ឯកឧត្ដមទេសរដ្ឋមន្ត្រី ស៊ុន ចាន់ថុល អញ្ជើញចូលរួមកិច្ចប្រជុំកិច្ចពិនិត្យមើលវឌ្ឍនភាពការងារនៃគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាប ខេត្តសៀមរាប ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការ អន្តរក្រសួង សៀមរាប៖ ថ្ងៃសៅរ៍ ៩កើត ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៣ ខែវិច្ឆិកា ឆ្នាំ២០២១ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានប្រចាំការគណៈកម្មការអន្តរក្រសួង បានអញ្ជើញចូលរួមកិច្ចប្រជុំពិនិត្យមើលវឌ្ឍនភាពការងារនៃគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប ក្រោមអធិបតីភាពដ៏ខ្ពង់ខ្ពស់ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការ អន្តរក្រសួង ដោយមានការអញ្ជើញចូលរួមពីឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ថ្នាក់ដឹកនាំក្រសួង អភិបាលនៃគណៈអភិបាលខេត្តសៀមរាប ប្រធានគណៈកម្មការខេត្ត អង្គភាពសាងសង់ ក្រុមការងារត្រួតពិនិត្យបច្ចេកទេស មន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធផងដែរ។ កិច្ចប្រជុំនេះធ្វើឡើងក្នុងគោលបំណងពិនិត្យមើលបញ្ហាបច្ចេកទេស បញ្ហាប្រឈម សំណូមពរ របស់អង្គភាពទទួលបន្ទុកការងារសាងសង់នីមួយៗ សំដៅស្វែងរកដំណោះស្រាយ ក៏ដូចជាផ្ដល់អនុសាសន៍ណែនាំបន្ថែម ដើម្បីធានាឱ្យការសាងសង់ផ្លូវទាំង៣៨ខែ្សនេះមានគុណភាពខ្ពស់ស្របតាមបទដ្ឋានបច្ចេកទេស និងសៀវភៅបន្ទុក ធ្វើយ៉ាងណាឱ្យផ្លូវមានគុណភាពរឹងមាំប្រើប្រាស់ជាប់គង់វង្សយូរអង្វែង និងបញ្ចប់តាមផែនការគ្រោងទុក។ ថ្លែងក្នុងមតិស្វាគមន៍នៅពេលចាប់ផ្តើមកិច្ចប្រជុំ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានគូសបញ្ជាក់ពីទឹកចិត្តដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានយកចិត្តទុកដាក់ជួយសម្រួលដល់ការតភ្ជាប់ប្រព័ន្ធលូទឹកភ្លៀង និងទឹកកខ្វក់ពីខ្នងផ្ទះរបស់ប្រជាពលរដ្ឋមកកាន់ប្រព័ន្ធលូមេដោយឥតគិតថ្លៃ តាមរយៈគណៈកម្មការអន្តរក្រសួង។ បន្ទាប់មក ឯកឧត្តមទេសរដ្ឋមន្ត្រី ថ្លែងក្នុងរបាយការណ៍គោរពជូនអង្គប្រជុំនាឱកាសនោះ បានថ្លែងអំណរគុណយ៉ាងជ្រាលជ្រៅដល់អង្គភាពអនុវត្តគម្រោងទាំង៨ ក្រុមការងារត្រួតពិនិត្យបច្ចេកទេស ក្រសួង- ស្ថាប័នពាក់ព័ន្ធទាំងអស់ អាជ្ញាធរដែនដី ប្រជាពលរដ្ឋដែលបានសហការល្អ និងជួយគាំទ្រគ្រប់បែបយ៉ាង ដើម្បីឱ្យការងារសាងសង់ផ្លូវ៣៨ខ្សែនេះដំណើរការទៅដោយរលូន។ ឯកឧត្តមទេសរដ្ឋមន្ត្រី បានលើកឡើងអំពីការតភ្ជាប់ប្រព័ន្ធបណ្ដាញលូទឹកភ្លៀង និងលូទឹកកខ្វក់ពីខ្នងផ្ទះប្រជាពលរដ្ឋមកប្រព័ន្ធលូមេចំនួន១២២៩៩តំណ ជូនប្រជាជនពលរដ្ឋដោយឥតគិតថ្លៃ និងការសាងសង់ចំណតរថយន្តដោយប្រើប្រាស់បេតុងសរសៃដែក កម្រាស់១៥ សង់ទីម៉ែត្រនៅលើផ្លូវលេខជាតិ៦ ក្នុងទីរួម ខេត្តសៀមរាប តាមការឯកភាពដ៏ខ្ពង់ខ្ពស់ពីសម្ដេចតេជោនាយករដ្ឋមន្ត្រីលើសំណើសុំរបស់សម្តេចពិជ័យសេនាឧបនាយករដ្ឋមន្ត្រី ដើម្បីផ្ដល់ជាចំណងដៃថ្មីមួយទៀតជូនបងប្អូនប្រជាពលរដ្ឋដែលរស់នៅលើដងផ្លូវ៣៨ ខ្សែ និងបានជំរុញឱ្យអង្គភាពសាងសង់ ទាំង៨ខិតខំប្រឹងប្រែងបំពេញការងារទាំងនេះឱ្យបានចប់សព្វគ្រប់ តាមផែនការដែលបានគ្រោងទុក។ ឯកឧត្តមទេសរដ្ឋមន្ត្រី ក៏បានស្នើផងដែរឱ្យអង្គភាពទាំង៨ ត្រូវលាងសម្អាតការដ្ឋាន គ្រឿងចក្រ សម្ភារៈ បរិក្ខាររបស់ខ្លួនឱ្យបានត្រឹមត្រូវ និងត្រូវរើចេញនូវសម្ភារៈដែលនៅសេសសល់ ដោយមិនត្រូវទុករាយប៉ាយ តាមដងផ្លូវធ្វើឱ្យខូចសណ្ដាប់ធ្នាប់សាធារណៈ និងបានស្នើឱ្យអាជ្ញាធរដែនដីជួយពន្យល់ ផ្សព្វផ្សាយ និង ណែនាំបងប្អូនប្រជាពលរដ្ឋ អំពីការប្រើប្រាស់ចិញ្ចើមផ្លូវសាធារណៈនៅតាមដងផ្លូវទាំងនោះ ដោយហេតុ ថា៖ មានបងប្អូនប្រជាពលរដ្ឋមួយចំនួនបានយករថយន្តរបស់ខ្លួនទៅចតលើចិញ្ចើមផ្លូវ ធ្វើឱ្យប៉ះពាល់ដល់ខឿនចិញ្ចើមផ្លូវ និងបែកកម្រាលក្រានីតនៅតាមទីតាំងមួយចំនួនផងដែរ។ ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់សម្ដេចតេជោនាយករដ្ឋមន្ត្រី ដែលបានផ្ដល់ថវិកាសាងសង់ផ្លូវចំនួន៣៨ខ្សែ ជាពិសេសដែលបានផ្ដល់ថវិកាបន្ថែមទៀតដើម្បីតភ្ជាប់តំណលូទៅកាន់ប្រព័ន្ធលូមេជូនប្រជាពលរដ្ឋដោយឥតគិតថ្លៃ និងសាងសង់កន្លែងចតរថយន្តដើម្បីសម្រួលដល់ការរស់នៅរបស់បងប្អូនប្រជាពលរដ្ឋលើផ្លូវជាតិលេខ៦ផងដែរ។ ជាមួយគ្នានោះផងដែរ ឯកឧត្តមឧបនាយករដ្ឋមន្ត្រី ជា សុផារ៉ា បានជំរុញឱ្យអង្គភាពសាងសង់ទាំងអស់ ខិតខំប្រឹងប្រែងបញ្ចប់គម្រោងសាងសង់នេះឱ្យបានត្រឹមថ្ងៃទី២៩ ខែធ្នូ ឆ្នាំ២០២១ ឱ្យត្រូវនឹងថ្ងៃបញ្ចប់សង្គ្រាមរ៉ាំរ៉ៃនៅកម្ពុជា ដើម្បីតបស្នងសងគុណជូនចំពោះសម្ដេចតេជោនាយករដ្ឋមន្ត្រី ជាថ្ងៃចងចាំមិនអាចបំភ្លេចបាន និងបានស្នើឱ្យអាជ្ញាធរខេត្ត ក៏ដូចជាបងប្អូនប្រជាពលរដ្ឋដែលរស់នៅតាមដងផ្លូវ៣៨ខ្សែ ចូលរួមដាំស្មៅបន្ថែម ដើម្បីបង្កើនសោភ័ណភាពដងផ្លូវ និងចូលរួមចំណែកថែរក្សាដើម្បីកែប្រែមុខមាត់ទីក្រុង យើងដើម្បីទទួលភ្ញៀវទេសចរនៅពេលខាងមុខនេះ។ បន្ថែមពីលើនេះ ឯកឧត្តមឧបនាយករដ្ឋមន្ត្រី បានស្នើឱ្យមន្ទីរជុំវិញខេត្តរួមមាន៖ មន្ទីរសាធារណការ និងដឹកជញ្ជូន មន្ទីររៀបចំដែនដី នគរូបនីយកម្ម និងសំណង់ និងមន្ទីរពាក់ព័ន្ធផ្សេងទៀត ជួយសម្រប សម្រួលបញ្ហានេះជាមួយប្រជាពលរដ្ឋ ដើម្បីឱ្យគាត់បានចូលរួមសកម្មភាពនេះ និងបានស្នើឱ្យអាជ្ញាធរខេត្តបង់ជូនប្រជាពលរដ្ឋវិញនូវសេវាតភ្ជាប់តំណលូឱ្យបានគ្រប់ចំនួន១០០% ដែលពួកគាត់បានបង់ជូនសម្រាប់ការតភ្ជាប់តំណលូពីផ្ទះគាត់ទៅកាន់ប្រព័ន្ធលូមេកន្លងមក ដោយសារយើងបានទទួលការអនុម័តជាគោលការណ៍ពីសម្ដេចនាយករដ្ឋមន្ត្រីតេជោរួចហើយ៕