកម្ពុជានឹងប្រកាសបើកការដ្ឋានសាងសង់ផ្លូវល្បឿនលឿនទី ២ មួយខ្សែទៀត គឺគម្រោងផ្លូវល្បឿនលឿនភ្នំពេញ-បាវិតថែមទៀត ខណៈដែលវៀតណាមក៏នឹងធ្វើផ្លូវល្បឿនលឿនពីវៀតណាម មកភ្ជាប់ផ្លូវល្បឿនលឿនទល់ដែនកម្ពុជាដែរ។ ក្នុងគម្រោងនេះ រាជរដ្ឋាភិបាលសម្រេចបញ្ចេញថវិកាប្រមាណ ២៣០ លានដុល្លារអាមេរិកសាងសង់ស្ពាន សម្រាប់តភ្ជាប់ផ្លូវល្បឿនលឿនគឺស្ពាន ២ ទៅ ២ មក ដោយភ្ជាប់កាត់ខេត្តចំនួន ៣ ដើម្បីសម្រួលដល់ការចំណាយអ្នកប្រើប្រាស់ផ្លូវល្បឿនលឿនភ្នំពេញ-បាវិត។
លោកនាយករដ្ឋមន្ត្រីបញ្ជាក់ថា៖ «កាលពីមុនក្រុមហ៊ុនសាងសង់ចង់ធ្វើស្ពានឆ្លងកាត់ទន្លេមេគង្គ ដោយយកប្រាក់ពីប្រជាជន តែខ្ញុំមិនព្រមទេ ព្រោះការយកប្រាក់ពីប្រជាជនពេលឆ្លងស្ពានផ្លូវល្បឿនលឿន គឺខ្ញុំទទួលយកអត់បាន ហើយស្នើឱ្យក្រុមហ៊ុនគិតគូរឡើងវិញ តែយ៉ាងណានៅតែមិនសម្រេចលទ្ធផល។ ទើបរដ្ឋាភិបាលសម្រេចបញ្ចេញថវិកាផ្ទាល់សាងសង់ស្ពាន ២ ទៅ ២ មក ដែលមានតម្លៃ ២៣០ លានដុល្លារអាមេរិក ដើម្បីឆ្លងកាត់ទៅត្រើយម្ខាងដោយឆ្លងកាត់ខេត្តកណ្តាល ព្រៃវែង និងចូលទៅកាន់ខេត្តស្វាយរៀង ក្នុងគម្រោងផ្លូវល្បឿនលឿនភ្នំពេញ-បាវិត»។
បើតាមលោកនាយករដ្ឋមន្ត្រី បច្ចុប្បន្នលក្ខណៈនេះ រដ្ឋាភិបាលបានឯកភាពជាមួយក្រុមហ៊ុនរួចហើយ ដោយឱ្យក្រុមហ៊ុនជាអ្នកសាងសង់ ព្រោះគេមានបច្ចេកទេស តែរដ្ឋាភិបាលជាអ្នកចំណាយថវិកា។ លោកសង្ឃឹមថា ការធ្វើដំណើររបស់ប្រជាពលរដ្ឋនឹងងាយស្រួល និងចំណាយថវិកាលើផ្លូវល្បឿនភ្នំពេញ-បាវិតកាន់តែមានតម្លៃទាប។
ពាក់ព័ន្ធនឹងការលើកឡើងនេះ លោក ង៉ែត ជូ អ្នកជំនាញសេដ្ឋកិច្ច និងហិរញ្ញវត្ថុនៅកម្ពុជា បានបង្ហាញការគាំទ្រចំពោះការចូលរួមកាត់បន្ថយចំណាយរបស់រដ្ឋាភិបាលចំពោះការធ្វើដំណើររបស់ប្រជាពលរដ្ឋក្នុងការប្រើប្រាស់ស្ពានលើផ្លូវល្បឿនលឿន។លោកថា៖ «ជាទូទៅប្រាកដណាស់បើក្រុមហ៊ុនចំណាយប្រាក់សង់ស្ពានបន្ថែមខ្លួនឯង នឹងធ្វើឱ្យការចំណាយលើការឆ្លងកាត់ផ្លូវល្បឿនលឿនកាន់តែខ្ពស់ ព្រោះយើងធ្លាប់មានគំរូផ្លូវល្បឿនលឿនភ្នំពេញ-ព្រះសីហនុ សម្រាប់ជីវភាពរបស់ប្រជាពលរដ្ឋគឺថ្លៃស្រាប់ហើយ តែយ៉ាងណាវាអាស្រ័យលើការព្រមព្រៀងរបស់រដ្ឋាភិបាល និងក្រុមហ៊ុនទៅលើដំណើរការគ្រប់គ្រងផ្លូវនេះបន្ថែមទៀត»។
អ្នកជំនាញសេដ្ឋកិច្ចរូបនេះ អះអាងថា រាល់ការវិនិយោគទៅលើហេដ្ឋារចនាសម្ព័ន្ធណាមួយ បើសិនជាបានគិតពីផលចំណេញសម្រាប់សេដ្ឋកិច្ច និងគិតគូរពីផលប្រយោជន៍ប្រជាពលរដ្ឋជាធំ គឺជារឿងដ៏ត្រឹមត្រូវ និងចាំបាច់ត្រូវធ្វើ។
បើតាមរដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល គម្រោងផ្លូវល្បឿនលឿនភ្នំពេញ-បាវិត នឹងបើកការដ្ឋានសាងសង់នៅខែមិថុនា ឆ្នាំ ២០២៣។
គម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-បាវិត ដែលជាផ្លូវល្បឿនលឿនទី២ របស់កម្ពុជា បន្ទាប់ពីផ្លូវល្បឿនលឿនភ្នំពេញ-ព្រះសីហនុ គឺជាខ្សែផ្លូវថ្មីទាំងស្រុង មានប្រវែងសរុបប្រមាណជា ១៣៨ គ.ម ចេញពីរាជធានីភ្នំពេញត្រង់ចំណុចផ្លូវក្រវាត់ក្រុងទី ៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។
គម្រោងនេះ គ្រោងនឹងបញ្ចប់ការសាងសង់ឱ្យរួចរាល់នៅដំណាច់ឆ្នាំ ២០២៦ ឬដើមឆ្នាំ ២០២៧ ដោយត្រូវចំណាយថវិកាសាងសង់សរុបប្រមាណ ១ ៦៣៨ លានដុល្លារអាមេរិក។ គម្រោងផ្លូវល្បឿនលឿននេះ ត្រូវបានរដ្ឋាភិបាលចាត់ទុកថា មានសារៈសំខាន់ណាស់ក្នុងការតភ្ជាប់ទាំងប្រទេសចិន មកភូមា ថៃ កម្ពុជា និងទៅវៀតណាមថែមទៀត៕
