(ភ្នំពេញ)៖ ក្នុងឱកាសទស្សកិច្ចផ្លូវការ ឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន ដើម្បីប្រគល់ពហុកីឡដ្ឋានជាតិមរតកតេជោ ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះ​​​​រាជាណាចក្រ​​​​កម្ពុជា និង​ ជួបចរចាអំពីទំនាក់ទំនងកម្ពុជា-ចិន ជាមួយសម្តេចអគ្គមហាសេនាបតីតេជោ។ នៅព្រឹកថ្ងៃទី១៣ ខែកញ្ញា ឆ្នាំ២០២១ ក្នុងដំណើរទស្សនកិច្ចនេះ ឯកឧត្តមឧបនាយករដ្ឋមន្ត្រី ហោ ណាំហុង ក៏បានជួបសន្ទនា និងរៀបចំអាហារការងារពេលព្រឹកជូន ឯកឧត្តម វ៉ាង យី។ ក្នុងឱកាសនោះ ឯកឧត្តម ឧបនាយករដ្ឋមន្ត្រី ហោ ណាំហុង បានរំលឹកពីលទ្ធផល នៃកិច្ចប្រជុំគណៈកម្មាធិការសម្របសម្រួលអន្ដររដ្ឋាភិបាលកម្ពុជា-ចិន កាលពីខែមិថុនា ឆ្នាំ២០២០។ ឯកឧត្តម ឧបនាយករដ្ឋមន្ត្រី បានថ្លែងអំណរគុណផងដែរចំពោះ រដ្ឋាភិបាលចិនដែលបាននាំចូលកសិផលកម្ពុជាយ៉ាងច្រើន ជាពិសេសអង្ករបានចំនួន៦១៥.៦១២តោន ចេកបានចំនួន២៧២.០២៣តោន និងស្វាយបានចំនួន២១១តោន រយៈពេលពេល​​​​៨ខែកន្លងមក ដែលជាការរួមចំណែកដ៏ធំធេងដល់ប្រជាកសិករកម្ពុជា ជាពិសេសបានរួមចំណែក​​​​ដល់សេដ្ឋកិច្ចកម្ពុជា ក្នុងពេ​ល​​​ជំងឺកូវីដ-19 នឹងជួយដល់ពលករដែលត្រលប់មកពីប្រទេសថៃបានប្រកបការងារកសិកម្ម។​ ទន្ទឹមនេះ ឯកឧត្តមឧបនាយករដ្ឋមន្ត្រី ក៏បានសំណូមពរអោយចិនជួយទិញកសិផលកម្ពុជាបន្ថែមទៀត ជាពិសេសផ្លែមៀនប៉ៃលិន ម្រេច ទុរេន និងស្ករ។ល។ រំលឹកអំពីការអនុវត្តគម្រោងនានាជាបន្ទាន់ ក្រោយពីប្រជុំគណៈកម្មាធិការសម្របសម្រួលអន្ដររដ្ឋាភិបាលកម្ពុជា-ចិន កាលពីថ្ងៃទី១៦ មិថុនា ២០២០ បញ្ជីគម្រោងដែលត្រូវអនុវត្តន៍បន្ទាន់(To Do List) លោកឧបនាយករដ្ឋមន្ត្រី បានលើកជាអាទិ៍ការកសាងហេដ្ឋារចនាសម្ព័ន្ធដូចជា គម្រោងសាងសង់ផ្លូវជាតិលេខ៧១C គម្រោងពង្រីក និងលើកកម្រិត​​​​ផ្លូវជាតិលេខ៤១ លេខ៣៣ លេខ៣១ និង​ ផ្លូវជាតិលេខ៣ គម្រោងប្រព័ន្ធទឹកកខ្វក់ក្រុងព្រះសីហនុ ព្រមទាំងការកសាង​​​​ខ្សែកាប្លិ៍អុបទិក ក្រោមបាតសមុទ្ររវាងទីក្រុងព្រះសីហនុ-ទី​ក្រុងហុងកុង ដើម្បីពន្លឿនប្រព័ន្ធអ៊ីនធឺណេត​​​នៅកម្ពុជា។ ឯកឧត្តមឧបនាយករដ្ឋមន្ត្រី បានលើកថា ផែនការសកម្មភាពរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដើម្បី​​​​បង្កើតសហគមន៍វាសនារួមកម្ពុជា-ចិន(២០១៩-២០២៣) ដែកទាក់ទងគ្រប់ស្ថាប័នរួមទាំងគណបក្សប្រជាជនកម្ពុជា និង​​​​នីតិប្បញ្ញត្តិ​​​​។ល។ តើគួរប្រជុំថ្នាក់អគ្គលេខាធិការគណៈកម្មាធិការសម្របសម្រួលអន្ដររដ្ឋាភិបាល ឬទេ ដើម្បីធ្វើបច្ចុប្បន្នភាព​​​​កិច្ចការអនុវត្តន៍​​​​បន្ដ។ ក្នុងឱកាសនោះដែរ ឯកឧត្តម ​ឧបនាយករដ្ឋមន្ត្រី ក៏បានលើកឡើងថា​​​ គួរពិចារណារកពេលសមស្របរៀបចំការ​​​​តាំងពិពណ៌អំពីពាណិជ្ជកម្ម និងវិនិយោគរវាងប្រទេសយើងទាំងពីរ។ ទន្ទឹមនឹងនេះ ឯកឧត្តម ឧបនាយករដ្ឋមន្ត្រី ក៏បានស្នើបញ្ចូល​​​ក្រសួង​​​​​​​បរិស្ថាន និងក្រសួងប្រៃសណីយ៍ និងទូរគម​នាគមន៍ ក្នុងគណៈកម្មាធិការសម្របសម្រួលអន្ដររដ្ឋាភិបាល​​ខាងកម្ពុជា ដែលសម្ដេចអគ្គមហាសេនាបតីតេជោ នាយករដ្ឋមន្ត្រីបានយល់ស្របដ៏ខ្ពង់ខ្ពស់ហើយ។ ក្នុងឱកាសនោះដែរ ឯកឧត្តម វ៉ាង យី បានឆ្លើយតបជាអាទិ៍ដូចតទៅ៖ ទី១៖ ជម្រុញការសាងសង់ផ្លូវជាតិលេខ៧១C ទី២៖ បញ្ជូនអ្នកបច្ចេកទេសមកសិក្សាផ្លូវជាតិលេខ៣ ដែលមានការខូចខាតប្រវែង ២០Km ទី៣៖ យកចិត្តទុកដាក់ និង ជម្រុញបន្ថែមទៀត លើគម្រោងខ្សែកាបិ៍អុបទិកក្រោមបាតសមុទ្រ រវាងទីក្រុងព្រះសីហនុ-ទីក្រុងហុងកុង ទី៤៖ ស្នើអោយសមត្ថកិច្ចកម្ពុជា ជួយគ្រប់គ្រង Casino online ដើម្បីកុំប៉ះពាល់ទំនាក់ទំនង រវាងប្រទេសយើងទាំងពីរ។ ឯកឧត្តម ហោ ណាំហុង បានឆ្លើយថា សម្តេចអគ្គមហាសេនាបតីតេជោ សម្រេចដ៏ខ្ពង់ខ្ពស់លប់បំបាត់ Casino onlineនេះ តាំងពីឆ្នាំទៅរួចហើយ៕