កិច្ចប្រជុំពិភាក្សាអំពីលទ្ធផលនៃការសិក្សាសមិទ្ធិលទ្ធភាពគម្រោងអភិវឌ្ឍន៍ប្រព័ន្ធចម្រោះទឹកកខ្វក់ នៅក្រុងសៀមរាប ប៉ែកខាងកើតស្ទឹង និងក្រុងស្វាយរៀង តាមប្រព័ន្ធវីដេអូពីចម្ងាយ ទីស្តីការក្រសួង៖ ថ្ងៃសុក្រ ១កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៣ ខែធ្នូ ឆ្នាំ២០២២ លោកអគ្គនាយករង ចៅ សុភ:ភិបាល តំណាងឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារបច្ចេកទេស ជួបប្រជុំជាមួយក្រុមការងារបច្ចេកទេស នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដើម្បីពិភាក្សាអំពីលទ្ធផលនៃការសិក្សាសមិទ្ធិលទ្ធភាពគម្រោងអភិវឌ្ឍន៍ប្រព័ន្ធចម្រោះទឹកកខ្វក់ នៅក្រុងសៀមរាប ប៉ែកខាងកើតស្ទឹង និងក្រុងស្វាយរៀង តាមប្រព័ន្ធវីដេអូពីចម្ងាយ។ អង្គប្រជុំបានពិនិត្យ និងពិភាក្សាបន្តលើបរិមាណទឹកកខ្វក់សរុបនៅក្នុងក្រុងសៀមរាបប៉ែកខាងកើត គិតដល់ឆ្នាំ២០៤០ ទំហំ និងប្រវែងលូមេ លូមេរង លូខ្នែងទឹកកខ្វក់ កាលវិភាគការងារគម្រោងសិក្សា និងស្ថានីយប្រព្រឹត្តកម្មទឹកកខ្វក់ ដែលបានសិក្សាដោយទីភ្នាក់ងារជប៉ុនហៅថា Japan Sewage Works Agency។ បន្ថែមពីលើនេះ អង្គប្រជុំបានពិភាក្សាផងដែរលើឯកសារ និងរបាយការណ៍ចាំបាច់ដែលមានចែងក្នុងនីតិវិធីរួម (SOP) របស់រាជរដ្ឋាភិបាល មុននឹងបញ្ជូនទៅក្រសួងសេដ្ឋកិច្ច និងហិរញ្ញវត្ថុ ដើម្បីពិភាក្សាបន្ត។ ជាមួយគ្នានោះផងដែរ ភាគីជប៉ុនបានបង្ហាញបច្ចេកវិទ្យាប្រព្រឹត្តកម្មទឹកកខ្វក់នៅនឹងកន្លែង ដែលមានឈ្មោះថា PDO ដែលមានសមត្ថភាពអាចសម្អាតទឹកកខ្វក់បានចន្លោះពី ៣០០ ទៅ ១២០០ ម៉ែត្រគូបក្នុងមួយថ្ងៃ ដែលគ្រោងផ្តល់ជាជំនួយបច្ចេកទេសដល់ខេត្តតាកែវ ក្រោយពីបានធ្វើការសិក្សា៕