[Business Cambodia] - ការស្ថាបនាផ្លូវជាតិលេខ១០ ឆ្លងកាត់ខេត្ត៣ ត្រូវបន្ថែម៦០លានដុល្លារ ព្រោះមិនចង់ពុះភ្នំក្រវាញជាពីរ
ផ្លូវជាតិថ្មីមួយខ្សែនេះ គ្រោងចំណាយថវិកា ប្រមាណជាង ១៨៨លានដុល្លារ ដែលជាហិរញ្ញប្បទានរបស់ប្រទេសចិន និងថវិកាបដិភាគរបស់រាជរដ្ឋាភិបាលកម្ពុជា។ ប៉ុន្តែបើតាមការឱ្យដឹងពីឯកឧត្តម ស៊ុន ចាន់ថុល បានមានប្រសាសន៍ថា នឹងបន្ថែម៦០លានដុល្លារទៀត ដើម្បីធ្វើផ្លូវពង្វាងពីភ្នំក្រវាញ ព្រោះតែមិនចង់ឱ្យប៉ះពាល់លើរឿងទាំងនេះ។
តាមព័ត៌មានកន្លងមក អ្នកទាំងអស់គ្នាប្រាកដជាបានដឹងហើយថា៖ ផ្លូវជាតិលេខ១០ ដែលជាផ្លូវជាតិ Highway មួយខ្សែប្រភេទ DBST ស្ថាបនាជាថ្មី ដោយមានប្រវែង ១៩៧,៣៦ គីឡូម៉ែត្រ ដោយតភ្ជាប់រវាងស្រុកសំឡូត ខេត្តបាត់ដំបង កាត់តាមស្រុកវាលវែង ខេត្តពោធិ៍សាត់ និងមកដល់ទីរួមខេត្តកោះកុង គ្រោងចំណាយប្រមាណជាង ១៨៨លានដុល្លារ ជាហិរញ្ញប្បទានរបស់ប្រទេសចិន និងថវិកាបដិភាគរបស់រាជរដ្ឋាភិបាលកម្ពុជា។ នេះបើយោងតាមឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងឱ្យដឹងក្នុងពីធីបើកគម្រោងសាងសង់ផ្លូវជាតិលេខ១០ កាលពីខែមីនា ឆ្នាំ២០២០ កន្លងទៅនេះ។
ឯកឧត្តម ស៊ុន ចាន់ថុល បានបញ្ជាក់បន្ថែមថា៖ ផ្លូវជាតិលេខ១០នេះ គឺផ្លូវពីសំឡូតចុះមកកោះកុង ត្រង់តែម្តង បច្ចុប្បន្នកំពុងកសាង ក៏ប៉ុន្តែមានមួយផ្នែក យើងត្រូវតែដូរទិសរបស់ផ្លូវនោះ ដោយសារបើយើងមិនដូរទិសនោះទេ ផ្លូវនោះត្រូវវះកាត់ភ្នំក្រវាញជាពីរ ដែលធ្វើឱ្យខូចខាតបរិស្ថាន។ ដូច្នេះ សម្តេចតេជោ ហ៊ុន សែន បានឯកភាពឱ្យយើងប្តូរទិសដៅមួយចំនួន ដើម្បីឱ្យឃ្លាតឆ្ងាយពីតំបន់នោះ ដើម្បីកុំឱ្យខូចខាតបរិស្ថានរបស់យើង។
ឯកឧត្តម បានបញ្ជាក់បន្ថែមថា៖ ខ្ញុំបានទៅពិនិត្យលើផ្លូវនោះ ដោយជិះឧទ្ធម្ភាគចក្រជាមួយនឹងឯកឧត្តម សាយ សំអាល ពិនិត្យមើលឃើញថា មិនគួរធ្វើត្រង់មកកាត់លើភ្នំក្រវាញទេ កាត់ដែលប៉ុន្តែយើងងាកវាចេញ កុំឱ្យប៉ះពាល់ដល់បរិស្ថាន នេះបង្ហាញពីការយកចិត្តទុកដាក់របស់ប្រមុខរាជរដ្ឋាភិបាលយើង លើការប៉ះពាល់បរិស្ថាន។ ហើយការធ្វើបែបនេះគឺត្រូវបន្ថែមជិតថវិកា ៦០លានដុល្លារអាមេរិក ដើម្បីធ្វើការពង្វាងផ្លូវនេះ ចៀសវាងការខូចខាតដល់ភ្នំក្រវាញ ខូចខាតដល់បរិស្ថាន ជំរកសត្វព្រៃ។ល។
