ភ្នំពេញ៖ ថ្ងៃអង្គារ ៨រោច ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវថ្ងៃទី១៩ ខែវិច្ឆិកា ឆ្នាំ២០១៩ នៅសណ្ឋាគារ ហ៊ីម៉ាវ៉ារី ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ស្តីពី គម្រោងសិក្សាវាយតម្លៃ ពីភាពងាយរងគ្រោះ និងការបន្ស៊ាំទៅនឹងអាកាសធាតុ នៃគម្រោងការអភិវឌ្ឍដោយចីរភាព នៃទីក្រុងប្រទេសកម្ពុជា ដោយមានការចូលរួមពីគ្រប់ស្ថានប័នពាក់ព័ន្ធ ព្រមទាំងផ្នែកឯកជនផងដែរ។ សិក្ខាសាលានេះ រៀបចំឡើងក្នុងគោលបំណងស្វែងយល់ពីគម្រោងសិក្សានៅតាមទីក្រុង និងតាមបណ្តាខេត្ត ដែលងាយរងគ្រោះពីបម្រែបម្រួលអាកាសធាតុ មានដូចជា៖ ខេត្តបាត់ដំបង ខេត្តកំពត និងខេត្តក្រចេះ ជាដើម ព្រមទាំងពិគ្រោះយោបល់ស្វែងរកមធ្យោបាយ និងយុទ្ធសាស្ត្រ ដើម្បីការពារហានិភ័យពីបម្រែបម្រួលអាកាសធាតុទាំងនេះឱ្យបានកម្រិតខ្ពស់បំផុត ព្រោះថាខេត្តទាំងនេះ គឺជាខេត្តដែលមានសក្តានុពលសេដ្ឋកិច្ចខ្ពស់សម្រាប់ ការអភិវឌ្ឍប្រទេសជាតិ។ ឯកឧត្ដមអគ្គនាយកបានបន្តថា ការប្រែប្រួលអាកាសធាតុ នឹងបង្កឱ្យមានការកើនឡើងស៊ីតុណ្ហភាព រំហួត និង ដង់ស៊ីតេទឹកភ្លៀង ដែលបង្កឱ្យមានទឹកជំនន់ ខ្យល់ព្យុះ ខ្យល់កន្រ្តាក់ គ្រោះរាំងស្ងួត ភ្លើងឆេះព្រៃ ព្រមទាំងការកើនឡើងនៃនីវ៉ូទឹកសមុទ្រជាដើម ហើយប៉ះពាល់យ៉ាងខ្លាំងដល់ដំណើរការអភិវឌ្ឍប្រទេសជាតិ។ ឯកឧត្ដមអគ្គនាយក បានថ្លែងអំណរគុណយ៉ាងជ្រាលជ្រៅដល់ដៃគូអភិវឌ្ឍន៍ទាំងអស់ដែលបានផ្ដួចផ្ដើមឱ្យមានសិក្ខាសាលានេះឡើង ព្រមទាំង បានផ្ដាំផ្ញើឱ្យសិក្ខាកាមមកពីគ្រប់ស្ថាប័នយកចិត្តទុកដាក់ត្រងត្រាប់ស្ដាប់ការធ្វើបទបង្ហាញពីវាគ្មិន ចូលរួមជាសំណួរ ចម្លើយ និងយោបល់ ឱ្យបានផុលផុស ដើម្បីទទួលបានចំណេះដឹង និងបទពិសោធន៍ទូលំទូលាយ គ្រប់ជ្រុងជ្រោយ និងអាចអនុវត្តបាន សំដៅលើកកម្ពស់ការអនុវត្តទប់ទល់នឹងបម្រែបម្រួលអាកាសធាតុនេះ៕