ធ្វើមុខខូចក្រោយ ធ្វើក្រោយខូចមុខ ជាប្រយោគមួយឃ្លា ដែលប្រជាពលរដ្ឋតែងតែបន្ទោស នឹងនិយាយថាឱ្យចំៗទៅលើក្រសួងសាធារណការ និងដឹកជញ្ជូន ជារៀងរាល់ពេលដែលពួកគាត់ធ្វើដំណើរលើដងផ្លូវដែលមានការលំបាកម្តងៗ។ ក្នុង​ឱកាស​ចុះ​ត្រួត​ផ្លូវ​ជាតិ​លេខ ៣ កាល​ពី​ពេល​ថ្មីៗ​នេះ ​ឯកឧត្ដមទេសរដ្ឋមន្ត្រី ស៊ុន ចាន់ថុល​បានលើកឡើងថា៖ “មិនមែនមកពីក្រសួងសាធារណការ និងដឹកជញ្ជូន គ្មានសមត្ថភាពធ្វើផ្លូវឱ្យជាប់រឹងមាំនោះទេ តែវាមានហេតុផលរបស់វា”។ ដោយផ្លូវខ្លះមិនមានថវិកាគ្រប់គ្រាន់ក្នុងការជួសជុលស្ថាបនា ឬឯផ្លូវខ្លះទៀតត្រូវបានរងគ្រោះដោយសារតែការដឹកទំនិញលើចំនួនកំណត់។ ជាមួយគ្នានេះ ឯកឧត្តមបានបង្ហាញពីរូបមន្តដែលធ្វើឱ្យផ្លូវសឹករិចរិលឆាប់ខូច ដោយសារតែរថយន្តដឹកលើសទម្ងន់នោះគឺ គេយក ១០ x ១០ = ១០០ ហើយ ១០០ x ១០ = ១០០០ បើ ១០០០x១០ = ១០០០០ ដូច្នេះហើយបើថ្ងៃហ្នឹង មានឡានមួយគ្រឿងដឹកទំនិញលើស១០តោន ស្នើនឹងមានឡាន១ម៉ឺនគ្រឿងបើកលើផ្លូវហ្នឹង ចុះបើមានឡានខ្លះលើស៣០តោន អ៊ីចឹងវាស្មើនឹងឡានចង់ ១លានគ្រឿងដឹកតាមផ្លូវហ្នឹង អ៊ីចឹងហើយវាធ្វើឱ្យផ្លូវហ្នឹងខូចរិចរិលរបៀបមិច។ បន្ថែមលើសពីនេះ ឯកឧត្តមបានបង្ហាញពីទិន្នន័យ បន្ទាប់ពីបានដាក់ជញ្ជីងថ្លឹងរថយន្តបង្កប់ក្រោមដីនិងដាក់កាមេរ៉ា មុខ ក្រោយ សាកល្បង នៅព្រែកប្រា ដោយកាលពីខែ៥ បានទទួលរបាយការណ៍ថា ១ខែ មានឡាន២១៤គ្រឿងចូលថ្លឹង ប៉ុន្តែបន្ទាប់ពីបានប្រើប្រព័ន្ធទំនើបនេះ ១ថ្ងៃ រកឃើញ១០០គ្រឿងចូលមកថ្លឹង។ គួរបញ្ជាក់ថា នេះគឺជាបច្ចេកវិទ្យាថ្មីមួយ ​ដែលទាំងជញ្ជីងថ្លឹង នឹងកាមេរ៉ា អាច​ចាប់​បានទាំងរថយន្ត​ដឹក​លើស​ទម្ងន់ នឹងថតបានទាំងស្លាកលេខ។ ត្រង់ចំណុចនេះ ឯកឧត្តមបានសង្កត់ធ្ងន់ថា៖ “ចំពោះឡានដឹកទំនិញដែលដឹកលើសទម្ងន់ ២០ភាគរយ ត្រូវឃាត់ឡានទុក១ឆ្នាំ ផាកពិន័យហើយឃាត់ឡានទុកទៀត”។ ជាមួយគ្នានេះ ឯកឧត្តម ស៊ុន ចាន់ថុល ក៏បានណែនាំ​ឲ្យ​មន្រ្តី​តាមស្ថានីយ​ថ្លឹងជញ្ជីងទាំងអស់ យកចិត្តទុកដាក់​ក្នុងការ​ទប់ស្កាត់ការដឹកជញ្ជូនលើសទម្ងន់កម្រិត ដែលកំណត់ដោយច្បាប់ ដើម្បីថែរក្សាគុណភាពផ្លូវឱ្យបានរឹងមាំ និងសំណូមពរដល់អ្នកដែលបានប្រើប្រាស់ផ្លូវ ម្ចាស់ឡានធំៗដឹកទំនិញ សូមគោរពតាមច្បាស់ចរាចរណ៍ កុំដឹកទំនិញលើទម្ងន់ដែលកំណត់ដោយច្បាប់ ដែលធ្វើឱ្យខូចផ្លូវរបស់យើង។