[Kampuchea Thmey] - មន្ទីរសាធារណការខេត្តប៉ៃលិន បន្តការងាររៀបការប្រព័ន្ធលូតាមផ្លូវជាតិលេខ៥៧
2019-12-01
Go to the website published Kampuchea Thmey
ប៉ៃលិន ៖ ដើម្បីកែលំអសោភ័ណភាពផ្លូវ ជៀសវាងការហូរបាក់ដី ខូចផ្លូវជាតិលេខ៥៧ ដែលនាំឲ្យប៉ះពាល់ដល់សោភ័ណភាពខេត្តប៉ៃលិននោះ, រយៈពេលមួយសប្ដាហ៍មកនេះ មន្ទីរសាធារណការ និងដឹកជញ្ជូនខេត្តប៉ៃលិន បានបន្តខិតខំបង្កើនការអនុវត្តការងាររបស់ខ្លួន មិនថាថ្ងៃឈប់សម្រាក ឬថ្ងៃធ្វើការងារនោះទេ។
ជាក់ស្ដែង នៅថ្ងៃអាទិត្យ ទី០១ ខែធ្នូ ឆ្នាំ២០១៩នេះ មន្ទីរសាធារណការ និងដឹកជញ្ជូនខេត្តប៉ៃលិន ដែលមានលោក អ៊ាត សារ៉ាត់ ជាប្រធាន ក៏នៅតែបន្តអនុវត្តការងាររបស់ខ្លួនដែរ។
បើតាមលោក អ៊ាត សារ៉ាត់ ប្រធានមន្ទីរសាធារណការ និងជញ្ជូនខេត្តប៉ៃលិន បានមានប្រសាសន៍ឲ្យដឹងតាមទូរស័ព្ទនៅថ្ងៃទី០១ ខែធ្នូនេះថា ៖ ក្រុមការងារមន្ទីរ កំពុងតែមមាញឹកក្នុងកែលំអប្រព័ន្ធលូតាមផ្លូវជាតិលេខ៥៧ ដែលមានប្រវែង៨១០ម៉ែត្រ ជាគម្រោងថវិកា របស់មន្ទីរសាធារណការ និងដឹកជញ្ជូនខេត្ត ស្ថិតនៅភូមិអូរច្រា សង្កាត់ទួលល្វា ក្រុងប៉ៃលិន ខេត្តប៉ៃលិន។
ជាមួយគ្នានេះ លោកប្រធានមន្ទីរ ក៏បានសំណូមពរ ដល់បងប្អូនប្រជាពលរដ្ឋ នៅមូលដ្ឋាន សូមមានការយោគយល់ ព្រោះការសាងសង់ប្រព័ន្ធរំដោះទឹកនេះ អាចមានផលប៉ះពាល់ការរកស៊ី និងការចេញចូលគេហដ្ឋាន របស់បងប្អូនប្រជាពលរដ្ឋ ក៏ពិតមែន។ ប៉ុន្តែក្រោយពីបញ្ចប់ការងារសាងសង់នេះ, វានឹង ជួយសម្រួល ដល់ការលិចលង់ ដោយសារជំនន់ទឹកភ្លៀង ស្របពេលដែលខេត្តប៉ៃលិន មានការអភិវឌ្ឍយ៉ាងលឿន ប្រព័ន្ធលូ អូរ ប្រឡាយទឹក ហូរមិនទាន់តាមតម្រូវការ ហើយប្រព័ន្ធលូខ្លះ ត្រូវដីហូរចូលដែលនាំឲ្យស្ទះផងដែរ។
លោកប្រធានមន្ទីរ ក៏បានបញ្ជាក់ដែរថា ៖ គម្រោងដាក់ប្រព័ន្ធលូរំដោះទឹកមួយ ដែលស្ថិតនៅភូមិអូរច្រានេះ គិតចាប់ពី បង្គោលលេខ៨៨ ដល់ បង្គោលលេខ៨៩ មាន ប្រវែង៨១០ម៉ែត្រ ក្រោមគម្រោងថវិការបស់ ក្រសួងសាធារណការ និងដឹកជញ្ជូន តាមរយៈមន្ទីរសាធារណការ និងដឹកជញ្ជូនខេត្ត ដោយគិតចាប់តាំងពីដើមខែមីនា ឆ្នាំ២០១៩ រហូតមកដល់ពេលនេះ ក្រុមការងារនៃមន្ទីរសាធារណការ បានសាងសង់សម្រេចប្រមាណជាង៧០ភាគរយ និងឈានទៅបញ្ចប់ នៅក្នុងចុងឆ្នាំ ២០១៩នេះ។ បើតាមគម្រោងរបស់មន្ទីរសាធារណការ ខេត្ត នឹងមានសាងសង់ប្រព័ន្ធលូរំដោះទឹក នៅផ្សារព្រំ ដែលមានប្រវែង ១៨៥ម៉ែត្រ ចាប់ពីបង្គោលគីឡូម៉ែត្រលេខ១០០ និងបង្គោល ១០២ ផងដែរ៕
