ថ្ងៃព្រហស្បតិ៍ ៩កើត ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៥ ខែធ្នូ ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន បានរៀបចំបណ្តុះបណ្តាលបច្ចេកទេសក្នុងការប្រើប្រាស់កម្មវិធីថែទាំផ្លូវ (ROAD CARE Mobile App) ដល់ថ្នាក់ដឹកនាំ និងមន្ត្រីបច្ចេកទេស នៃអគ្គនាយដ្ឋានបច្ចេកទេស ក្រោមអធិបតីភាព ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស។ គោលបំណងសំខាន់ ក្នុងការបណ្តុះបណ្តាលនេះ គឺដើម្បីឱ្យមន្ត្រីបច្ចេកទេសទទួលបន្ទុកគ្រប់គ្រងចាត់ចែងការងារជួសជុលថែទាំផ្លូវថ្នល់ ( Maintenance Office) យល់ដឹងកាន់តែច្បាស់ក្នុងការប្រើប្រាស់កម្មវិធីថែទាំផ្លូវ (Road Care Mobile App) ក៏ដូចជាប្រព័ន្ធគ្រប់គ្រងកម្មវិធីថែទាំផ្លូវ (Road Care Mobile App) ដែលមន្ត្រីទទួលបន្ទុកទាំងនោះចាំបាច់ត្រូវធ្វើការឆ្លើយតប ចាត់ចែងទៅកាន់មន្ត្រីក្រោមបន្ទុក និងទំនាក់ទំនងទៅកាន់បងប្អូនប្រជាពលរដ្ឋ អំពីស្ថានភាពផ្លូវ ដែលប្រជាពលរដ្ឋបានរាយការណ៍ពីជង្ហុកសំបុកមាន់តាមដងផ្លូវនានាក្នុងរាជធានី-ខេត្ត ដែលអាចចូលរួមចំណែកក្នុងការកាត់បន្ថយការចំណាយថវិកាជាតិច្រើន និងកាត់បន្ថយគ្រោះថ្នាក់ចរាចរណ៍ ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា៕