កឋិនទានសាមគ្គីក្រសួងសាធារណការ​ និងដឹកជញ្ជូន​ រៃអង្គាស​បច្ច័យបាន២១៥.៥៥០.០០០៛ និង៤៧.៥០០$ និងគ្រឿងបរិក្ខាមួយចំនួន​ ត្រូវបានដង្ហែទៅប្រគេន ព្រះសង្ឃដែលគង់នៅវត្តសុវណ្ណគិរី ហៅ វត្តពើងបាក់រទេះ ស្រុកជីក្រែង ខេត្តសៀមរាប ដើម្បី កសាងសមិទ្ធផលនានាក្នុងព្រះពុទ្ធសាសនាឱ្យមានការរីកចម្រើនថែមទៀត --- ថ្ងៃសៅរិ៍ ១៣រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែតុលា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូន និងលោកជំទាវ រួមជាមួយថ្នាក់ ដឹកនាំ និងមន្ត្រីរាជការក្រោមឱវាទក្រសួង បានមូលមតិគ្នាដង្ហែកឋិនទានសាមគ្គីទៅកាន់វត្តសុវណ្ណគិរី ហៅវត្តពើងបាក់រទេះ ស្ថិតនៅភូមិអូរ ឃុំខ្វាវ ស្រុកជីក្រែង ខេត្តសៀមរាប ដើម្បីនាំយកបច្ច័យទៅប្រគេន ព្រះសង្ឃដែលគង់ចាំវស្សាអស់កាលត្រីមាស។ កឋិនទាននេះបានប្រារព្វធ្វើឡើងចាប់ពីថ្ងៃសុក្រ ១២រោច ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹង ថ្ងៃទី២៥ ខែតុលា ឆ្នាំ២០១៩ វេលា ម៉ោង១៤:៣០នាទីរសៀល ជួបជុំមន្ត្រីរាជការគ្រប់ជាន់ថ្នាក់ និងពុទ្ធ បរិស័ទញាតិមិត្តជិតឆ្ងាយ នៅទីស្តីការក្រសួង ដើម្បីចូលរួមពិធីក្រុងពាលីប្រារព្វធ្វើបទនមស្សការព្រះរតន ត្រៃយ៍ និងនិមត្តព្រះសង្ឃចម្រើន ព្រះបរិត្ត រួចសម្តែងធម្មទេសនា រៃអង្គាស​បច្ច័យបាន២១៥.៥៥០.០០០៛ និង៤៧.៥០០$ និងគ្រឿងបរិក្ខាមួយចំនួន លុះព្រឹកឡើងថ្ងៃសៅរិ៍១៣រោច ខែ អស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែតុលា ឆ្នាំ២០១៩ វេលាម៉ោង៤:០០នាទីព្រឹក ជួបជុំមន្ត្រីរាជការ និងពុទ្ធបរិស័ទនៅ ទីស្តីការក្រសួង ដង្ហែរដោយរថយន្តតាមផ្លូវជាតិលេខ៦ឆ្ពោះទៅកាន់វត្តសុវណ្ណគិរី ហៅវត្តពើងបាក់រទេះ។ ឯកឧត្តមទេសរដ្ឋមន្ត្រី បានសម្តែងនូវសេចក្តីសោមនស្សរីករាយជាអនេកដែលបានឃើញមន្ត្រីរាជការគ្រប់ ជាន់ថ្នាក់ និងពុទ្ធបរិស័ទញាតិមិត្តជិតឆ្ងាយបានស្រុះស្រួលមូលមតិគ្នារៀបចំបុណ្យកឋិនទានសាមគ្គីនេះ ឡើងប្រកបដោយទឹកចិត្តជ្រះថ្លា និងស្មារតីសាមគ្គីភាពយ៉ាងជិតស្និទ្ធ។ ឯកឧត្តមទេសរដ្ឋមន្ត្រីបានមានប្រសាសន៍ថា៖ យើងមានឱកាសធ្វើបុណ្យ ធ្វើទានកសាងនូវសេចក្តីល្អ គឺដោយសារយើងមានសុខសន្តិភាព ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី។ ឆ្លៀតក្នុងឱកាសនេះផងដែរ ឯកឧត្តមទេសរដ្ឋមន្ត្រីបានបួងសួងដល់ទេវតាប្រទានពរជ័យ សិរីមង្គល វិបុលសុខ កើតមានដល់ប្រជាពលរដ្ឋខ្មែរគ្រប់ៗរូប និងសូមជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងជូននូវកុសលផលបុណ្យចំពោះមន្រ្តីរាជការ និងពុទ្ធបរិស័ទញាតិមិត្តជិតឆ្ងាយទាំងអស់ សូមបានសុខចម្រុងចំរើន មានសន្តិភាព និងការអភិវឌ្ឍរីកចំរើនជា រៀងរហូតទៅ៕