ថ្ងៃព្រហស្បតិ៍ ៨កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែតុលា ឆ្នាំ២០២១ នៅទីស្ដីការក្រសួង ឯកឧត្ដម ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញបន្តដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំ កិច្ចប្រជុំរដ្ឋមន្រ្តីដឹកជញ្ជូនអាស៊ាន លើកទី២៧ (27th ATM Meeting) និងកិច្ចប្រជុំពាក់ព័ន្ធ ដោយមានការអញ្ជើញចូលរួមតាមប្រព័ន្ធវីដេអូពីចម្ងាយ និងការចូលរួមដោយផ្ទាល់ពីថ្នាក់ដឹកនាំក្រសួងទទួលបន្ទុក សមាជិកសមាជិកាគណៈកម្មការ និងអនុគណៈកម្មការត្រៀមរៀបចំ និងមន្ត្រីពាក់ព័ន្ធក្រោមឱវាទក្រសួងផងដែរ។ កិច្ចប្រជុំនេះធ្វើឡើងក្នុងគោលបំណង ដើម្បីពិភាក្សាលើរបាយការណ៍វឌ្ឍនភាពនៃការត្រៀមរៀបចំ និង ផែនការបន្ទាប់របស់អនុគណៈកម្មការទាំងបួន ប្រមូលធាតុចូលនិងមតិយោបល់ពីសមាជិកគណៈកម្មការ រៀបចំ សំដៅធ្វើយ៉ាងណាឱ្យកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី២៧ (27th ATM Meeting) និងកិច្ចប្រជុំពាក់ព័ន្ធអាចដំណើរការដោយរលូន និងទទួលបានជោគជ័យតាមការគ្រោងទុក ។ អនុគណៈកម្មការនីមួយៗបានជម្រាបជូនអង្គប្រជុំអំពីវឌ្ឍនភាពការងារ និងលើកស្នើនូវចំនុចពាក់ព័ន្ធសំខាន់ៗរួមមាន៖ ការរៀបចំធ្វើលិខិតអញ្ជីញ ការរៀបចំទង់ជាតិ និងស្លាកឈ្មោះតំណាងប្រទេសចូលរួម ការរៀបចំ សម្ភារៈនានា និងឯកសារពាក់ព័ន្ធសម្រាប់កិច្ចប្រជុំ សេចក្តីព្រាងប្លង់តុប្រជុំ ការរៀបចំគម្រោងចំណាយ ការរៀបចំជំនួយស្មារតី សេចក្តីព្រាងសុន្ទរកថារបស់ថ្នាក់ដឹកនាំសម្រាប់កម្មវិធីបើក និងបិទកិច្ចប្រជុំកម្មវិធី និងរបៀបវារៈនៃកិច្ចប្រជុំ ការរៀបចំបញ្ជីឈ្មោះប្រតិភូចូលរួម រួមមានរដ្ឋជាសមាជិកអាស៊ានទាំងអស់ ដៃគូសន្ទនាអាស៊ាន មានចិន ជប៉ុន កូរ៉េ ដៃគូពិគ្រោះយោបល់ក្រុមប្រឹក្សាធុរកិច្ចអាស៊ាន-អាមេរិក និងដៃគូអភិវឌ្ឍ ដូចជាធនាគារពិភពលោក ធនាគារអភិវឌ្ឍន៍អាស៊ី ផងដែរ។ ជាមួយគ្នានេះផងដែរ ក្រុមការងារព័ត៌មានវិទ្យាក្រសួង បានរាយការណ៍ជូនអង្គប្រជុំអំពីលទ្ធផលនៃជំនួប ជាមួយក្រុមការងារបច្ចេកវិទ្យារបស់លេខាធិការដ្ឋានអាស៊ាន ក្នុងនោះរួមមាន៖ ការគ្រប់គ្រងប្រព័ន្ធវីដេអូពីចម្ងាយ ការបង្កើតក្រុម WhatsApp សម្រាប់ក្រុមមន្ត្រីទំនាក់ទំនងតាមប្រទេស និងបច្ចេកទេស ប្រព័ន្ធកាមេរ៉ាចាប់រូបភាព ប្រព័ន្ធសំឡេងសម្រាប់ការបកប្រែភាសា ការធ្វើតេស្តសាកល្បងកម្មវិធី BlueJeans ការគ្រប់គ្រងរបស់លេខា ធិការដ្ឋានអាស៊ានលើកម្មវិធីប្រជុំ (Host) ការធ្វើបទបង្ហាញ ការបង្ហាញវីដេអូ និងសំណួរចម្លើយជាដើម។ ឆ្លៀតក្នុងឱកាសនោះផងដែរ ឯកឧត្ដមរដ្ឋលេខាធិការ បានជំរុញលើកទឹកចិត្តឱ្យសមាជិកគណៈកម្មការ ត្រៀមរៀបចំ ពន្លឿនការងារដែលនៅសេសសល់ អនុវត្តតួនាទីនិងភារកិច្ចរបស់ខ្លួនឱ្យបានហ្មត់ចត់ ដើម្បី ធានាឱ្យកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី២៧ (27th ATM Meeting) និងកិច្ចប្រជុំពាក់ព័ន្ធអាច ប្រព្រឹត្តទៅតាមការគ្រោងទុក។ សូមជម្រាបជូនថា៖ ក្រសួងសាធារណការ និងដឹកជញ្ជូន កំពុងត្រៀមរៀបចំធ្វើជាម្ចាស់ផ្ទះនៃកិច្ចប្រជុំឧត្តមមន្ត្រីដឹកជញ្ជូនអាស៊ានលើក ទី៥២ កិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី២៧ និងកិច្ចប្រជុំពាក់ព័ន្ធ ដែលគ្រោងនឹងប្រព្រឹត្តទៅនៅ ថ្ងៃទី០៨-១២ ខែវិច្ឆិកា ឆ្នាំ២០២១ តាមប្រព័ន្ធវីដេអូពីចម្ងាយ៕